Certification

زى النهاردة من سنة بالظبط كان عندى السيرتيفيكيشن بتاعة الشغل
Certification
واللى الحمد لله نجحت فيه واشتغلت
كنت بايت يوميها ف عين شمس

ومن يومها وانا مقيم ف شقة عين شمس لوحدى بصفة دائمة وبزور اهلى او بشوفهم اصلا كل فين وفين ف العبور او لما هما يزورونى

يوم السيرتيفيكيشن سعيد الترينر كان حاططنى اول واحد على اساس كنت احسن واحد يعنى .. امتحنت اول واحد فعلا .. خمس كولات مش فاكر منهم غير العربية للطيران
وفضلت قاعد من ساعة ما امتحنت الساعة عشرة تقريبا ولحد حوالى الساعة اربعة ونص المغرب
مارضيوش يقولولنا النتيجة ولا رضيوا يروحونا
يعنى انا لو كنت امتحنت وروحت ونمتلى اربع ساعات وصحيت ورجعت الشغل كانوا لسة ماخلصوش
الحمد لله نجحت وعديت وقالولنا بكرة عندكوا اجازة وهايكلموكوا يقولولكوا هاتنزلوا تشتغلوا امتى

تانى يوم كان اجازة كلمت حد ف الشغل اعرفه قلتله انى لو ينفع فعايز انزل تيم فلان عشان ده اجمد تيم ولو مانفعش فعايز انزل مع اضعف تيم او اقل تيم عشان ما احسش انى وقعته لو حصل حاجة
قالى لا انت كويس وانا سالت عليك وانت هاتبقى اضافة لاى تيم ومش عارف ايه
ونزلت مع اكتر فريق ماكنتش عايز انزل معاه
اللى هو تيم خفاجة
اقدم تيم ع الفلور وفرصتى انى اظهر فيه او اعمل حاجة هاتبقى قليلة جدا .. ولحد دلوقتى

هو انا فعلا كنت كويس ومع مرور اول شهر قعدت لحد اخر يوم ف شهر 7 وانا مقفل كل السكورز بتاعتى بيرفيكت
بس كنت افضل ابقى فى تيم جديد شوي

خدت تانى يوم اجازة اللى هو 25
ويوم 26 لقيت واحد بيكلمنى العصر الو ايوة يا عمرو انا احمد خفاجة مديرك ف الشغل انت المفروض عندك شغل دلوقتى تعالى!
يا عم خليفة شغل مين انا لسة صاحى .. انا ايه اللى خلانى ارد ع التليفون بس .. طب ماينفعش اجى بكرة؟
لا يا عم تعالى بس دلوقتى ومش مشكلة
وماكانش حد قالى ليلتها بكرة عندك شغل
رحت اشتغلت يوم 26 اول يوم من تلاتة العصر تقريبا وكان المفروض تانى يوم عندى الساعة خمسة الفجر
خفاجة مشى وسابنى من غير ما يقولى انا بريك امتى ولا هاقوم امتى ولا هاخلص شغل امتى وقالى بس انى تانى يوم عندى شغل الساعة خمسة الصبح تقرييا
بعد ما قعدت اربع ساعات ونص او خمس ساعات زهقت وكنت عايز اروح الحمام ولا اعمل اى حاجة فقلت لاى حد قريب منى .. طبعا ماكانش موضوع قليل فلقيت كذا تيم ليدر حواليا بيحاولوا يفهموا ايه القصة .. المهم انهم طلعونى كذا بريك ورا بعض وعملولى شيفت موف عشان اجى تانى يوم من متاخر شوية .. عشرة او حداشر تقريبا
وعدت

حار جاف صيفا دفئ ممطر شتاءا

14-1-2011

برق ورد ومطرة وتلج

كتل تلج كبيرة .. ف مصر!

وعربيات مايحلالهاش الجرى بسرعة الا ف الاوقات دى عشان تستمتع بطرطشة الميا عليك

عادى

قعدت حوالى تلت ساعة ف اسوا جو النهاردة ف الشارع

لما ف الاخر ركبت عربية تنزلنى ف نص الطريق عشان اركب عربية تانية .. الناس فضلوا يبصوا عليا واللى يدينى منديل واللى يقولى مش عارف ايه

