اهو عند وخلاص

هو ليه ف ناس مش شايفة غير نفسها وبس؟
او بمعنى تانى .. فى ناس مش شايفة الا الحاجة بتاعتها او الحاجة اللى بتحبها وبس
وممكن كمان مايكونوش شايفين غير بس الحاجة اللى عكس الحاجة اللى انت بتحبها على سبيل العند فقط لا غير؟
الانسان ده غريب جدا
ليه الواحد ممكن يعند فى حاجة ويطلع غلط فى الاخر بس برضه يكابر ويفضل على رايه ويصمم ان انت حمار وهو اللى فاهم كل حاجة وعارف كل حاجة وفقط الحاجات اللى هو بيحبها ويعمل صح واى حاجة تانية تبقى مالهاش لزمة
واحد بيحب العنب يا أخى انت مالك ؟
ليه على سبيل العند تصمم ان التين احلى م العنب وان اى حد ما بيحبش التين مابيفهمش واى حد بيحب العنب ده جاهل فاكهيا؟

يفضل بقى يستفزك ويشتم ويهينك ويتتريق عليك ويناديك بالقاب انت مابتحبهاش لمجرد انه يحاول يتفوق عليك لو مش بالكلام يبقى بالشتيمة
ولو سكتت عشان تحترم نفسك تلاقيه زاد اكتر وحس انه كدة انتصر عليك وانه بقى الملك المتوج لكاس لعالم للنزاع !!!

تفضل تتكلم معاه بالبراهين والمنطق والادلة العلمية والحقائق التاريخية المثبتة والارقام الواقعية وترد رد طويل تشرح فيه وجهة نظرك
تلاقيه قال جملة واحدة ولا حاجة بيقول فيها بس اى حاجة ضدك وضد اللى انت بتدافع عنه وطبعا حاجة بتكون عكس الواقع

ايه المانع يا اخى ان انت تحب الحاجة بتاعتك وتحترم رأى الاخرين فى ان هم كمان يحبوا حاجات تكون غير الحاجة اللى انت بتحبها ؟ اوالحاجة اللى انت مقتنع بان هى الاحسن بغض النظر عن ان هما كمان مقتنعين بان الحاجة التانية هى الاحسن وبالفعل تكون الحاجة التانية هى الاحسن؟

واحد مثلا يعنى بيحب الكاراتيه تروح انت جاى على سبيل العند وتقول ان التايكوندو احسن؟
ماشى يا عم وجهة نظر برضه بس انا شايف ان الكاراتيه افضل من ناحية كذا كذا كذا وتسرحله رأيك بكل منطقية وأدلة مثبتة
يروح رادد عليك رد معناه ان انت غيى وحمار وان الكاراتيه لعبة عقيمة وان التايكوندو وبس والباقى خس .. على سبيل العند بس
طب يا اخى انا كلمتم بمنطقية وشرحت بالعقل .. يا تتكلم انت كمان بالعقل يا بلاشه
لا ازااااى؟ لازم يعند ويصمم ان هو صح وان الكاراتيه لعبة هبلة وان اى حد بيحبها اهبل هو كمان وان التايكوندو وبس ... ويبدأ يشتمك ويستفزك ويهينك مع انك من حقك انك تحتفظ برأيك ان الكاراتيه احسن زى ماهو كمان من حقه انه يعتقد ان التايكوندو احسن
لولا اختلاف الأذواق لبارت السلع يا عمنا !
لا ازاااى؟
هو رأيه هو بس الصح واى حد تانى غلط (ممكن يكون اساسا بيقول ان التايكوندو احسن من غير ما يكون سمع عنه حجة بس هو بيقول كدة عشان انت قلت انك بتحب الكاراتيه)
وممكن جدا برضه انك لو كنت قلت انك بتحب التايكوندو كان قال العكس تماما وقال ان التايكوندو لعبة عقيمة وان الكاراتيه افضل
فقط عان يثبت لنفسه وللناس ان هو الاحسن ون رأيه هو االصح وانه افضل منك

الغريب انه بيعمل كل الكلام ده من غير ما يكون ولا لعب كاراتيه ولا تايكوندو !!!!

امرك غريب يا اخى !
انت مالك أكل مكرونة او ما أكلش دى حرية شخصية
هل معنى انك مابتحبش المكرونة ان اى حد فى الدنيا بيحب المكرونة يبقى تعبان ومابيفهمش !!!

سبحان الله بجد

ارخم حاجة فى الموضوع كله انه يكون صاحبك وبتتعامل معاه بكل اخلاص وحب ورجولة ولما يحصل الموقف ده وتطلب منك يتعامل معاك باحترام شوية .. تلاقيه بعد العمر ده كله اتريق عليك اكتر وشتمك وقالك يلا ف ستين داهية ويطلع مش عاوز يعرفك وتطلع مخموم فيه وتلاقيع بيبيعك على اول ناصية ومن غير سبب !!


يلا .. ربنا يهدى الجميع