هابى 2010

هابى 2010 يا عيال

 

هابى راس سنة هجرية

يا حبيبتى يا سلوفينيا يا سلوفينيا

المصريين بيشجعوا سلوفينيا .. واحنا معاهم

حسام هو الحل

مانيش زمالكاوى

ولا حتى بقيت باهتم بتشجيع الكورة

بس مالهاش حل تانى

حسام هو الحل

اضحى سعيد 2009

كل سنة وانتوا تيبين

شافوا الهلال وقالوا العيد بكرة

وطلعت الشمس فماشافوش الهلال فرجعوا قالوا العيد بعد بكرة

لكن سيادة الريس بجماله بعلاءه بقوة شخصيته امر

قال لازم العيد يبقى بكرة

خلى اولادى المصريين يفرحوا

وعليه

فقد تقرر ان العيد يبقى بكرة

كل سنة وانتوا طيبين يا حلوين

الحمد لله على كل شئ

الكل كان ضدنا

الملعب

الجمهور

الحكم

الحكم تانى برضه

الحكم تالت

حسن شحاتة

ابو تريكة

مادام الجيل ده ماصعدش لكتس العالم

يبقى عمرنا ما هانصعد تانى

الحمد لله على كل شئ

2-0

خلص الشوط الاول وانا ف البيت .. وكنت كل شوية اسمع هيصة ف الشارع
قمت بين الشوطين لبست تيشيرت احمر على بنطلون اسود وصديري ابيض ونزلت قعدت على قهوة
والوقت يعدى والناس تصرخ لحد الوقت بدل الضايع
بدات الناس تمشى كل شوية والقهوة تفضى او الجزء اللى انا كنت قاعد فيه اللى كان مشغل صوت حازم الكاديكى عشان كان فى جزء تانى مشغل صوت ميمى الشربينى
انا بدأت اتوتر ف اخر تلت ساعة

واخر ربع ساعة كلها تقريبا كنت واقف وماسك دماغى

واخر عشر دقايق قمت وقفت ع الكرسى

شوية شوية والقهوة تفضى
واللى موجودين عمالين يقولوا يارب
لحد ما جه الجون
وكله قام يصرخ ويصوت
ولقيت نفسى بسلم على واحد معرفوش كان بيعزم عليا بسيجارة اثناء الماتش
واللى بقى يحضن يحضن واللى يبوس يبوس وناس ماتعرفش بعض تحضن وتبوس ف بعض وكله بيصرخ
خلص الماتش وكله طلع يجرى ع الشارع
وفضلنا واقفين اكتر من ساعة الناس ترقص وتصقف وتولع نار بالبيروسول واللى يغنى واللى يحدف حاجات ف الهوا
والناس بقت تنزلنا م البيوت وناس تيجى بعربيات تركنها ف وسط الشارع وتنزل تصور وترقص وتغنى على انغام (اوف اح متعب حطه صح) و(هيلا هيلا وهيلا هيلا هو .. منتخبنا مفيش زيووه) وغيره
مارجعتش البيت غير لما الموبايل كان بيفصل شحن
وافتكرت ف الطريق وانا راجع انى كنت عايز اخش الحمام بين الشوطين ونسيت وكنت ناسى م الفرحة

الفوايد م الماتش :
- كسبنا الجزاير وعلينا عليهم معنويا
- الماتش الفاصل فى السودان اللى تعتبر هى ومصر واحد
- وائل جمعة وحسنى عبد ربه هايرجعوا من الايقاف والاصابة
- الوناس جواوى وخالد لموشيه الاساسيين فى الجزاير موقوفين ومش هايلعبوا
- عبد الظاهر السقا وعصام الحضرى وغيرهم استعادوا مستواهم الرائع جدا مع المنتخب


- اصابتين للاعبين من الجزاير وخروجهم مستبدلين واحتمال ما يلعبوش الماتش الفيصل يوم الاربع

الحمد لله

6-10-2009

كلمات : سيد حجاب
ألحان : عمار الشريعي

حبيبتى من ضفايرها طل القمر .. وبين شفايفها ندى الورد بات
ضحكتها بتهز الشجر والحجر .. وحنانها بيصحى الحياة فى النبات
حبيبتى بتعلمنى احب الحياة .. من حبى فيها حياتى شمس وربيع
والحب ف الدنيا دى ليه طوق النجاة .. لولاه يضيع قلب المحب الوديع
يا حلوة يا بلدنا يا نيل سلسبيل .. بحبك انتي رفعنا راسنا لفوق
لو الزمن ليل مايرهبنا ليل .. شوقنا ف عروقنا يصحي شمس الشروق
الحلوة قلب كبير يضم الولاد.. وزاد وزوادة وضلة وسبيل
الموت الاستشهاد عشانها ميلاد.. وكلنا عشاق ترابها النبيل



حبيبتى من ضفايرها طل القمر - اغنية فيلم كتيبة الاعدام

اليوم الرابع = 4 رمضان 1430 - 25 اغسطس 2009

- 4 -

عمرك تخيلت نفسك فى النار قبل كدة؟
مين فينا مابيغلطش؟
ماحدش
اتحدى واحد يقول انه مابيغلطش ف اى حاجة
اكيد كلنا بنغلط
كل ابن ادم خطاء .. المهم اننا نتوب
طب عمرك فكرت وانت رايح تغلط ان غلطك ده ممكن يكون هو المتسبب ف انك تدخل النار؟
تخيلت نفسك ف النار قبل كدة؟
تجربة عملية .. روح فورا ولع البوتاجاز وحط صباعك ف النار لمدة ثانيتين
برافو عليك استحملت .. طب راجل بقى حط عينك ف النار دى ولو ثانية واحدة
اهو مش عينك بس اللى هاتبقى ف النار .. ده انت كله هاتبقى ف النار - والعياذ بالله - لو دخلت النار .. اللهم احفظنا
تخيل انك كلك واقف جوة نار .. بعينك بلسانك براسك بايدك برجلك بكلك على بعضك واقف جوة النار
ومش بس واقف شوية وخارج .. ده انت ممكن تقعد جوة بالسنين
وكل ما تتحرق وتتفحم - اللهم احفظنا - جلدك يرجع تانى زى ما كان عشان يبدا يتحرق ويتفحم من جديد
!
امر مفزع مش كدة؟
عمرك وانت رايح تغلط (واحنا اتفقنا ان كلما بنغلط) فكرت ف المشهد ده؟
صدقنى لو فكرت فيه وانت رايح تغلط عمرك ما هاتكمل الغلط ده
طب احب اقولك حاجة .. اكيد انت عارفها
بس انا عايز استحضرها قدامك بعد ما استحضرنا مشهد النار
انت متخيل انك لو رايح تسرق (مثلا) واستحضرت مشهد النار ده .. فاستعذت بالله م الشيطان الرجيم ورجعت وماسرقتش .. متخيل انك مش بس مش هاتاخد ذنب السرقة .. لا انت كمان هاتاخد حسنة؟
اه والله
لو المسلم هم بالسيئة ففعلها تكتب له سيئة .. ولو هم بالسيئة ولم يفعلها تكتب له حسنة
خدت بالك من حاجة؟
لو رحت تسرق .. ربنا مش هايكتبلك حاجة .. لو سرقت فعلا هاتتكتبلك سيئة .. لكن لو استحضرت مشهد النار وخفت من ربنا فماعملتش الشئ ده (السرقة) .. ربنا هايديلك حسنة
ماحدش بقى يتفزلك ويروح يعمل حاجة غلط ويرجع ف اخر لحظة ويقول ادينى ماعملتهاش اهو عشان عايز ياخد حسنة
لا يا بابا الكلام ده مش على ربنا .. كدة مش بتضحك على ربنا ده انت كدة بتضحك على نفسك وبتخلى الشيطان يضحك عليك
لانك ممكن تلاقى نفسك غصب عنك بتعملها فعلا رغم انك ماكنتش ناوى تعملها .. واهى تبقى اتكتبت عليك سيئة يا حلو
يعنى لو انت قلت خلاص هاروح اسرق والحق نفسى ف اخر لحظة وارجع عشان اخد حسنة .. هاتروح تسرق ولما توصل للحاجة اللى هاتسرقها الشيطان هايزينها ف عنيك وهاتلاقى نفسك سرقتها فعلا .. وكدة تبقى اتكتبت عليك سيئة م الهوا
ماحدش بيضحك على ربنا
على النقيض بقى
لو انت هميت تعمل حسنة .. وماعملتهاش .. هاتاخد حسنة فعلا !
اما بقى لو عملتها هاتاخد 10 حسنات .. والله يضاعف لمن يشاء .. يعنى ممكن تاخد اضعاف ال10 حسنات دول
شفت الفرق بين الحسنة والسيئة؟
السيئة اللى انت عايز تعملها .. مش هاتاخد حاجة
انما الحسنة اللى عايز تعملها .. تاخد عليها حسنة .. وانت لسة ماعملتهاش

