قبل ما اتكلم عن التعديلات الدستورية ورايى فيها وهل هاصوت باه او لا ليه, حابب اقول انى مواطن مصرى عادى جدا
مش دارس قانون .. بس بعد ما قريت التعديلات المقترحة دى من 8 ايام, وكونت رايى ساعتها, ماكتبتش رايى ده الا بعد ما قريت حوالى 40 تحليل ونقد سواء مع او ضد التعديلات لدكاترة واساتذة فقه ومشاهير واشخاص عاديين
وقريت اراء مئات الاشخاص فى تعليقات على تدوينات على بلوجر او نوتس ع الفيسبوك او تعليقات على اخبار فى المصرى اليوم او الشروق او اليوم السابع او الوفد او مصراوى او غيره
لحد ما فى الاخر كونت فكرة من خلال اراء كل اللى قريتلهم على مدار 8 ايام كاملة (ضعف عدد الايام اللى لجنة تعديل الدستور خدتها عشان تطلع مقترحاتها للتعديلات الدستورية)
وحطيت ده كله على رايى الشخصى .. عشان اكتب اللى هاكتبه دلوقتى
ارجوك اقرا الكلام اللى هاكتبه ده
الاول دى التعديلات الدستورية النهائية التي سيتم الإستفتاء عليها السبت 19 مارس 2011
________________________________________________________
قبل ما اعلق على المقترحات لتعديل الدستور نفسها حابب اتكلم على كذا حاجة بشكل عام =
= الاستفتاء يتم على كافة التعديلات وليس على مادة مادة .. فقد يقبل الشعب بتعديل مادة معينة ولكنه يرفض التعديل المقترح على مادة اخرى
يعنى هاتشترى كيلو بطاطس هاتاخد منه 10% بطاطس مضروبة .. ويا تشترى يا مفيش
ايه المشكلة لو كان الاستفتاء على مادة مادة؟ ويقبل الشعب بمادة ويرفض مادة تانية؟
مجرد انه هاياخد وقت اطول وهايكون اصعب فى عملية التصويت وعملية الفرز؟!
= ضيق الوقت المتاح امام اللجنة الواضعة للتعديلات الدستورية (4 ايام فقط) وضيق الوقت امام الناس لمناقشة التعديلات وفهمها وتكوين راى محدد فى التعديلات للتصويت سواء بنعم او بلا (اقل من اسبوعين)
طيب اذا كان المثقفين والمتعلمين والخريجين اصحاب الشهادات العليا وحتى مشاهير المصريين واساتذة القانون مختلفين فيما بينهم على التصويت بنعم او بلا
امال المواطن البسيط يعمل ايه؟ .. الغلبان اللى مش فاهم واللى لحد دلوقتى مايعرفش الثورة دى حصلت ليه ولا ايه اللى بيحصل ف البلد .. ومطلوب منه ينزل يصوت .. ده يعمل ايه؟
اللى ماحدش فهمه ولا قاله التعديلات دى معناها ايه ولا نتايجها ايه ولا ايه اللى هايعود عليه م التعديلات دى والفرق بينها وبين الدستور القديم
ليه مفيش نشرات تنويهية ف التليفزيون كل ساعة او صفحات مخصصة فى الجرايد الحكومية تشرح للناس يعنى ايه التعديلات دى وايه اللى اتغير بالظبط والمفروض يروحوا فين ويعملوا ايه؟
التسرع والسربعة وتحديد ميعاد مبكر لاجراء الاستفتاء على التعديلات غير مجدى وهايثير بلبلة فى الشارع
ماكانش فى اى مشكلة لو كان الاستفتاء مثلا اول ابريل!
