صبراً

الفرخة ولا البيضة

مش عارف ليه فى جدل كتير فى موضوع الفرخة والبيضة مع انه سهل جدا وواضح جدا وبسيط

المعضلة بتقول ان هل الاول كانت فرخة وبعدين باضت بيضة والبيضة فقست وجابت فرخة؟
ولا كانت بيضة وفقست جابت فرخة باضت بعد كدة بيضة فقست وجابت فرخة؟

اكيد الفرخة الاول قبل البيضة
لو كانت البيضة الاول كانت مششت وباظت
ليه؟
عشان كانت محتاجة فرخة ترقد عليها !
انما لو فرخة .. ماهياش محتاجة بيضة ترقد عليها عشان تعيش
يعنى البيضة هى اللى محتاجة الفرخة وليس العكس

اذن كانت الاول فرخة باضت بيضة والبيضة فقست وجابت فرخة وهكذا

اللى هايقول ان اللى خلق الفرخة كان يقدر يخلق بيضة تكبر من غير ما فرخة ترقد عليها
اقوله ماهو كان يقدر يخلق سيدنا ادم فى رحم امراة وبعدين يتولد سيدنا ادم ويخرج من الرحم لحد ما يكبر يبقى راجل !
بدون اى احتياج لامراة يكون الرحم ده جواها

ده فى الناس
طب وبالنسبة للحيوانات والطيور؟

انهى أعقل؟
ان ربنا يخلق بقرة الاول والبقرة تولد بقر تانى؟
ولا يتخلق رحم بقرة يخرج منه بقر صغير بدون احتياج للبقرة الام؟

البيضة زى رحم البقرة
الاتنين علاقتهم مرتبطة بالكائن الام

والكائن الام بالنسبة للبيضة هو الفرخة

ربنا خلق الكائن الحى الاول (الفرخة) وبعدين الكائن ده بدأ يتناسل ويجيب عيال عن طريق البيض !



يبقى اكيد
اكيد
الفرخة قبل البيضة

راجل قال لا

صحى م النوم
مراته قالتله : احضرلك الفطار؟
قالها : لا
دخل الحمام اتشطف وخرج يلبس هدومه عشان ينزل
مراته قالتله : انت مش هاتكوى القميص؟
بصلها وقالها : لا
نزل م البيت . وهو ماشى ف الشارع وقفه واحد يساله : لوسمحت تعرف فين شارع الكوز الكبير؟
الراجل قاله : لا
ومشى .. وقابل زميله على محطة الاتوبيس
زميله شافه منعوس فساله : انت مانمتش كويس؟
قاله : لا
ركبوا وجه الكمسارى قال للراجل : قطعت
قاله : لا
قاله طب ادفع
قاله : لا

مسكه الكمسارى يضربه ومعاه بعض اهل الخير من اللى راكبين فى الاتوبيس واتبرعوا يضربوا الراجل مع الكمسارى, واللى عملوا خناقة كبيرة قدر فيها اهل الشر انهم يقلبوا محافظ اهل الخير وينزلوا من الاتوبيس ويروحوا فى امان الله
نزل الراجل من الاتوبيس حطام .. ما قدرش يعدى الشارع بسرعة فخبطته عربية .. ومات

فجأة لقى نفسه دخل الجنة .. وحواليه مناظر جميلة .. جناين وانهار واشجار وفاكهة
ولقى نفسه اتجوز واحدة اجمل من مراته بكتير

وفجأة
صحى م النوم
على صوت مراته بتقوله : قوم يا راجل انت مش هاتروح الشغل؟

قام وبصلها بقرف .. وقالها : لا

6

امتى هاتعترف انك غلطت؟

مية الف !

المدونة دخل عليها 100الف زائر يا حالوللى !!!!

اخش انام امبارح وانا متطمن ان لسة بتاع 800 زيارة كمان عشان كنت عاوز ابقى انا ال100 الف عشان اصورها
اصحى الصبح الاقيهم بقوا 100 الف و400 ؟ و14 زائر اونلاين؟ !
فكرونى باسطورة ال14 بطل اللى قدروا ينتزعوا 14 كرسى فى الميكروباص .. اهو دول كانوا بيتعاركوا بقى عشان كل واحد فيهم يبقى هو ال100000 !


تعديل
جيت اروح دلوقتى اخد صورة ال100الف و400 بقيتهم بقوا 100 الف و500 !

ليه؟
مدونة زين الدين زيدان؟


عموما .. حصل ثورة فى الزوار بالنسبة للمدونة فى الاسابيع الماضية .. هابقى احكى عنها بالتفصيل ان شاء الله ^_^

قريبا .. فقط على مدونة عمرو فكرى . المئة الفية !

--------------




تعديل هام ! يا جماعة احنا قدام رقم قياسى بتضربه المدونة ! 52 واحد اونلاين فى نفس اللحظة وعدد الزيارات بقى 106888 زيارة مع انه من ربع ساعة بس كان كان 106723 .. يعنى فى ربع ساعة المدونة جالها 165 زيارة امبارح لما عملت التدوينة دى كان عدد الزيارات 100521 بعد مرور 22 ساعة .. يعنى اقل من يوم زاد العدد بقى 106888 يعنى فى ال22 ساعة اللى فاتوا المدونة جالها 6367 زيارة !!!! يا جدعاااااااااااان دى مدونة عمرو فكرى مش عمرو دياب !

بالشوز القديمة

س .. ليه الصحفى العراقى (منتظى الزيدى) ضرب بوش بالجزمة القديمة؟
ج .. عشان ماعندوش واحدة جديدة

هو انت عاوز ايه بالظبط ؟!

كل سنة وانتوا طيبين

وبالمناسبة السعيدة دى

ياريت كل واحد ييجى يقرا البوست ده يدينى جنيه

ربا ماتت

الخبر عند مشمش : انا لله وانا اليه راجعون

ادعوا مع جوسيان : توفيت ربا

انا بحاول الاقى كلام مش لاقى

انا النهاردة حصل معايا موقف صعب الصبح خلانى نايم متضايق
صحيت قبل المغرب من شوية وانا متضايق ومتعكنن اكتر وكنت هادخل دلوقتى اقول انى متضايق اكتر وبدون سبب

دلوقتى بقى اكتئبت

اعتقد انى هقفل على نفسى باب اوضتى يومين تلاتة لحد ما افوق
انا بجد اكتئبت بمعنى الكلمة




انا لله وانا اليه راجعون
البقاء لله وحده .. وحده
كلنا رايحين ان اجلا او عاجلا
كلنا بلا استثناء

سيدنا محمد نفسه اتوفى
يبقى احنا مش هانموت؟

الله يرحمها

----------------------------------------



معذرة للجميع
انا مكتئب بشدة .. اعتقد ممكن ما ادخلش اليومين الجايين