طب السيئة لو انت رحت فعلا تعملها وماعملتهاش عشان خفت من ربنا؟ .. هاتاخد حسنة
الحسنة بقى اللى لو رحت تعملها بس ماعملتهاش؟ .. مش هاتاخد سيئة .. هاتاد حسنة برضه

اما بقى السيئة لو عملتها .. هاتاخد هى سيئة واحدة
والحسنة .. لو عملتها فعلا تاخد 10 حسنات .. والله يضاعف لمن يشاء

موضوع بسيط جدا
منطق .. فكر فيه بشكل رياضى او فلسفى زى ما تحب
انت عايز ايه؟

عايزك بس وانت رايح تعمل السيئة بعد كدة تفكر ف شكل النار اللى قلتلك عليها من شوية
مش هاقولك وصف النار .. دى مش بتاعتى .. تقدر تعرف وصف النار من كل العلاء والشيوخ الاجلاء اللى وصفوا الجنة ووصفوا النار
انا بس بكلمك بشكل دنيوى
النار بتاعتنا دى .. انت ما تقدرش تحط عينك فيها ثانية واحدة
فما بالك بنار الاخرة اللى ممكن تبقى واقف فيها كلك بجسمك كله لمدة سنين
مع العلم بان نار الدنيا دى ولا تسوى حاجة جنب نار الاخرة

طب عمرك فكرت انك وانت رايح تعمل الغلط ده .. ربنا شايفك؟
فكر فيها كدة .. انت رايح تغلط .. وربنا شايفك .. وانت عارف كدة .. ورغم كدة مستمر ف انك رايح تعمل حاجة غلط
يعنى بتعند معاه زى ما قلنا قبل كدة
تخيل لو شخص عادى بيننا مخلوق وانت عملت كدة معاه
هل لو رحت بعد كدة قلتله ادينى فلوس هايديلك؟

طب لو انت عندت مع ربنا وغلطت (قدامه) .. هايبقالك وش تروح تقوله يارب ارزقنى وارحمنى؟
على اى اساس؟
ايه اللى انت قدمته عشان ربنا يرزقك ويرحمك على اساسه؟ .. الا برحمة ربنا اللى ممكن يسامحك رغم انك فيك كل العبر وبتغلط فيه وبرضه بيسامحك


كلنا بنغلط .. ماحدش فينا ما بيغلطش
كل ابن ادم خطاء .. المهم اننا نتوب

فكرت قبل كدة ف الجملة دى: (كل ابن ادم خطاء وخير الخطائين التوابين)؟


------------------------------------


ميديا اليوم :

حلقات الدار الاخرة للشيخ عمر عبد الكافى
حلقات رائعة تتضمن وصف للدار الاخرة بدءا من وفاة الانسان وحتى النار او الجنة
يتضمن الملف 33 حلقة تحتوى :
* مقدمة , الروح وما فى القبور , ما بعد الموت , موجبات ومنجيات عذاب القبر , علامات الساعة الصغرى والكبرى , البعث من القبور , يوم القيامة , الحساب , الميزان , الشفاعة , الصراط , الحوض , وصف تفصيلى للجنة والنار


-----------
حمل من هنا | 172 ميجا

------------------------------------


لمتابعة برنامج اليوم بالكامل .. تابع من هنا على منتدى عمرو فكرى

اليوم الثالث = 3 رمضان 1430 - 24 اغسطس 2009

- 3 -

فكرت قبل كدة فى معنى (ان الله اقرب اليك من حبل الوريد) ؟
سمعتها كتير قبل كدة مش كدة؟
بس تدبرت فى معناها قبل كدة؟

اقرب ليك من حبل الوريد .. عارف يعنى ايه؟
حبل الوريد ده الى جوة ايدك .. ربنا بقى اقربلك منه
تخيل ربنا فين !
شوف بقى لما بتغلط يا حلو .. تخيل ربنا اللى اقرب ليك من حبل الوريد .. تخيله وهو شايفك
يعنى انت لو هاتغلط .. بتشوف لو فى حد شايفك ولا لا وبتستخبى وتدارى وتقفل على نفسك وبعدين تغلط
تخيل بقى ان ربنا بنفسه هايبقى شايفك
الا بقى لو قدرت تهرب منه .. يعنى لو قدرت تبعد عن حبل الوريد بتاعك ماشى ساعتها تقدر تستخبى وتعمل اللى انت عايزه من غير ربنا ما يشوفك

ده انت لما تبقى عايز تشرب سيجارة بتهرب من ابوك وتجرى تشربها ف الدرا .. عشان ابوك مايشوفكش
إما انك خايف منه انه يشوفك .. او حياءا منه
طب تخيل انك مهما عملت ومهما رحت .. حبل الوريد بتاعك معاك
وبالتالى ربنا شايفك فيييين ما تكون
وانت قايم وانت قاعد وانت ماشى وانت نايم
مستخبى متغطى قافل على نفسك .. معاك
وشايفك
عايز تتخيل انك منتهز فرصة انك لوحدك وقررت تعمل العادة السرية - اعوذ بالله - .. عايزك تتخيل كدة انك بتعملها قدام ابوك !
فكر فيها شوية
فكر كويس .. ها؟ .. رد فعله هايكون ايه؟
طب ولما اللى خلق ابوك يتفرج عليك وانت بتعملها؟
.....
..........
مش كدة؟
مهما عملت .. ومهما استخبيت .. هايشوفك
هاتتدارى من ابوك عشان ما يشوفكش؟ .. ربنا شايفك
هاتستخبى من رئيسك ف الشغل عشان ماياخدش باله منك .. ربنا شايفك
لو عايز بقى تعمل حاجة ربنا قايلك ماتعملهاش اعملها من وراه
مش انت لما تكون بتذاكر مثلا لو لسة بتذاكر .. لو قمت تتفرج على التليفزيون مثلا ابوك هايتضايق؟
ارجع لايام زمان وافتكر الثانوية العامة
مش ابوك كان عايزك تذاكر على طول؟
طيب هل كنت بتتعمد تعند معاه وتيجى قدامه وتروح سايب المذاكرة وتتفرج على التليفزيون؟
بلاش المثال ده .. هل كنت بتتعمد تيجى قدامه وتشرب سيجارة؟ على سبيل فقط انك تعند معاه
طب ما بالك بربنا .. واللى أمرك بانك ما تعملش حاجات معينة .. وانت بتتعمد تيجى قدامه وتعملها !
ماهى مالهاش معنى تانى
انت كدة بتعند مع ربنا
هو قالك ما تعملش كدة .. وانت جيت قدامه ورحت عامل اللى هو قالك ماتعملوش
مالهاش معنى غير انك بتعند معاه
ابوك كان هايعمل معاك ايه؟ .. هايزعل منك؟ هايخاصمك؟ هايزعق؟ هايشتمك؟ هايديك بالقلم؟ هايضربك بالخرزانة؟
علقة وهاتعدى .. زعل ويروح
انما خرزانة ربنا بقى .. يا ويلك يا حبيبى
متخيل انك هاتفضل طوووول العمر قاعد جوة نار؟
مش ثانية ولا اتنين ولا ساعة ولا ساعتين .. لا ده طول العمر
تخيل انك هاتفضل سنة كاملة جوة النار !
طب عشر سنين .. طب مية سنة !