وكانت اللجنة طرحت الاول افكار او مسودات للتعديل وخدت راى الشارع او فقهاء الدستور وعدلت فى المسودة دى لحد ما تنزل بشكلها النهائى بعد اسبوع او 10 ايام وتسيب مهلة اسبوعين او تلات اسابيع للناس تفهم وتفكر وتتناقش وف الاخر تقرر؟
= الفترة المتاحة قبل الانتخابات البرلمانية اللى المفروض تكون فى يونيو غير كافية لاى فرد للانضمام لاى حزب او تنظيم اى حزب لصفوفه
انا كعمرو فلنفرض انى عايز ارشح نفسى فى مجلس الشعب
انا حاليا مش عارف انضم لحزب وائل الابراشى ولا عمرو خالد مثلا
وبالتالى فانا محتاج وقت كافى اشوف توجهات كل الاحزاب فى الفترة الجاية
لان الاحزاب والافراد قبل ثورة يناير غير بعد ثورة يناير
وكل اللى كان منفصل عن الحياة السياسية قبل كدة رفضا للوضع .. دلوقتى عايز يخش الحياة السياسية ومحتاج وقت
ماينفعش انك تدى شهرين بس فرصة من دلوقتى لحد الانتخابات البرلمانية ومفيش حزب هايعرف يستعد الا الاخوان واللى باقى من الحزب الوطنى (الجهتين الوحيدتين السياسيتين المنظمتين حاليا), وفعلا الفئتين هما غالبية اللى موافقين على التعديلات دلوقتى وبيقولوا نعم .. وبالتالى لو حصلت الانتخابات بالشكل ده فهايكون مثلا 40% م المجلس اخوان و40% حزب وطنى والباقى نصهم على الاقل مستقلين بالاسم لكن فعليا يا اخوان يا حزب وطنى , عدد مقاعد اكبر من ثقة الشعب الحقيقية فى كلتا الفئتين .. وده مجلس شعب مايعبرش عن حقيقة وواقع الشارع المصرى
مش بقول انى رافض للاخوان ولا رافض للحزب الوطنى .. بس انا بتكلم عن واقع الشارع المصرى
= ايضا ضيق الوقت امام الانتخابات الرئاسية
لسنا ملزمين بانتخابات رئاسية فى سبتمبر, حيث ان سبتمبر 2011 بعد 25 يناير يختلف تماما عن سبتمبر 2011 بعد 25 يناير
الوضع السياسى فى مصر اصبح مختلفا الان عن ذى قبل
المرشحين للرئاسة وضعهم اصبح مختلفا .. فعمرو موسى مثلا لم يكن ليترشح للرئاسة فى 2011 لو كان مبارك او ابنه قد ترشح احدهما فى 2011
فى الوقت نفسه فان الوقت ضيق للغاية امام العديدين للتفكير فى الترشح للرئاسة او لاعداد برنامج قوى ينافس برنامج شبه جاهز ومعد مسبقا كبرنامج البرادعى مثلا الذى كان ينوى الترشح بغض النظر عن الاحداث الاخيرة
ايضا اخرين كالمستشار هشام البسطويسى لا يجدون متسعا من الوقت لاعداد برنامج قوى ينافس شعبية عمرو موسى او البرادعى او حتى ايمن نور
كما انه من المجحف الا تعطى الناخبين من الشعب الوقت الكافى لسماع اراء جميع المرشحين ومعرفة برامجهم والمقارنة بينهم ومشاهدتهم يتناظرون امام الشعب ليستطيعوا الحكم بانفسهم على المرشحين
= كيف يكون التصويت على التعديلات الدستورية فى يوم واحد فقط؟!
كيف يمكن ل40 مليون مصرى لهم حق التصويت ان يصوتوا فى استفتاء مهم وتاريخى كهذا الاستفتاء .. فى يوم واحد .. فى 11 ساعة فحسب!
مصير امة بالكامل سيتحدد فى 11 ساعة فقط!
من الثامنة صباحا وحتى السابعة مساءا هو وقت كافى لتغيير تاريخ مصر!
طيب نتكلم بقى عن المواد نفسها المقترح تعديلها
(المادة 75):
- المادة ركزت على جنسية الرئيس ووضعت حد ادنى لسنه, ومااهتمتش بمستوى تعليمه او اداءه للخدمة العسكرية مثلا, وماوضعتش حد اقصى لسنه!
انا مصرى, ماكانش بايدى انى اتولد فى مصر ولا انى الاقى ابويا وامى مصريين, وفى مصريين تانى غيرى ممكن يكونوا بيحبوا مصر اكتر منى, بس والدهم او والدتهم غلط وقرر انه يسافر وخلفه هناك
تحرمه ليه من انه يترشح للرئاسة؟
واحد مصرى وانتماءه لمصر, بس اتولد برة مصر او والده او والدته اتولدوا برة مصر, تحرمه ليه هو وولاده من الترشح للرئاسة وهو حق اصيل لاى مصرى؟
طب انت ليه ماحطتش شرط التخلى عن الجنسية الاجنبية؟
يعنى واحد ابوه غلط واتسبب فى انه اتولد برة مصر, ايه المشكلة لو تنازل عن جنسية الدولة التانية فى مقابل انه يبقى معاه بس الجنسية المصرية ويترشح للرئاسة؟
طب بلاش .. هل الدول الاجنبية مستنية فرصة ان يترشح رئيس لمصر عشان تقدر تستغل مصر وتتجسس على مصر عن طريق مراته؟!
