2016-03-15

بابا


أكتر حد بحبه ف الدنيا دي كلها سابني

ماحدش تاني هايفهمني

اشتقت لكل حاجة فيك
لزعيقك وحنيتك

الوحيد ف الدنيا اللي ممكن أسلمله دماغي
وأعمل بنصيحته وأنا مغمض
وأتمنه وأحب إني آخد رأيه

الله يرحمك يا أغلى الناس

كفاية كدة عشان ماليش مزاج أعيط دلوقتي الصراحة

2015-12-16

عمرو ٢٠١٥

حاجات كتير اتغيرت في اللي بيكتب الكلام ده عن ما كان عليه لما كان بيكتب من كام سنة .. لحد من سنتين فاتوا بس مثلا
بقيت شخص مختلف .. مش للأحسن أو للأسوأ .. بس بقيت مختلف
أو يمكن مابقيتش مختلف ولا حاجة وأنا بيتهيألي

بس الأكيد إن حاجات كتير اتغيرت

حياتي اختلفت تماما عن ما كانت عليه من سنتين
بس المرة دي الأكيد إنها اختلفت للأحسن
اهتماماتي اختلفت وطريقة تفكيري اختلفت

بقيت أحسن من قبل كدة
أقوى من قبل كدة
أنضج من قبل كدة
بقيت عارف كويس انا عايز ايه أكتر مما كنت متخيل إني عارف قبل كدة
طموح ما قبل المعركة مختلف عن طموحك وانت كل يوم بتكسب جولة واخسر التانية وبتتقدم ف حياتك وبتحقق النجاح ورا التاني
الحمد لله على كل شئ

2015-04-17

لول -_-

كنت هاكتب حتة بوست دلوقتي .. بس غيرت رأيي
دمتم بود .. أو ماتدوموش عادي يعني

2014-05-09

تبات ونبات (1)



ريم وعمر اتجوزا عن حب.

كان كل اللي بيشوفوهم أيام الخطوبة بيقول انهم استحالة يكملوا مع بعض من كتر المشاكل والخلافات اللي كانت بينهم.
اصحابهم كانوا دايما بيحسدوهم على حبهم لبعض, بس كانوا بيستغربوا من جفائهم مع بعض.
الا انهم اتحدوا العالم واتجوزوا.
خمس سنين كانت كافية بالنسبة لهم عشان يتجوزوا وهما عارفين بعض .. او متخيلين ده. هما نفسهم ما يقدروش يحددوا هل هما فعلا عارفين بعض ولا فاكرين انهم عارفين بعض.

__________________

بعد الجواز كانت مشاكلهم كتير اوي .. وتافهة أوي.
أتفه موقف ممكن يحصل بيعمل مشكلة بينهم.
كتير قالوا ان ده سببوا انهم اختاروا بعض بالقلب مش بالعقل, وان اللي اوله قلب ماينفعش يبقى اخره عقل .. وطبيعي المشاكل اللي تحصل بينهم ومش ممكن تتحل بالعقل لأن العقل ماكانش هو المرجع الأساسي لعلاقتهم ببعض.
فكانت المشاكل بيتردم فوقيها ف الاخر لما يحنوا لبعض.

بس كانوا بيحبوا بعض.

عمر كان بيرجع من الشغل تعبان يلاقي ريم عاملاله أحلى أكل ومروقة البيت على سنجة عشرة رغم انها راجعة من برة تعبانة هي كمان م الشغل.
كانت بتحاول ماتخليش الشغل يأثر على البيت حتى لو كان بيأثر فعلا.

__________________

مرة عمر خلص أكل وريم دخلت تقف ف المطبخ تغسل المواعين واتأخرت عليه .. عمر اتضايق عشان كان مستني ريم تقعد معاه.
ريم رجعت لقته ممدد ع الكنبة وبيتفرج ع التليفزيون ومش مركز معاها .. بس هو كان متضايق ومستنيها تيجي م المطبخ.
ريم قالت لعمر "في مكان جنبك؟".
عمر قال لريم "لأ".
ريم راحت قالتله "أحسن" وقعدت وراه ع الكرسي.
عمر اتضايق ودور وشه ناحية التليفزيون.
مفيش ثانيتين ولقى المخدة خابطة ف وشه وريم بتقوله "لأ مين يا روح طنط؟".
ونطت مددت جنبه وقالتله: "وسع يلة".
عمر غصب عنه ابتسم ووسع وريم بتقوله "قال مفيش مكان قال", ودفنت راسها ف صدره.


__________________


نصيحة (1): ستات كتير مخهم تقدر تقول انه لاسع .. فلما تلاقيها قلبت مرة واحدة خليك انت العاقل واصبر عليها

نصيحة (2): ماتخليش جوزك يحس ان في حاجة تانية أهم منه .. حتى لو كانت حاجة تافهة وانتي مش متخيلة انه ممكن يغير منها



2013-02-02

كسرة نفس

عارف احساس انك تبقى مخنوق ومفيش حاجة ف الكون تقدر تطلعك م الجو ده؟

عارف احساس انك تبقى متضايق ومفيش حاجة ممكن تفرحك؟

طب عارف احساس انك تبقى مجروح واللى بإيده دواك يدوس ع الجرح؟

عارف احساس شوية الميا الباردين اللى يقدروا يرطبوا على قلبك وتلاقيهم بينزلوا على جرحك يلهلبوه اكتر؟

طب اقولك عارف احساس الحاجة, وتلاقى حاجتك مستعصية عليك؟




عارف احساس انك تكون مكسور؟