بس زى ما ربنا اقرب ليك من حبل الوريد .. وهايشوفك لما تغلط
اهو برضه هايشوفك لما تعمل الصح
تخيل انك قاعد بتذاكر لوحدك وابوك دخل الشقة راجع من الشغل ولقاك قاعد لوحدك عمال تذاكر من غير ما يقولك ذاكر .. هايفرح بيك مش كدة؟
طب لوكان نايم وانت بتتكلم ف التليفون مع واحد صاحبك وابوك صحى سمعك عمال تتكلم وتقول ابويا ده راجل كويس وانا بحبه و... الخ
احساسه هايكون ايه؟ هايبقى سعيد بيك طبعا مش كدة؟
طب تخيل ان ربنا شافك وانت قاعد تذكره
قاعد تقرا ف المصحف .. من غير ما حد يقولك خد المصحف اقرا
قاعد تفكر ف ملكوت الله وتقول سبحانك يارب
تفكر ف نعم الله وتقول ياااااه الحمد لله .. الف حمد والف شكر ليك يارب
برضه هايفرح بيك
تخيل بقى لما ربنا يفرح بيك
ويباهى بيك الملائكة ويقولهم عبدى قاعد يذكرنى
شوف منزلتك عند ربنا تبقى ايه ساعتها

عكس خااااااالص لما ياقيك بتعند معاه وجاى قدامه وبتعمل الحاجات اللى هو قالك ماتعملهاش
ماهو انت مهما غلطت اى غلط وف اى مكان .. هاتبقى بتغلط قدامه .. ده اقرب ليك من حبل الوريد
شوف انت بقى لما انت تعند مع ربنا وتيجى تتعمد تغلط قدامه
عمرك لما جيت تغلط قدام ربنا فكرت ابدا ان ربنا شايفك دلوقتى؟
استحضرت الموقف قبل كدة؟
انت رايح تغلط .. وعارف ان ربنا شايفك وانت رايح تغلط
ورغم كدة مصمم انك تكمل غلط !

عمرك فكرت فيها؟
طب عمرك تخيلت انك ف النار قبل كدة؟!


------------------------------------


ميديا اليوم :

المبتهل الشيخ نصر الدين طوبار وابتهال حين يهدى الصبح اشراق ثناه


-----------
حمل من هنا | 1.16 ميجا

------------------------------------


لمتابعة برنامج اليوم بالكامل .. تابع من هنا على منتدى عمرو فكرى

اليوم الثانى = 2 رمضان 1430 - 23 اغسطس 2009

- 2 -

فكرت قبل كدة ف معنى (سمع الله لمن حمده) ؟ اللى انت بتقولها بعد ما بتقوم من كل ركعة بتركعها ف الصلاة؟
لو بتصلى يعنى
اكيد بتقلها على الاقل فى صلاة الجمعة .. او على الاقل بتسمعهم بيقولوها
عمرك فكرت ف معناها؟
سمع الله .. ربنا هايسمع
لمن حمده .. اللى يحمده
يعنى اللى يحمد ربنا ويشكره .. ربنا هايسمعه
مش المقصود ان ربنا مش بيسمعك فى العادى لكن هايسمعك لما تحمده
وانما ال(سمع) هنا معناه .. بكل بساطة .. هايحققلك طلبك
هايستجيب لدعاءك
كل اللى مطلوب منك حاجة واحدة بس .. تقول كلمتين اتنين بالظبط
(الحمد لله)
الحمد لله .. بس
تقولها بضمير مش اى كلام
يعنى ماتمسكش سبحة وتقعد تعد .. الحمدوله الحمدلاه لحمدله الحملله المده الحمده الحمدله
بذمتك كام (الحمد لله) قلتها صح فعلا من ال100 (الحمد لله) اللى انت قلتهم؟
كام مرة حمدت ربنا فعلا من بين ال100 (الحمد لله) اللى انت قلتهم؟
يا اخى قولها مرة واحدة بس بضمير
الحمد .. لله
انا بحمدك يارب على كل نعمك اللى انت اديتهانى
بحمدك يارب انك خلقتنى انسان وليس حيوان .. انسان بفكر بعقلى اللى انت اديتهونى عشان احمدك
بحمدك يارب انك خلقتنى على ملة الاسلام .. وانا معرفش لو كنت اتخلقت مش مسلم هل كنت ممكن اتجه للاسلام ولا لا
بحمدك يارب انك خلقتنى بدراعين ورجلين وعينين وودنين .. وفى غيرى كتيييييييير حرمتهم من النعم دى .. بس حتى اللى حرمته من احدى نعمك .. اكيد انعمت عليه بحاجة احسن
الحمد لله على كل نعمه
انا بحمدك يارب على نعمة حمدك . انك خليتنى قدرت افكر واحمدك يارب واجى اقولك الحمد لله .. الف حمد والف شكر ليك يارب

متخيل؟ .. انك لما فقط تقول (الحمد لله) بضمير .. وبكل المعانى اللى فوق .. ربنا هايسمعك !
عارف يعنى ايه؟
يعنى مشاكلك هاتتحل
يعنى هاتبقى واسطتك ربنا .. وشوف انت بقى لما تبقى واسطتك ربنا
ده انت لما تبقى واسطتك رائد ف الشرطة ولا موظف كبير فى مصلحة حكومية بتبقى هاتتنطط على الخلق عشان واسطتك
تخيل بقى ان واسطتك هاتبقى اللى خلق الشخص ده نفسه !
هايبقى منك لربنا على طول
يعنى ربنا هايسمعك .. اشكيله وكلمه .. واعتذرله جامد .. هو سامعك .. وصدقنى هايسامحك
وحتى يا سيدى لو مشاكلك ما اتحلتش قريب .. يبقى يا سعدك يا هناك ياللى ربنا أجل استجابته لدعاءك ليوم القيامة
ساعتها الناس كلهم هايقولوا ياريت ربنا ماكانش قبل دعاءنا ف الدنيا عشان يقبله دلوقتى
(سمع الله لمن حمده)
شوف انت لما تبقى عندك مشكلة .. وعايز تعرضها على اى مسئول
تبقى هاتموت وتخلى اى حد يسمعك خمس دقايق بس عشان توصله مشكلتك
تخيل بقى لما ربنا نفسه اللى (يسمعك)
شوف هاتقول ايه لربنا لما يسمعك
وكل ده المقابل بتاعه حاجة صغيرة اوى
انك - فقط - تحمد ربنا
وهاتلاقى ربنا بيستجيب لدعاءك اسرع مما تتخيل .. لانه قريب منك .. ومفيش حواجز بينك وبينه
ده فى العادى .. حتى فى الوقت اللى مش بتحمده فيه .. ربنا معاك وبيسمعك
اقرب ليك من حبل الوريد

عمرك فكرت ف معنى الكلمة دى؟
(ان الله اقرب اليك من حبل الوريد) ؟


------------------------------------


ميديا اليوم :

قصة توبة الفنانة المعتزلة (حلا شيحة) وقصة إسلام زوجها
لقاء عبر قناة (الناس) مدته 57:13 دقيقة