لا ولسة الجو بكرة وبعده متوقع يكون اسوأ من كدة

14-1-2011

فى يوم تنحى زين العبدين عن رئاسة تونس

وفى الذكرى ال26 لجواز ابويا وامى

1 + 1 = 2

هى هى

5 + 5 = 10

اقرب الناس مودة

انا كنت عايز اكتب ف الموضوع ده من اول السنة بس قلت أاجل الكتابة شوية لما الموجة تهدى شوية عشان ما يبقاش كلامى منفعل وعشان مابحبش ابان انى بركب الموجة
وبعدين لقيت ان 7-1 هايكون انسب وقت يعنى

انا كمواطن مصرى مستنكر تماما اللى حصل لمواطنين مصريين زيى
وانا ف ثانوى كنا 3 بنتحرك مع بعض طول اليوم
كنا ف المدرسة الصبح مع بعض وف الدروس بالليل مع بعض
كنا ممكن ف يوم واحد نتقابل بدرى ستة ونص نركب مع بعض للمدرسة ونقضى اليوم مع بعض ونركب لحد ما نروح تلاتة ونص مثلا وشوية ونتقابل عشان الدرس او الدرسين تلاتة ف اليوم ده لمدة اربع او خمس ساعات ف اليوم
غير طبعا لو بنتكلم ف التليفون نتفق على حاجة او نسال بعض على حاجة
فوق ال12 ساعة مع بعض
يعنى قعدنا حوالى سنتين مع بعض اكتر ما كنا بنقعد مع اهالينا
انا ومحمد ورومانى
محمد كان متدين وبيحاول يربى دقنه وبيسمع شرايط كاسيت شيوخ وغيره .. كان ملتزم يعنى
ورومانى كان رومانى .. واضح يعنى
وانا مسلم معتدل
دخلت بيت ده ودخلت بيت ده والاتنين دخلوا بيتى
ماكانش فى فرق بيننا .. وكنا اكتر من اخوات
بنفرح لبعض ونزعل عشان بعض
فاكر لما بعد امتحان الالمانى كنت طول الطريق عمال بعيط عشان غلطت ف سؤال اختيار من متعدد ف حاجة عليها نص درجة تقريبا
ولما نزلنا م التاكسى رومانى اللى قعد يقولى معلش وبتاع لحد ما حضنته وفضل حاضنى لحد ما هديت
فاكر مرة ف المدرسة الصبح فى الطابور كان القران بيتقرى ف الاذاعة وفى دوشة ولقيت رومانى بيقول يا اخواااانى اذا قرئ القران فاستموع له وانصتوا
من ده كتير
وده ماكانش ابدا معناه ان رومانى غير فخور بديانته او مش معتز بمسيحيته او انه شايف دينه اقل او ان الاسلام احسن ولا كان ده يقلل منه ابدا , وانما فقط تصرف محترم شايف حاجة غلط

انا ومحمد ورومانى اتفقنا على ان الاحترام صح .. وان الاخلاق اهم من اى شئ
استنكرنا قلة الادب والشتايم ومعاكسة البنات والاهمال وعدم الاخلاص فى الشغل
وحبينا النجاح والايمان والمحاولة
عمرنا ما فكرنا ان انا لازم اكون احسن من رومانى عشان انا مسلم وهو مسيحى ولا انه لازم يكون احسن من محمد عشان يثبت ان المسيحيين شاطرين
انا يمكن كنت خايب شوية وماكنتش بحب المذاكرة .. كنت بلعب كتير وماكنتش بذاكر وف الاخر جبت ف ثانوية 91% وماعرفتش اخش هندسة على 1% تقريبا
بس لما عرفت ان رومانى دخل هندسة فرحتله جدا وانبسطت ان اخيرا حلمه اتحقق وان مجهوده ف الاخر اتكلل بالنجاح