شرط الا يكون متزوجا من غير مصرية اراه ظالما, بغض النظر عن ان فى غير مصريات كتير انتمائهم وحبهم لمصر ممكن يكون اكتر من مصريات كتير مش فارق معاهم او مغيبات ومش فاهمين, وغير كدة انتماء الرئيس هايكون لبلده اكتر من بلد مراته!
ثم لو حصل شذوذ فى القاعدة دى فالحالات دى يقدر الشعب يحكم عليها
يعنى كمثال د. احمد زويل, ماحدش يقدر يشكك فى وطنيته وحبه للبلد وفى عقليته الفذة .. تحرمه ليه من حق الترشح لرئاسة الجمهورية - لو هو كان عايز ده - لمجرد انه متجوز من سورية؟
انت كدة حرمت مصر من شخص بقيمة د. احمد زويل لصالح واحد زى مرتصى منصور مثلا ممكن قانونيا يترشح للرئاسة او حتى شعبان عبد الرحيم المصرى واللى ابوه وامه مصريين عشان مراة شعبان مصرية ومراة زويل سورية
اعتقد الشعب يقدر يحكم على الحالة دى او على حالة مصرى تانى متجوز من اجنبية والشعب عارفه وبالتالى هايرفضه ومش هايصوتله فى الانتخابات
ثم شايف ده متعارض مع النص اللى فى المادة الاولى من الدستور المصرى واللى بيقول:
"والشعب المصري جزء من الأمة العربية يعمل على تحقيق وحدتها الشاملة."
هل هنا هايتم اعتبار العربيات اجنبيات ولا هايتم استثناءهم؟
انا شايف ان المبرر لده هو انك عايز المصريين يتجوزوا مصريات بهدف الترشح للرئاسة عشان بس المصريات مايعنسوش!
اخيرا تعليق قد يكون سخيف .. النص لغويا يمنع اى انثى من ترشيح نفسها رئيسة للجمهورية!
يعنى بفرض ان ايناس الدغيدى او نوال السعداوى قالت انا عايزة ارشح نفسى .. كونها انثى يمنعها من الترشح لان المرشح لازم يكون (مصريا) غير متزوج من غير مصرية!
وفى نفس الوقت اى مرح لازم يكون سنه اكبر من 40 سنة .. بس عادى يبقى 82 سنة مثلا (يعنى حسنى مبارك يقدر قانونا يترشح للرئاسة وماحدش هايقوله انت بتعمل ايه)
انا شايف ان التعديل ده بما انه قال ان ابو المرشح لازم يكون مصرى .. شايف انه كان المفروض يتحط شرط ان ابو المرشح مايكونش الرئيس السابق
(المادة 76):
- يشترط التعديل على المرشح المستقل انه يجمع 30 ألف توقيع من 15 محافظة، فى الوقت اللى بيشترط على مرشح اى حزب ان حزبه يكون خد مقعد واحد بس فى مجلس الشعب او الشورى!
- طب فلنفرض ان المستقل ده واحد زى عبد الله الاشعل او حمدين صباحى مثلا وشعبيتهم او رؤاهم السياسية مش واضحة لكل الناس زى غيرهم من المرشحين .. ازاى فى خلال 3 شهور من يونيو ولحد سبتمبر هايقدروا يقنعوا على الاقل 30 الف مصرى فى 15 محافظة مختلفة - بشرط 1000 مصرى على الاقل فى كل محافظة - ببرنامجهم؟ .. دول ازاى هايقدروا ينافسوا البرادعى او عمرو موسى فى فترة قصيرة زى دى؟
مع العلم ان لو عمرو موسى اترشح للرئاسة من خلال الحزب الوطنى الديموقراطى فيكفيه بس اى عضو واحد بس فى مجلس الشعب يؤيده عشان يقدر عمرو موسى يترشح للرئاسة!