-----------
حمل من هنا | 145.24 ميجا RM

------------------------------------


لمتابعة برنامج اليوم بالكامل .. تابع من هنا على منتدى عمرو فكرى

اليوم الاول = 1 رمضان 1430 - 22 اغسطس 2009

- 1 -

بتصلى؟
لو لا .. مش بتصلى ليه؟
حاجة من اتنين .. رفض للصلاة .. او كسل

هل انت رافض انك تصلى من الاساس؟
لا؟
طب بلاش اقولك اللى مش هايصلى ده هايروح النار ولا ان الصلاة اهم حاجة ولا اى حاجة من دة
هاقولك حاجة تانية خالص .. حاجة صغيرة اوى
لو انت صليت .. هاتخسر ايه؟
مجهود ووقت؟
مجهود اد ايه؟ .. هاتقوم من على الارض وتقعد على الارض وتوطى اربع مرات؟
طبعا مفيش داعى افكرك انت لو مش بتصلى فانت بتقوم وتقعد على الارض كام مرة فى اليوم فى العادى بتاعك ولا بتوطى ع الارض كام مرة ف اليوم .. ولو ساكن ف دور عالى مش هاقولك انت بتطلع كام سلمة ولا لو واحد صاحبك نده عليك هاتنزل الكام دور دول كلهم عشان تنزله
وقت؟
وقت اد ايه؟
خمس دقايق؟
انت فى كام خمس دقايق بتضيعها ف اليوم؟
ماتش الكورة اللى بتشوفه اللى فيه 90 دقيقة غير ال15 اللى بين الشوطين غير ال5 تقريبا وقت بدل ضايق ف الشوط الاول و5 تانيين وقت بدل ضايع ف الشوط التانى
طب وكل الوقت ده مش بيبقى وقت ضايع؟
ده غير بقى لو هاتتفرج على التحليل
لو هاتشوف الماتش بس من غير اعلانات حتى ولا بين شوطين ولا اى حاجة .. ادى 100 دقيقة
يعنى 20 خمس دقايق
على ماتش كورة
طب لو بتتفرجى على مسلسل ساعة؟
60 دقيقة .. طبعا غير البرامج والاعلانات .. هانقول المسلسل بس 60 دقيقة
ادى 12 خمس دقايق ضاعوا منك على مسلسل

الصلاة هى خمس دقايق واحدة بس مطلوبة منك
وفى مقابلها هاتحس براحة نفسية انك عملت الحاجة المطلوبة منك وقاعد مستريح
وربنا هايبقى راضى عنك .. واكيد هايخلى حياتك احسن
يبقى مابتصليش ليه؟


طب بتصلى؟
بتصلى امتى؟
مش هاجيبلك احاديث بتقول اننا المفروض نقوم نصلى اول ما نسمع الاذان ولا ايات قرانية تقول اننا المفروض نقوم نصلى على طول ومانستناش
انا بس هاقولك .. طالما انت كدة كدة هاتصلى .. يبقى مابتصليش دلوقتى ليه وتريح نفسك؟ لازم تأخر الصلاة وتوجع دماغك؟
وممكن تنسى وتبقى راحت عليك الصلاة يا حلو
بتأخر الصلاة ليه؟
معلش فى برنامج مهم متابعه .. اخلص بس اللى فى ايدى ده واقوم على طول .. اول ما اخلص الجيم ده هاقوم جرى .. اصل معايا تليفون مهم
هاقولك كلمتين اتنين بس
اول كلمتين فى الاذان
(الله أكبر)
جربت قبل كدة تفكر فى معنى كلمة (الله اكبر)؟
الله .. اكبر
يعنى ايه؟
يعنى ربنا .. اكبر من اى حاجة تانية ف الدنيا
واللى طالبه ربنا .. اكبر من اى حاجة تانية بنعملها فى حياتنا
وربنا طالب منك تصلى
هاتقولى لا اصل البرنامج ده عندى اهم؟ ولا المكالمة دى لازم اخلصها والا اللى بكلمه هايطير؟
لا يا حبيبى مش هايطير .. انت اللى هاتطير لما تأخر الصلاة
ربنا اكبر من ماتش الكورة اللى بتتفرج عليه واكبر من المسلسل اللى بتتفرجى عليه واكبر من الجيم اللى بتلعبه .. ومستنى بين الشوطين او الفاصل ييجى او توصل مرحلة معينة .. عشان تقوم جرى تخطف الصلاة ف نص دقيقة وترجع جرى تتفرج على تحليل الشوط الاول ولا تلحق المشهد التانى ف المسلسل ولا تلحق تكمل لعب عشان اصل الكمبيوتر هايخلص ولو مالحقتش تكمل اللعبة دى هايسحبوا منك رخصة اللعب
لا يا بابا . ربنا اكبر من كل ده

قوم صلى .. وصلى بضمير
ماتسلقش بيض
مش هاتخسر حاجة لما تفكر ف معنى الكلام وانت بتقوله
صعب؟
طب بلاش يا سيدى
قوم بس صلى وهى هاتيجى واحدة واحدة
بس ماتجريش
يعنى ماتقولش الله اكبر عشان تبدا الصلاة وبعدها بثانيتين الاقيك بتقول سمع الله لمن حمده


فكرت قبل كدة ف معنى كلمة (سمع الله لمن حمده)؟


------------------------------------


ميديا اليوم :

فيديو رائع للشيخ عبد الباسط عبد الصمد يتلو فيه سورتى الضحى والشرح


-----------
حمل من هنا بجودة عالية 53.7 ميجا

حمل من هنا بجودة فوق المتوسطة 15.5 ميجا RM

حمل من هنا بجودة متوسطة 28.8 ميجا

------------------------------------


لمتابعة برنامج اليوم بالكامل .. تابع من هنا على منتدى عمرو فكرى

رمضان كريم

كل سنة وانتوا طيبين

فرح رخم

اتنين بيتجوزوا .. انت بالنسبة لك الفرح ده رخم جداااا ومش طايقه
بس هما بالنسبة لهم دي ليلة العمر
ليلة العمر ..
يعني ليلة واحدة بس ف العمر .. مابتتكررش تاني

وحتي لو الفرح ده رخم وممل هايفضل ده اهم فرح بالنسبة للاتنين دول من بين كل الافراح اللي حضروها ف حياتهم
اي حاجة انت تعملها ف الفرح مش هاتخسرك حاجة .. هايفضل بالنسبة لك مجرد فرح تاني حضرته
بس بالنسبة لهم هاتفرق كتير اوي .. وهايفضلوا فاكرينها طول حياتهم

حكايات غير مكتملة - 5

صوت الكروان يصحيني
اطرقع ظهري
اتاوب
وافكر ..
اما اشوفلي حد كدة افكر اتغير من ناحيته
اشرب القهوة وانا بفكر يا تري هتخانق مع مين النهاردة
مممم اشوفلي برضه حاجة جديدة ازهق منها كدة بدون مبرر ع الصبح

وجهة نظر

حكاوى غير مكتملة - 4

* وسبتها ليه دى كمان؟
- اصلها طلعت بتخش ع النت
* لاااا .. ياللكارثة ! بتخش ع النت؟ وقدرت تخدعك الفترة دي كلها؟


مش فاهم .. بتخش مواقع اباحية يعني مثلا؟
- لا يا اخي بطل قلة ادب
* امال ايه يعني؟
- يابني بقولك بتخش نت !
* ايوة يعني ايه مش فاهم .. بتقعد طول اليوم تعمل شات مع ولاد و ف الاخر تاخد منهم مواعيد ويخرجوا يقابلوا بعض يعني ولا ايه؟
- يا عم لا .. دي مش بتعمل شات اصلا
* مش بتعمل شات اصلا؟ امال فين المشكلة؟
- بتخش منتديات بقي وبتاع
* منتديات وبتااااع ااااه .. لا معاك حق
- شفت؟
* طب بص انا هقوم دلوقتي عشان في حد بيناديلي ولما ارجع هبعتلك nudge
- اوك ماشي
* يلا سلام .. brb

حكايات غير مكتملة - 3

- سبتها ليه دى كمان؟
* اصلها طلعت اخت
- مش فاهم
* مش فاهم ايه؟ بقولك طلعت اخت !
- ايوة اخت ازاي يعني؟ اختك ف الرضاعة؟
* لا يا عبقري ! اخت اخت .. يعني اخوان مسلمين
- اخت يعني اخوان مسلمين؟
* يعني هي اللي اخوان مسلمين تبقي اخت واللي مش اخوان ماتبقاش اخت؟ امال تبقي ايه؟ اخ مثلا؟

آمال وآلام هبه

زوروا آمال وآلام هبه .. قصة كفاح

نص سنة

يارب النص سنة اللى جاى يبقى احسن من اللى فات

يارب

حكايات غير مكتملة - 2

ندهتلى .. مارديتش عليا
قالتلى يابنى يا حبيبى رد عليا
قلتلها انا مش حبيب حد !!
قالتلى طب يابنى رد عليا
قلتلها ومش ابن حد
قالتلى طب يا انت رد عليا
قلتلها .. ماتكلمينيش تانى

مصر 0-3 امريكا

والله وعملوها الرجالة .. ورفعوا راس امريكا بلدنا

مصر 1-0 ايطاليا

يا لهوى !