عايز اقول ايه؟
عايز اقول ان اللى حصل ف بداية السنة ده قلة ادب
ولو اللى عمله مسلم فانا بدينه ومكسوف منه
مكسوف ان واحد من ديانتى اتسبب ف ألم وخوف اخواتى المسيحيين اللى عايشين على نفس الارض اللى انا عايش عليها
بيتنفسوا نفس الهوا الملوث اللى انا بتنفسه
وبيشربوا نفس الميا المسممة اللى ناا بشربها
وبياكلوا نفس الاكل البايظ اللى انا باكله
احنا مش اعداء بعض
احنا انشغلنا عن حاجات تانية ببعض
احنا من كتر ما احنا مكبوتين من الهوا والميا والاكل , وقمع الحرية والبطالة والظلم والواسطة وكل اللى فى البلد .. بقينا مضغوطين زيادة عن اللازم
من كتر ما بنشوف اخواتنا - العرب - ف فلسطين او العراق بيحصل فيهم اللى بيحصل فيهم من عدو واحد لينا احنا الاتنين , ومفيش رد عليه ولا حد قادر ياخدلنا حقنا
ومن كتر ما احنا بنشوف كل المشاكل اللى احنا عايشينها ف البلد .. بقينا بنتلكك عشان نطلع شحنة الغضب دى
الاهلوية بيشتموا ف الزمالكاوية والزمالكاوية بيشتموا ف الاهلوية , والمسلمين والمسحيين يتخانقوا , والزمايل ف الشغل يأذوا بعض
ليه ده كله؟
احنا ليه ناسيين ان اى ضرر يمس (الاخر) ضرورى هايمسنا؟
لما الاهلى يبقى كويس والزمالك يبقى كويس منتخب مصر هايبقى كويس
لما الزمايل ف الشغل يساعدوا بعض هاينجحوا كفريق واحد باسم العمل الجماعى
لما المسلمين يحترموا المسيحيين والمسيحيين يحترموا المسلمين مصر هاتتقدم بينا .. بحق وحقيقى مش كلام شعارات ومن اجلك انت وولع شمعة وغنى

انا طول عمرى بشوف مسلمين بيروحوا يشتروا من المسيحيين او يتعاملوا معاهم تجاريا بمبرر انهم عندهم امانة!
ايه اللى حصل جديد؟

يمكن يكون المسيحيين شايفين الاسلام -كديانة - هرطقة , والمسلمين شايفين المسيحيين مش هايخشوا الجنة
بس ف الاول وف الاخر دى حرية شخصية
انا عندى الحرية انى اختار انى اكون مسلم , وانت عندك الحرية انك تختار انك تكون مسيحى
يمكن انا اشوفك مش هاتخش الجنة .. ويمكن انت تشوفنى ضال ومش متبع الدين الحقيقى
بس ف الاخر انا محترمك وانت محترمنى .. وبنحب بعض من قلبنا بجد
لكم دينكم ولى دين
مش هاخلى اختيارك المختلف عنى يخليك تقل ف نظرى او يخلينى اكرهك و(ارفضك)
اعمل اللى انت عاوزه طالما ما اذيتش حد

اللى عمل اللى حصل ف اول السنة ده استفاد ايه؟
هو كدة نصر الاسلام - لو كان مسلم - وقرب لربنا؟
ده شوه صورة الاسلام و(نزع فتيل الفتنة) وضغط على دمل جديد والمصريين مش ناقصين دمامل
والله اعلم بقى مات مجاهد شهيد ولا منتحر كافر
هو كدة نصر الاسلام واعز المسلمين؟
انا عن نفسى غير فخور باللى هو عمله ده
ولو حصل وحد مسيحى رد على اللى حصل ده وفجر عربية قدام جامع او فى وقت صلاة العيد مش هالومه هو ومش هالوم غير اللى خلاه يعمل كدة



- الدين لله والوطن للجميع

- (المجد لله في العلى وعلى الارض السلام وبالناس المسرة)

- (ولتجدن أقربهم مودة للذين آمنوا الذين قالوا إنا نصارى ذلك بأن منهم قسيسين ورهبانا وأنهم لا يستكبرون)

 

انت ماشى فى الشارع .. وقرب منك او هايعدى من جنبك بنتين واضح من شكلهم او م اللى شايلينه انهم رايحين درس او راجعين من درس

وفى قلم وقع او اتنطر من ايد واحدة فيهم ووقع تحتيك

فى الغالب او اللى بيحصل انك بتكبر دماغك وتمشى

بس الصح انك تقف وتوطى تجيب القلم وتديه للبنت وتمشى من غير ما تقولها كلمة

عشان مايصحش تخلى بنت توطى ف الشارع قدام الناس

ومش المفروض تاخد ده مبرر انك تقف تعلق ولا تقول كلمة سخيفة او تحرج البنت او تحسسها انك خدت القلم ده مبرر عشان تكلمها