- الفقيه الدستورى ابراهيم درويش ابدى تخوفه من قدرة المحكمة الدستورية على مراقبة الانتخابات، ساحبًا الثقة من المستشار فاروق سلطان رئيس المحكمة الدستورية الذي - بحسب قول درويش - عينه رئيس الجمهورية المخلوع ليسهل له أو لابنه الترشح للرئاسة، وأكد أن مبارك قد اختار المستشار بالتعيين المباشر وهو ماليس متبعًا في تعيين رئيس المحكمة الدستورية، فالمحكمة تنتخب اثنين وترشحهما لرئيس الجمهورية ليختار بينهما وهو مالم يحدث.
مع العلم ان رئيس المحكمة الدستورية من المفترض ان يوكل اليه رئاسة لجنة الانتخابات الرئاسية والمكونة من خمسة افراد يرأسهم رئيس المحكمة الدستورية العليا (حسب التعديلات المقترحة) للاشراف على الانتخابات منذ فتح باب الترشيح وحتى اعلان النتيجة, مع العلم بان قراراتها ستكون نافذة وغير قابلة للطعن امام اى جهة ولا يجوز التعرض لقراراتها بوقف التنفيذ أو الإلغاء!!!!
شئ غير منطقى .. يعنى لو اللجنة دى ظلمت مرشح سواء بحسن نية او سوء نية .. فالمرشح ده يخبط راسه ف الحيط ومالوش حتى انه يشتكى لربنا عشان قرارات اللجنة دى نهائية وغير قابلة للطعن ولا لا يجوز الترعض لقراراتها بوقف التنفيذ او الالغاء! .. وده اصلا شئ غير قانونى!
طيب اللجنة دى هاتعرض مشروعها المنظم للانتخابات على المحكمة الدستورية العليا للنظر فى دستوريته من عدمه .. نفس المحكمة اللى رئيسها فاروق سلطان اللى كان ابراهيم درويش بيتكلم عنه
ونفس المحكمة اللى هاتكون مختصة بالفصل فى صحة عضوية اعضاء مجلس الشعب
(المادة 77):
المادة بتقول ان الفترة الرئاسية بعد كدة هاتكون 4 سنين بس واقصى عدد فترات رئاسية هو فترتين
جميل جدا
بس فى نفس الوقت فى مادة فى الدستور لم تتعرض للتعديل او الالغاء هى المادة 190 .. المادة 190 دى بتقول الاتى:
"تنتهي مدة رئيس الجمهورية الحالي بانقضاء ست سنوات من تاريخ إعلان انتخابه رئيسا للجمهورية العربية المتحدة.
لله .. يعنى لو التعديلات اتوافق عليها هايبقى عندنا دستور فيه مادة "77" بتقول ان فترة الرئاسة 4 سنوات, ومادة تانية "190" بتقول فترة الرئاسة 6 سنوات, يا حلاوة يا ولاد
(المادة 88):
- نص التعديل المقترح:
- رأى قرأته: "المادة 88 لمد تحدد صراحة وجوب وجود قاضي علي كل صندوق فمن الممكن فيما بعد التحايل علي هذه الماد خصوصا اننا سمعنا انه في حالة وجود مشكلة في اعداد القضاه سيتم الاستعانه بوكلاء نيابة فما الفرق اذن بين هذا وما سبقه ؟؟"
(المادة 93):
- تحويل الفصل فى الطعون الانتخابية الخاصة بمجلس الشعب من محكمة النقض الى المحكمة الدستورية العليا .. شايفه غلط
معرفش بقى هل ده دور محكمة النقض ولا المحكمة الدستورية العليا
بس بعد اللى اتقال عن فاروق سلطان رئيس المحكمة الدستورية العليا اللى دورت على نفى ليه مالقتش الا دول :
هو من يعين نائب الرئيس ورئيس الوزراء ويعفيهم من مناصبهم, ورئيس المجلس الاعلى للقضاء, وشيخ الازهر, ورئيس الحزب الحاكم!
وفين هنا فصل السلطة التنفيذية عن السلطة التشريعية؟
فين فصل السلطات لما الريس هو اللى بينفذ وهو اللى بيشرع وليه دور كمان فى القضاء؟