نص مليون زائر !!!!

فى نص ديسمبر اللى فات (تحديدا فى 17 ديسمبر 2008) عملت تدوينة بعنوان مية الف !
قلت فيها ان عدد زوار مدونتى من ساعة ما ركبت العداد وصل 100 الف زائر
وقلت انها ضربت 3 ارقام قياسية .. 52 زائر فى نفس اللحظة .. 165 زيارة فى ربع ساعة .. 6367 زيارة فى اقل من يوم (22 ساعة)


بعدها باقل من شهرين (تحديدا فى 13 فبراير 2009) عملت تدوينة 200963
احتفالا ب100 الف زائر اضافيين

عدد الزوار دلوقتى يا جماعة وصل 500 الف زائر بالصلاة ع النبى

كملوا ال300 الف فى 8 ابريل تقريبا (يعنى كمان 100 الف زائر اضافيين فى اقل من شهرين)

وبعدين كملوا 400 الف فى 23 مايو تقريبا (يعنى كمان 100 الف زائر اضافيين فى حوالى شهر ونصف)

واخيرا كملوا 500 الف زائر النهاردة !
يعنى 100 الف زائر اضافيين فى اقل من 3 اسابيع !

واجمالا
400 الف زائر فى اقل من 6 اشهر
يعنى رقميا حوالى 2000-2500 زائر يوميا

انا من شوية من حوالى ساعة كنت بتفرج ع المدونة لقيت الرقم لسة بعيد
ببص دلوقتى ساعة لما بدات اكتب البوست ده لقيتهم 500 الف وكمان 1400

وحاااالا بعد ما خلصت كتابة البوست ببص لقيتهم بقوا 501926 !
يعنى على ما خلصت كتابة البوست جه اكتر من 500 زائر ومشيوا !
(خلصت الكتابة ونشرت البوست ببص لقيتهم زادوا 200 كمان)
تعديل : 2400 زيارة فى ظرف ساعتين تقريبا من نشر البوست
تعديل :
37 الف زيارة اضافية فى خلال اسبوع من نشر البوست

يا شباب اكرر
دى مدونة عمرو (فكرى)
وليس دياب او اديب او خالد

حسبى الله ونعم الوكيل

حسبى الله ونعم الوكيل فيك يا حسن يا شحاتة
حسبى الله ونعم الوكيل فيكوا يا لعيبة ورقية
الحضرى انتهى .. وائل جمعة وهانى حزين والباشا الكبير اوى احمد سعيد كوكا والكابتن المتفرج محمد ابو تليفزيون والرائع محمد طرزان والقديييييييييييييييير عمرو غبى والفنان ابو كبارى جنان احمد قفلى وسيد معوق والمتميز حزنى عبد ربه .. والكتكوت الشرس الكابتن احمد ابو شارة
احمد عيد عبد الملك بيلعب كويس ماشى بس على قده .. بيلعب بروح حرس الحدود
احمد رؤوف بقى مالمسهاش اصلا .. نجم نجم يا جماعة والمفروض كل ماتش يلعب بدل ميدو

ابوتريكة وزيدان .. اللعيب اللى يجيله الكورة يقعد واقف مستنى الفرج ولازم يرقص اللعيبة والمدرجات والحكم ويشوطها ف الاوت ف الاخر !

ناس كتير اتسببت ف الجونين الاول والتانى
ابو تريكة برضه اللى سايب الراجل يجرى بعرض الملعب قدامه وهو بيتفرج عليه .. شوقى اللى بيجرى معاه بودى جارد .. اوكا اللى بيتفرج ووائل اللى فاتح رجليه عشان الكورة تعدى منهم .. هانى سعيد اللى المفترض ليبرو واللى ماكانش موجود يغطى
و الجون التانى اللى حسنى واوكا وهانى سعيد نايمين ف الارض وسايبين لعيبة الجزاير تطلع فوق . والحضرى اللى كان بيتفرج ع الكورة وهى بتخش

لعيبتنا بيباصوا لبعض بالعرض ولورا وماحدش بيباصى لقدام !

مين اوكا واحمد عيد عبد الملك واحمد رؤوف دول عشان يمثلوا مصر فى الجزاير !!!!!!!!!!!!!!!!!!!!!!!!!!!


ميدو فين ! .. مين احمد رؤوف ده !!!!!!!!!!!!!!!!!!
حسبى الله ونعم الوكيل فيك يا حسن شحاتة


ابو تريكة وزيدان وعمرو زكى التلاتة المفروض يريحوا شوية بقى يبطلوا لعب دولى شوية كدة لحد ما يلموا نفسهم شوية
حسن شحاتة العالمة باشا يلاعب ناس على قدر المسئولية ولعيبة مش باردة ويكون عندها دم !

نكسب زامبيا ف زامبيا ورواندا رايح جاى ونستنى الجزاير ف مصر وندعى كتير !


حسبى الله ونعم الوكيل
حرقتوا دم الواحد اكتر ما هو محروق !

بلد دلاديل

انا بصراحة مسكت نفسى ومارضيتش اعلق ع الهبل اللى حصل عشان لو كنت علقت ساعتها كان ممكن اغلط جامد وكانت هاتبقى اخر تدوينة تقروها لعمرو فكرى
فى الحقيقة لحد دلوقتى برضه مش عارف اصيغ الكلام بصورة مهذبة ازاى ! بس انا عايز اتكلم عن الهبل والتخلف العقلى اللى حصل ساعة ما حفيد حسنى مبارك مات

طفل .. ومات .. وخلاص !
نقراله الفاتحة .. وندعوله بالرحمة .. وخلاص !
لسة القلم ما كتبلوش ذنوب .. يمكن ربنا عمل كدة عشان حاجة مانعرفهاش .. بس ده اضح انه خير لعيلة مبارك !!!!

اللى زعل زعل .. واللى اتصدم اتصدم .. واللى فرح شمت ... خلاص خلصنا !
انما يعلن الحداد فى مصر بسبب وفاة طفل !!!! ده انا ما اقبلوش !
ايا كان الطفل ده مين

انما افتح التليفزيون الاقى القنوات المحلية مارشات عسكرية وقران !
وافتح الدش الاقى كلهم دلاديل جايبين قران !
ده يبقى اسمه عبط

دريم ودريم 2 وابتهالات واغانى دينية .. المحور وروتانا والحياة وحتى ميلودى وما شابهها !
OTV !!!!
حتى نجيب ساويرس مشغل قران !

كله مشغل قران !
طب فين المارشات العسكرية؟

ومرسى ابن المعلم الزناتى مات يا رجاااااالة !

PATHETIC !

