تطورات

النهاردة 12-8 يعنى عدى شهرين على كتابتى الموضوع اللى نشرته فى بداية المدونة (بداية الاجازة)
عاوز اقول التطورات اللى حصلتلى لانها فعلا تطورات مهمة للغاية

انا اتكلمت بشكل عام فى موضوعين
الامتحانات والكاراتيه

بالنسبة للامتحانات فربنا يستر
الامتحانات السنة دى غريبة جدا
كل الناس بتقول ان تالتة اصعب سنة
انا بصراحة شايف انها لحد دلوقتى اسهل سنة شفتها من ساعة ما دخلت الكلية
يعنى انا خدت اولى وعيدتها وتانية وتالتة واسهل سنة فى الاربعة كانت تالتة !!!
المواد سهلة جدا ولذيذة جدا والامتحانات كانت مش وحشة اوى وانا نفسى مش حالل وحش اوى فى الامتحانات
وبصراحة ده شئ يقلق
يعنى انا قبل كدة كنت بدخل الامتحانات وبخرج مش عارف حاجة حليت حلو ولا وحش ولا نيلت ايه ولا هببت ايه الله اعلم مش عارف وبتطلع النتيجة انى ناجح خير وبركة
انما دلوقتى ربنا يستر
لانى فعلا حاسس انى حالل كويس فى الامتحانات ومستريح لحلى فى الامتحانات (اغلبها يعنى)
هاتبقى مصيبة لو لقيت انى هاعيد السنة وبصراحة هاتخنق اوى لو جبت مقبول لان حلى يدينى تقديرات وبالذات فى التيرم الاول .. تيرم التكاليف والحكومية

ولله الحمد
جبت 3امتياز و 2 جيد جدا و1 جيد والتقدير العام جيد مرتفع
التكاليف والحكومية بالذات بقى جبت فيهم جيد جدا وجيد
اما أصول المراجعة جايب فيها امتياز مع انى خارج وانا مش متطمن

وللعلم فالتكاليف والحكومية والمراجعة هما تقريبا اصعب 3 مواد من ساعة رجلك ما تعتب تجارة ع شمس

يوم الاحصاء (كان فاضلى لغة) رحت النادى قلت ابص كدة
لقيت الكابتن دبسنى فى تمرين
ويومها استلمت فريقى
تانى تمرين ليا كان يوم ما امتحنت اللغة وخلصت خالص ومن بعدها بقيت اروح النادى كل يوم
يعنى مسكت تمرين 3-6 ومن اول 6-6
عندى فريقين
سبت واتنين واربع بمرن حزام ابيض وحد وتلات وخميس بمرن الوان (بعد كدة غيرت المجموعة وبقيت بمرن ابيض برضه)

دلوقتى العيال بتوعى امتحنوا فى 7-7-2007 ونجحوا والحمد لله كلهم وبقى معاهم حزام أصفر وبقيت دلوقتى بمرن طول الاسبوع حزام اصفر بس مجموعة سبت واتنين واربع ومجموعة حد وتلات وخميس

هاتطرق لاول مرة لعلاقتى مع الناس
فى اولياء امور كتير بيحبونى مش عارف على ايه بصراحة بالرغم من انى ببهدل عيالهم :D
مش هاتكلم عن الناس القديمة عشان خلاص بنيت قاعدتى عليهم وخلصت
بالنسبة للناس الجدد
النهاردة بالذات (النهاردة اللى فات يعنى امبارح عشان دلوقتى خمسة الفجر) كان يوم غريب
واد قالى على فكرة يا كابتن انت احسن كابتن هنا فى النادى كله ومش عارف فى ايه تانى
وولية امر جت تقولى ان ابنها قعد يعيط وعمال يقول عاوز اروح لعمو ابو نضارة :D انا يعنى
عشان التمرين اللى قبله (زياد) كان عمال يعيط ومتفرغ فقط للعياط فانا عشان اسكته شلته وفضلت واقف بيه واتكلم معاه فى اى حاجة واقوله ماشى هانروح لماما حاضر ادينا رايحينلها اهو عاوز اجيبك شوكالاطة وكلام من ده :D
وناس بقى عاوزين يتمرنوا معايا انا بالذات مش عارف ليه بالرغم من انه لسة ما عداش 3 تمارين من ساعة بداية الموسم (الاجازة بقى وبداية موسم الكاراتيه الجديد ب717 لاعب كاراتيه مسجل فى نادى بدر وكل عام وانتم طيبون)
واه .. النهاردة برضه فى ولى امر قديم جه يقول انى بشتغل بضمير وبتعب مع العيال وفرحان اوى :D
الحمد لله على كل شئ

من 3 ايام بقى ولية امر جاتلى بالنيابة عن أولياء أمور كتير تقولى انها عاوزانى أفتح صالة خاصة برة النادى زى ما غيرى عملوها فعلا لانهم كدة مجبرين يروحوا الصالة دى عشان المدربين بقوا ما يشتغلوش بضمير غير برة مع العلم بان العيال دول حزام بنى وما شابه وانا دلوقتى بمرن أصفر بس


*******

الحياة عموما بقت أحلى الفترة دى من شهرين فاتوا

مش معكنن عليا بس غير النمل
قصدى حضرة النمل اللى مستعمر الكيبورد بتاعى وكل شوية الاقيه خارج من الكيبورد وماشى ع السلك مش عارف رايح فين !!!