I wanna be a Father

امبارح وانا راجع البيت حصل معايا حتة موقف
كنت راكب تالت مواصلة (من اصل خمسة) من المترو لحد الجراج اللى هاركب منه رابع مواصلة اللى هاتوصلنى موقف العاشر اركب منه للعبور
فضلت واقف مستنى فترة طويلة لحد ما جه ميكروباص مكمل لاخر الخط اللى المفروض انزل فيه
جاى اطلع لقيت واحد بيقولى خلاص يا كابتن ورا محجوز ومش عارف ايه وفى ستات رحت نازل وبتاع 8 ركبوا ورا
لقيت مفيش مكان فقعدت ف الحتة اللى جنب الباب ف ضهر الكرسى اللى جنب السواق
لقيت الواد اللى قالى كدة قالى تعالى اقعد فى مكان ولقيت فى كرسى فاضى ف الحتة اللى ف نص العربية بالظبط
فقعدت .. وجت قعدتى ف النص على يمينى الواد ده وعلى شمالى ست شايلة عيل وجنبها عيل تانى
الست دى لسة صغيرة .. بنت حاجة وعشرين تقريبا او ممكن اوائل التلاتين
هو انا اصلا بكره اقعد جنب بنات او ستات يعنى ف المواصلات .. فكدة كدة مابصيتش لوش الست ماعرفتش شكلها
بس كنت باصص ع الواد اللى شايلاه فخدت بالى من ايدها يعنى .. من البنات اللى هما لون بشرتهم بيضا اوى مش قمحى كدة
والواد ده بقى واخد بشرتها
هو انا ماكنتش شايف خالص ان فى عيل تانى جنبها على شمالها (اللى هو ابنها الكبير)
اللى كنت مركز معاه الواد الصغير
هى كانت لابسة البتاعة الغريبة الجديدة دى اللى بتلبسه قدامها زى شنطة المدرسة بالعكس وبيبقى الواد مشبوك فيها او قاعد فيها دى عشان تمشى بيه من غير ما تشيله
فهو كان قاعد بالعكس ووشه ليها يعنى
بغض النظر بقى عن انها كل شوية تقعد تبوس فيه ف وشه وف بقه وقورته وبتاع
بس الواد كان باصص على شماله .. اللى هو انا يعنى
كل ما اقعد الاعبه يضحك بشكل لذيذ اوى
الواد بسم الله ما شاء الله كان قمور بغباء
فضلت الاعبه لحد ما نام
قبل ما يتاوب ف الاخر مد ايده ناحيتى كدة زى ما يكون بيمد ايده يعنى بياخد حاجة
المهم ف الاخر راح قافش ف كم السويتر الاصفر اللى كن لابسه
ونام وهو ماسكه
يالهوى
احساسى ساعتها مش ممكن
وانا اصلا قاعد عمال اضحك وعينى مش مفارقة ايد الواد اللى ماسكة ايدى
خمس صوابع نونو نازلين م الجنة وماسكين ف ايدى
ف نص الطريق العربية كلها فضيت ما اتبقاش غيرى انا والست دى وعيالها
المفروض ف الحالات دى انا بقوم وبقعد قدام او ورا ع اليمين
بس ما قمتش عشان اسيب الواد ماسك ايدى
شوية والسواق ركن وقالى معلش يا استاذ هانزل بس ثوانى اعمل حاجة
نزل ادى فلوس كدة لورشة وبتاع
وقعد يستأذن منى وماوجهش كلام للست
هو تقريبا افتكرنى جوزها!
المهم الست الرخمة رفعت ايدها كدة كانت بتعدل الطرحة باين ولا ايه فشالت ايد الواد اللى ماسكة ايدىفالواد ساب ايدى يعنى وهو كان نايم اصلا
ساعتها المفروض يعنى كنت خلاص اطلع اقعد قدام
بس ما طلعتش يعنى عشان الراجل يفضل فاكرها معايا ومايقعدش يبصلها ف المراية
بس رحت متاخر شوية ناحية اليمين قعدت على نص الكرسى اللى ع اليمين ونص الكنبة ف المكان اللى كنت قاعد عليه
لما وصل اخر الخط وانا نزلت كدة الراجل لقيته قعد يبص ففضلت واقف شوية جنب العربية وعملت انى بعمل حاجة ف الموبايل وبصيت على باب الميكروباص
عشان الراجل افتكر انى برضه تبع الست وواقف مستنيها تنزل .. والست تفتكر انى نزلت م العربية وبطلع الموبايل من جيبى بقى بعمل فيه حاجة
لما عديت الشارع بقى لقيت الست بتعدى الشارع هاتركب هى كمان بس ركبت عربيات السلام وانا ركبت موقف العاشر
بصيت ع الواد بصة اخيرة .. وضحكت

امال بقى لو ابنى ومن لحمى ودمى هابقى عامل ازاى؟