شئ يخلى اللى الموضوع بالنسبة له .. يشمت !
يفتح باب الشماتة والقرف لكل اللى قالوا ده طفل ومالوش علاقه بجده وعمه يعنى
يخليه يقول (احسن) ويطلع لسانه ويقول خلى جده يجرب



انا غير راضى عن الهبل اللى حصل ف القنوات الفضائية والارضية ده !
يعنى ايه يعنى طفل مات؟
ما فى عشرات الالاف من المصريين ماتوا ف العبارة اللى غرقت ومساكن الدويقة اللى وقعت وف اقسام الشرطة م التعذيب وبالمحاصيل المسرطنة والفراخ ام انفلونزا والسمك المسمم والبقر المجنون والقرف المعتوه وغيره من الامراض الرائعة اللى ماشفناهاش ف عهد اى حكومة تانية

اه صحيح

احنا اصلا ما شفناش اى حكومة تانية


صحيح
كلب الريس مات .. راح يعزى فيه رؤساء
الريس نفسه مات .. ماراحلوش ولا كلب

21 مايو

النهاردة 21 مايو 2009
زى النهاردة من سنة صحيت الفجر على صويت والدتى
كان والدى بيموت
اقرا : 7 ساعات مع بابا

ابويا كان فى حضنى وهو بيرجع وبيطلع دم من بقه .. عملناله رسم قلب واشعة مقطعية ورنين مغناطيسى
الكلام ده حصل على حوالى اربعة الا ربع الفجر تقريبا .. وخرجنا من المستشفى على حداشر الا ربع الصبح تقريبا

وبعدها اتحجز فى المستشفى 4 ايام تقريبا وكنت بايت معاه امبارح وادوية وفحوصات وتحاليل واشعة وموال ما يعلم بيه الا ربنا واخيرا رجع البيت
اقرا : الحمد لله


---------

بعد اسبوع .. نتيجة الفحوصات الاولية كان فى اشتباه فى ورم خبيث !
بس الحمد لله طلع مفيش حاجة

كل اللى حصله ده كان بسبب ارتفاع الضغط عليه بشده ادى الى ان شعيرة دموية فى المخ انفجرت وجابت دم فى مخه خلاه مش مستوعب حاجة ولا مدرك للى بيحصل وبقى يخرف ويتكلم زى العيال الصغيرين او المتخلفين عقليا ودلوقتى هو مش فاكر اى حاجة نهائيا من ساعة ما نام قبل الموضوع ده كله لحد ما فاق فى المستشفى .. مع انى فى العربية واحنا موديينه المستشفى وبعد ما فاق شوية سالته انت اول حاجة فاكرها ايه قالى لما جاله دكتور فى البيت اداله حقنه فاليوم .. دلوقتى هو حتى مش فاكر الحوار ده .. مع انه كان مدرك ساعتها .. وانا حتى ساعتها عشان اتاكد انه بقى مدرك خلاص سالته 5% من 1000 بكام؟
قالى 1000 فى 5 على 100 صفرين مع الصفرين وعشرة فى خمسة ب50 (انا اصلى وارث حب الرياضة منه)


واحنا ف المستشفى فى اتنين معرفة اتصلوا ببابا من المطار عشان يسلموا عليه قبل ما يسافروا عشان كانوا رايحين يعملوا عمرة
بعدها بيومين الراجل كلم بابا من قدام الكعبة بيقوله اول دعوة دعيتها اول ما شفت الكعبة كانت ليك
بابا قفل معاه السكة والراجل ساعتها كان بيعمل عمرة وواقف جنب الكعبة وهو بيكلمه


لما الموقف ده حصل انا كنت بشيله وبعدل جسمه ماما راحت خبطت على سميرة جارتنا الامانية جابتها هى وجوزها يساعدونا
ماما قالتلى بعد ما الموضوع كله خلص ان سميرة لما شافتنى يومها قالت لماما : wow , he saved his dad's life



الموضوع على منتداى الجديد


الاحداث على منتداى القديم

عنق زجاجة

مرحلة فاصلة

هذا انا

هذا انا .. ما اقدر اكون غيرى انا

انا الربيع .. انا الخريف
امشى بخيالى مع كل طيف

ارسم حروفى .. دمع القلوب
ضاعت حياتى بين الدروب

هذا انا .. كلى انا .. ما اقدر اكون غيرى انا

رجلى اتكسرت !

هاحكيلكوا حاجة حصلت معايا امبارح

امبارح وانا نازل السلم وقعت ورجلى اتكسرت .. الكسر كان خارجى والعضم طلع برة اللحم بشكل يععععع .. ولما رحنا المستشفى مالقوش شاش يجبسولى بيه رجلى فودونى مستشفى تانية .. قالولى لازم يكون معايا بطاقة .. طب انا رجلى مكسورة هافتكر قبل ما اروح اجبس رجلى انى اطلع اجيب البطاقة قبل ما اروح المستشفى .. بس اطلع ازاى اصلا وانا رجلى مكسورة؟؟

المهم ما رضيوش من غير بطاقة فودونى مستشفى تالتة ! طلبوا الف جنيه تحت الحساب .. يا نعم؟
ماما راحت باعت سلسلة كانت لابساها عشان ماكانش معانا سيولة .. وجابت فلوس حطتها ف المستشفى .. ولما دخلت الاوضة عشان يجبسلى رجلى لقيتهم بيقولوا الدكتور بيتغدى وجاى !
المهم الدكتور اتغدى الحمد لله فى ساعة الا ربع .. واستناه ييجى مش عاوز .. خير يا اخواننا؟ بيتفرج على ستاد دريم مع خالد الغندور !!!!!!

ماما راحت اتخانقت معاهم فقالولها هايجيبوا دكتور تانى بس هو مشغول دلوقتى . خير؟ بيلعب فورة شطرنج مع عيان !
ما رضيتش اشتم واستنينا الدكتور يخلص .. ايهما اولا .. اما ستاد دريم يخلص او فورة الشطرنج .. ايهما يخلص الاول

تلت ساعة كمان ولقينا واحد جاى .. جبسلى رجلى بشكل غريب شوية .. وبعد ما مشى . اكتشفنا ان ده تمرجى مش دكتور !!!!
رحنا نتخانق ووانا قايم لقيت رجلى وجعتنى اكتر

خرجنا م المستشفى عشان نروح القسم عشان نعمل محضر لقيناهم خدونا على اوضة التعذيب

.. طلعنا داخلين الاوضة اللى جنبها مش الاوضة نفسعها
بس واحنا جوة كنا بنسمع اصوات غريبة ! انا اللى قتلته انا ابن كلب انا اللى فجرت برج التجارة انا اللى عملت اى حاجة بس كفاااااية .. وصوت بيرد عليه: وكمان بتقول كفاية ؟

المهم عملنا محضر وشفنا جوة بلاوى .. خرجنا م القسم وواحنا بنعدى الشارع عربية خبطتنا ومتنا



الجدير بالذكر ان كل اللى فات ده كان كذبة ابريل

---------------------

من ارشيف المدونة

طشششش

مين اللى قال ان رش المية عداوة؟ رش الميا طراوة

كبيرة ووحشة وتخينة

يا بت يا وحشة - انتى يا بت يا تخينة .. يا ولية يا عجوزة !


ايه الهبل ده؟


هو ليه الناس بيبصوا للست على انها مهمتها ف الحياة تكون جميلة ورشيقة ودورها فى الحياة منحصر فى انها تقف عند الحاجة وعشرين؟
شئ غريب جدا


ليه اللى مش جميلة تقعد تحط مساحيق تجميل وبودرة ومسكرة وفسكرة وحاجات غريبة الشكل؟ .. واللى سمرا شوية تقعد تحط ابيض عشان تبيض شوية !
ليه البنات بيتكسفوا دايما يقولوا وزنهم؟
ليه ما بيحبوش يقولوا الوزن الحقيقى كذا حتى لو تخان شوية او لو الوزن زيادة؟
طب ليه الستات على طول ما بيحبوش يقولوا سنهم !!!!!!!
ايه المانع ان الست تقول عندى تلاتين عندى خمسة وتلاتين عندى خمسين سنة !!!!
هو الكبر ف السن عيب ولا حاجة؟؟؟؟


ايه المانع ان الواحدة تبقى وحشة او شعرها اكرت او تخينة ؟
مش فاهم بجد
ماهو زى ما خلق الجميلة خلق الوحشة .. وزى ما خلق الرفيعة خلق التخينة
ايه المشكلة فى كون انسانة وحشة او تخينة؟
ربنا ما خلقش حد فينا كامل
فاللى حلوة اكيد من جوة مش هاتبقى بالحلاوة دى .. واللى وحشة اكيد مش هاتبقى من جوة بالوحاشة دى


