اسكندرية رايح جاى

الكلام ده كتبته من اسبوع ونص وحابب انشره دلوقتى


==================================
اسكندرية رايح جاى

الواحد لما بيسافر م القاهرة لاسكندرية بيتعب وبيبقى عاوز ينام .. ده لو كان واخد كفايته م النوم

وبرضه لو الواحد فضل صاحى طول اليوم لحد ما صلى الفجر وبعد كدة كمل اليوم برضه من غير ما ينام لحد تانى يوم المغرب غالبا بيكون خلاص مش قادر
ولما بيكون اليوم حر والدنيا ولعة وانت ملزق ومليان عرق بتبقى مش طايق نفسك
ويا سلام بقى لو كنت صايم فى يوم حر والناس قدامك عمالين ياكلوا ويشربوا وانت الوحيد اللى مستحمل الحر والصيام لوحدك

النهاردة الاول من اغسطس 2007 كنت صايم ومانمتش من امبارح الصبح وسافرت اسكندرية الصبح ورجعت العصر فى عز الولعة والصيام (اثنين وخميس رجب) وكنت تعبان اساسا
لك ان تتخيل بقى كم الارهاق

على فكرة انا عارف ان الصايم فى نهار رمضان له الحق فى انه يفطر لما يكون على سفر .. بس انا ما رضيش افطر على اساس انى كنت قررت اصوم يبقى خلاص هاصون يعنى هاصوم (كنت مقرر اصوم قبل ما اعرف انى مسافر)
وعلى فكرة تانية خالص .. احنا ما كناش رايحين اسكندرية نصيف ولا حاجة وانما كنا رايحين نبص على شقة هناك

بس بجد اسكندرية دى حاجة تانية
مش عارف الهوا ده جاى منين .. كل ما ندخل عمارة ونعاين شقة او ندخل نموذج اقولهم يطفوا المراوح بس اكتشف ان الهوا ده طبيعى !!! قصدى الهوا الشديد ده طبيعى !
لا وهوا بارد منعش مش هوا سخن زى بتاع القاهرة ولا القليوبية كفر العبور !
عرفنا برضه هنا لما شفنا شقق ناس واخداها ان فى ناس عايشة بجد وساكنين فى شقق من ام نص مليون أهيف !!!
شقة 3 اوض كل اوضة بمثابة شقة منفصلة والشقة فيها 3 حمامات والعمارة اصلا فيها 3 اسانسيرات والمطبخ والحمام على بعضهم اساسا يعملولهم شقة لوحدهم .. بتكلم عن الحمام الصغير اللى هو بتاع الضيوف مش الحمام او بلكونة ومجمع ادشاش !

طبعا لما روحت البيت استحميت وكنت بنام وانا واقف تحت الدش وكانت عينى مقفلة بحاول افتح فيها مش قادر فطلعت جنب الباب وسألت ماما عن اللى بيبقى قافل عينه ده بيكون صاحى ولا نايم فلما قالتلى انه بيبقى نايم طلبت منها تصحينى الساعة ستة ورجعت كملت نوم تحت الدش

طلعت بعد شوية صليت الظهر والعصر جمع تأخير وبعدين نمت زى السطيحة وقلت لماما تكلم الكابتن تعتذرله عن انى مش هاقدر اروح النادى النهاردة لانى لو كنت رحت كنت فعلا مش هاقدر امسك التمرين

صحيت الساعة تمانية وربع مع العلم بان المغرب بيأذن على حوالى سبعة ونص
ادور ع النضارة والاقى ماما نسيت تطلعها من شنطتها لما اديتهالها فى العربية عشان لما بكون عاوز انام بتبقى النضارة تقيلة اوى على وشى فبقلعها وعشان ما تطيرش برة العربية (اصلنا كنا فاتحين الازاز عشان تكييف العربية باظ واحنا قاعدين!) وبالتالى ماطلعتهاش من الشنطة وخدتها معاها وهى نازلة
بابا برضه نسى يطلع الهارد بتاع الكمبيوتر من شنطة الكشف بتاعته (كنت حاطط الهارد فيها وحاططها فى شنطة العربية على اساس انى ممكن اروح بالهارد لواحد قريبى وكان ده أأمن مكان فى العربية) وعليه فبرضه بابا خد الهارد ومشى

يعنى العائلة الكريمة تكفلت النهاردة بانها ما تعديش اليوم من غير ما تخلص عليا خالص
ماما خدت النضارة وبابا خد الهارد واختى عرفت انها راحت النادى وبالتالى فانا اعتبر تغيبت عن التمرين دلع على اساس ان اختى كانت مسافرة معايا وهى راحت النادى وانا ما روحتش (بغض النظر بقى عن ان انا ما نمتش فى الرحلة وان انا الوحيد اللى كنت صايم)

ادور بقى على اى أكل اكله لحد ما يرجعوا من برة لقيت حاجات غريبة كدة كلتها مش عارف هى ايه بعد صراع مع جمعية رعاية النمل بالعبور
وجبت هارد قديم نزلت عليه نسخة ويندوز اول حاجة بعملها عليه دلوقتى انى بكتب الكلام ده حالا وانا قاعد من غير نضارة وشايف الكيبورد بالعافية