بل ده الانقح
ان مع الزمن .. العمر بيمر والمنظر الخارجى بيتغير للاوحش
سواء بقى كنتى حلوة او كنتى وحشة كدة كدة شلك هايتغير للاكثر كرمشة !
بس جوة مش هايتغير ابدا مهما عدت سنين


يبقى انهى احسن؟
الحلوة من برة ولا الحلوة من جوة؟


ايه المانع تكون البنت وحشة او سودا او تخينة وفشلة بس من جوة انسانة نقية جدا وجميلة جدا وطيبة جدا وحنينة وبتخاف ربنا !
دى احسن؟ ولا الحلوة اللى عودها عود فرنسى ووسطها وسط كمانجة .. مزة يعنى؟ ... بس من جوة تنكة ورخمة وانانية وغبية ومش بتخاف ربنا


ليه الست ما تقولش انا عندى كذا عاااادى جدا؟
بتصغر نفسها على طول ليه؟
هل هو عيب يعنى انها تكبر؟
بل بالعكس .. ده الواحدة لما تكبر ده بيكون افضل لانها بتكون اكتسبت خبرة فى الحياة اكبر واكيد تعاملاتها مع الاخرين بقت انضج


يا وحشة ويا تخينة .. مفيش داعى للخجل !
يا وحشة ويا تخينة .. ربنا عاوزكوا كدة .. قولوله شكرا يا رب انك خليتنا احسن كتير من غيرنا اللى من برة مزز ومن جوة قرف




اللى برة هايروح .. واللى جوة هايفضل للابد

الضقطورة كملت 24 سنة

د. شيماء محمد سمير

احد اخطر العقليات اللى قابلتها على النت

واحد القلائل اللى بحب اقرالهم (ضمن المجموعة اللى تضم زينب سعد ودينا فهمى واشرف توفيق وغيرهم)

النهاردة كملت 24 سنة



كل سنة وانتى طيبة وعقبال 25 سنة

فاروق جويدة - فارحل وعارك فى يديك

كل الذي أخفيته يبدو عليك
فاخلع ثيابك وارتحل
اعتدت أن تمضي أمام الناس
دوما عاريا
فارحل وعارك في يديك

لا تنتظر طفلا يتيما بابتسامته البريئة
أن يقبل وجنتيك
لا تنتظر عصفورة بيضاء
تغفو في ثيابك
ربما سكنت إليك

لا تنتظر أما تطاردها دموع الراحلين
لعلها تبكي عليك
لا تنتظر صفحا جميلا
فالدماء السود مازالت تلوث راحتيك

وعلي يديك دماء شعب آمن
مهما توارت لن يفارق مقلتيك
كل الصغار الضائعين
علي بحار الدم في بغداد صاروا‏..‏

وشم عار في جبينك
كلما أخفيته يبدو عليك
كل الشواهد فوق غزة والجليل
الآن تحمل سخطها الدامي

وتلعن والديك
ماذا تبقي من حشود الموت
في بغداد‏..‏ قل لي
لم يعد شيء لديك

هذي نهايتك الحزينة
بين أطلال الخرائب
والدمار يلف غزة
والليالي السود‏..‏ شاهدة عليك
فارحل وعارك في يديك
الآن ترحل غير مأسوف عليك‏..‏


ـــــــــــــــــــــــــــــــــــــــــــــــــــــــــــــــــــــــــــ

جزء من قصيدة ( فارحل وعارك في يديك) للشاعر فاروق جويدة مخاطبا الرئيس الامريكى السابق جورج بوش


اضغط هنا لقراءة نص القصيدة بالكامل

فاروق جويدة - ويموت فينا الانسان

وتركت رأسي فوق صدرك
ثم تاه العمر مني.. في الزحام
فرجعت كالطفل الصغير..
يكابد الآلام في زمن الفطام
و الليل يفلح بالصقيع رؤوسنا
ويبعثر الكلمات منا.. في الظلام

و تلعثمت شفتاك يا أمي.. وخاصمها.. الكلام
ورأيت صوتك يدخل الأعماق يسري.. في شجن
والدمع يجرح مقلتيك على بقايا.. من زمن
قد كان آخر ما سمعت مع الوداع:
الله يا ولدي يبارك خطوتك
الله يا ولدي معك

* * *
وتعانقت أصواتنا بين الدموع
والشمس تجمع في المغيب ضياءها بين الربوع..
والناس حولي يسألون جراحهم
فمتى يكون لنا اللقاء؟
وتردد الأنفاس شيئا من دعاء
ونداء صوتك بين الأعماق يهز الأرض.. يصعد للسماء:
الله يا ولدي معك..
ومضيت يا أمي غريبا في الحياة
كم ظل يجذبني الحنين إليك في وقت الصلاة..
كنا نصليها معا

* * *

أماه..
قد كان أول ما عرفت من الحياة
أن أمنح الناس السلام
لكنني أصبحت يا أمي هنا
وحدي غريبا.. في الزحام..
لا شيء يعرفني ككل الناس يقتلنا الظلام
فالناس لا تدري هنا معنى السلام
يمشون في صمت كأن الأرض ضاقت بالبشر..
والدرب يا أمي.. مليء بالحفر..
وكبرت يا أمي.. وعانقت المنى
وعرفت بعد كل ألوان الهوى..
وتحطمت نبضات قلبي ذات يوم عندما مات الهوى..
ورأيت أن الحب يقتل بعضه
فنظل نعشق.. ثم نحزن.. ثم ننسى ما مضى
و نعود نعشق مثلما كنا ليسحقنا.. الجوى
لكن حبك ظل في قلبي كيانا.. لا يرى
قد ظل في الأعماق يسري في دمي
وأحس نبض عروقه في أعظمي

أماه..
ما عدت أدري كيف ضاع الدرب مني
ما أثقل الأحزان في عمري و ما أشقى التمني..
فالحب يا أمي هنا كأس.. وغانية.. وقصر
الحب يا أمي هنا حفل.. وراقصة.. ومهر
من يا ترى في الدرب يدرك
أن في الحب العطاء
الحب أن تجد الطيور الدفء في حضن.. المساء
الحب أن تحد النجوم الأمن في قلب السماء
الحب أن نحيا و نعشق ما نشاء..

* * *
أماه.. يا أماه
ما أحوج القلب الحزين لدعوة
كم كانت الدعوات تمنحني الأمان
قد صرت يا أمي هنا
رجلا كبيرا ذا مكان
وعرفت يا أمي كبار القوم والسلطان..
لكنني.. ما عدت أشعر أنني إنسان!!



ـــــــــــــــــــــــــــــــــــ


قصيدة كتبها فاروق جويدة فى رثاء امه

اهداء الى عم صابر

يوم الجمعة اللى فاتت - 13 فبراير 2009 - جانى عم صابر ابو محمد ومروة اللى بمرنهم فى النادى وقالى انهم قعدوا يتصفحوا المدونة بتاعتى ليلتها بالليل

وطلب منى شوية حاجات
اشعار لفاروق جويدة وعبد الرحمن الابنودى وغيرهم


هحطهم ان شاء الله

اللى انا كاتبه ده دلوقتى عشان اقول بس انى لسة فاكر ومش ناسى .. بس هستنى لما اعمل حاجة حلوة

200963

ببص دلوقتى لقيت المدونة عدت ال200 الف زيارة وانا ماخدتش بالى

انا كنت لسة عامل فرح من اقل من شهرين عشان وصلوا 100 الف

لحقوا بقوا 200 الف امتى؟

اسبوع قتل

بنى 1

النهاردة 30 يناير2009 كان يوم امتحان الترقى للاحزمة فى نادى بدر فى الكاراتيه

فريقى اللى بدأت معاه من صيف 2007 .. وصل اخيرا للحزام البنى 1
الدفعة كدة وصلت

من بين حوالى 250 لاعب بدأنا بيهم
7 بس اللى وصلوا للبنى 1 .. هدير ومنة الله ويارا وعنان ومهاب ومصطفى وسها
باقى اللعيبة اللى امتحنوا معاهم كنت بدات امرنهم من بعدها بفترة

كدة دول هايقعدوا ف بيوتهم لحد الصيف .. ويمكن نصهم او اكتر هايقعد للابد ومش هايكمل .. باعتبار انه عمل اللى هو عاوزه خلاص

نفس الدايرة
سنة ونص مع فريق من الابيض للبنى .. ويبطلوا خلاص ويتبقى منهم اتنين تلاتة بس
وابدا مع ناس تانيين .. والخ

الحمد لله ^_^

فى عرض الوزير

ممكن ابقى احكى بعدين
س انا عشت يومين صعبين
الاربعاء والخميس 21 و 22 يناير2009
بذلت مجهود صعب
نمت بعده 11 ساعة متتالية .. وكنت هانام اكتر لولا صلاة الجمعة
بس الحمد لله الواحد أدى اللى عليه فعلا

البوم صور على الفيس بوك

حدث فى 2008

• 10 يناير - كنت مع وزير الدفاع

• 24 فبراير - عملت منتدى عمرو فكرى الاول
  

• 12 ابريل - سبت فريق الكاتا بتاعى بعد ما عملته من سنة وووصلتهم (ساعتها) للحزام الاخضر .. (دلوقتى وصلوا للبنى , وطبعا الفريق اتفشكل وتبقى منهم 8 بس من اصل اكتر من 200 لاعب )
  

• 13 ابريل - بعد حوالى شهر ونص مكسل انزل اقبض , نزلت قبضت أجر شهر فبراير من المقاولين العرب
  

• 28 ابريل - جبت شاشة جديدة 22 بوصة بدل ال14 القديمة اللى قعدت معايا 13 سنة تقريبا

• 20 مايو - بعد بداية امتحانات اخر السنة (سنة رابعة , اخر سنة ليا ف الكلية) عملت الكارنيه اللى المفروض اعمله من اول السنة

• 21 مايو - 7 ساعات مع بابا فى المستشفى

• 3 يونيو - اخر امتحان فى تاريخى , خلصت يومها اخر امتحان فى البكالريوس
  

• 7 يونيو - اشتغلت مدرب كاراتيه بمدرسة منارة الايمان الخاصة بمدينة نصر لمدة شهر

• 11 يونيو - جيت جهاز كمبيوتر تانى ما عدا الهارد
  

• 19 يونيو - الهارد ال160 اللى بجمع فى الحاجات اللى عليه بقالى اكتر من 7 سنين , اتخبط وكل اللى عليه طار

• 14 يوليو - كنت المسئول الاول عن بعثة من 45 فرد باسم نادى بدر لافتتاح نادى تابع للقوات المسلحة بمصر القديمة , واداء عروض للكاراتيه وتنس الطاولة والجيمانزيوم وغيرها

• 17 يوليو - نتيجتى ظهرت , نجحت ب2 جيد جدا و4 جيد , واتخرجت رسميا فى كلية التجارة جامعة عين شمس
  

• 25 يوليو - ضرس العقل شرّف

• 2 اغسطس - شقتنا تتسرق للمرة الثانية , بس المرة دى وانا جواها

• 5 اغسطس - ماما عملت حادثة

• 8 اغسطس - مدونتى أتمت سنة بالتمام والكمال
  

• 9 اغسطس - بدأت التربية العسكرية ! ولحد 21 اغسطس
  

• 3 سبتمبر - جبت هارد 360 جيجا

• 4 سبتمبر - بعد حروب طويلة خضتها , كونت اول فريق كاتا بنادى بدر

• 22 سبتمبر - كدت اموت مكهربا

• 29 سبتمبر - عملت راديو على الانترنت

• 24 اكتوبر - عملت نضارة جديدة
  

• 5 نوفمبر - للمرة التانية فى خلال سنة , اشتغلت مدخل بيانات فى ادارة الحاسب الالى بالمقاولين العرب لمدة شهر
  

• 17 ديسمبر - مدونتى وصلت للزيارة ال100 الف

• 31 ديسمبر - عملت منتدى رسمى .. عمرو فكرى دوت كوم
  

22 كيلو مشمش يا عم السفاح

محمد جمال كمل 22 سنة يامنز

2008

رحلت 2008 .. أصعب سنة فى حياتى
----------------------------------------------

بقالى فترة طويلة (شهور يمكن) عامل حسابى انى هاتكلم عن 2008 واوصفها باسوا سنة فى حياتى .. لحد امبارح بالليل 30 ديسمبر 2008 .. لما فكرت شوية .. لقيت فى حاجات حلوة .. وغيرت المقدمة من اسوا سنة الى اصعب سنة ..
شوية لما فكرت .. لقيت حاجات كتير حلوة حصلتلى فى 2008 عكس ما كنت متخيل
فى البوست ده ان شاء الله هحاول احصى اللى حصلى فى 2008 ... خدوا بالكوا التدوينة دى مليانة لينكات

البس حزام الامان .. ويللللللللللا بينااااااا

---------------

عن صعوبة 2008
أذكر اهم 3 مواقف

1) بابا على حافة الموت
21-5-2008
لما بابا حصلتله مشكلة فى المخ اثناء امتحاناتى ورحنا بيه المستشفى وبات هناك اسبوع .. وكان فى اشتباه فى ورم خبيث شوية واشتباه فى ارتجاج فى المخ شوية .. بس الحمد لله طلعت ولا حاجة


2) ماما على حافة الموت
5-8-2008
معديين جسر السويس وماما كالعادة خايفة من العربيات .. والعربية تسيبنا احنا الاربعة اللى معديين معاها وتخبطها هى .. ورحنا بيها المستشفى وخلص الموضوع على بعض الرضوض الخفيفة


3) انا نفسى على حافة الموت
2-8-2008
نايم فى بيتنا واهلى فى اسكندرية , اصحى على البوليس بيقومونى م النوم .. ارجع انام تانى واقول انى اكيد بحلم , بس الاقيهم بيقومونى فعلا واكتشف ان فى حرامى دخل الشقة سرقها وانا وجوة وخرج وانا نايم

كما كدت اموت مكهربا فى موقف اخر

موقف تانى صعب .. لما افتكرت انى سقطت وعشت ساعات وانا ساقط .. بس اكتشف فى الاخر انى دخلت رقم جلوس مختلف :D

وصعوبة الفترة نفسها اثناء الامتحانات وانا مقبل على ما قد تكون اخر امتحانات فى حياتى الدراسية واما انى اتخرج او اعيد السنة


فى الكاراتيه .. الفريق اللى بعمله بقالى سنة .. ضاع بسبب (الكوميتيه) وراحوا يتدربوا مع مدرب تانى بعد حوالى سنة وشوية تمرين معايا على (الكاتا)


---------------------

بس برضه حصلت حاجات كويسة كتير

* اولاااا اتخرجت
بتقدير ما جابوش حد قبلى
مقبول جدا .. 599.5 درجة !

* عملت اول فريق كاتا فى تاريخ نادى بدر .. بعد 4 مواسم من غير فريق كاتا فى النادى
وخدت اول شهادة تقدير لمدرب فريق كاتا بالنادى فى احتفالات النادى السنوية الصيف اللى فات

* عملت منتدى huh .. وراديو huh

* وانتهى العام بانى عملت منتدى رسمى غير مجانى وباسمى انا www.amrfekry.com

* مدونتى كملت سنة فى نفس اليوم اللى كملت فيه 100 تدوينة

* مدونتى حطمت ارقام قياسية كتير .. وصلت لفوق ال120 الف زائر .. و117 زائر اونلاين فى نفس اللحظة !

* اما بقى عن اهم الاحداث اللى حصلتلى فى 2007 ..فدى ليها تدوينة تانية ان شاء الله