احمد حرارة | النور مكانه ف القلوب

قلب الوطن مجروح

 

قلب الوطن مجروح .. لا يحتمل اكتر
نهرب وفين هانروح؟ .. لما الهموم تكتر
نحمى غصون الورد .. من دمع سال ع الخد
اه يا حبيبة الروح .. قلب الوطن مجروح

 

واحد اسمه عيد

شهادتين وبس

شهادة نوارة نجم عن ما حدث فى ماسبيرو:

دخلت المشرحة وشفت جثة 14 عريس غير اللي في التلاجة ماتوا بالرصاص الميري ومعدية عليهم العربيات يا جيش شهادة الزور واليمين الغموس

كل ده عشان تاخدوا الحكم؟ الهي تولعوا انتوا والحكم والبلد والدنيا كلها.. تقتلوا الناس دي كلها ليه؟ ليه؟ ربنا يحرق قلوبكم على ولادكم
... ...
الجيش الكداب نصب على الناس لدرجة ان فيه ناس فعلا نزلت فاكرة ان المسيحيين مسلحين ولما لقوا الجيش كدب عليهم انضموا للمسيحيين

انا ما شفتش ام جثة عسكري واحدة، ومافيش حد كان مسلح غير الجيش، لو صدقوا ان حد مات منهم يبقى هم اللي قاتلينه بغشوميتهم ولا قاصدين حتى

الناس اللي قاعدين على التويتر يتفرجوا على القناة الاولى.. اخرسوا.. اذا ما كنتوش تنزلوا تشوفوا بعنيكم اخرسوا، يا ربنا يدوقكم اللي الناس شافوه

اي حد يكرر شهادة الزور اللي نشرها الجيش وكلها كدب في كدب مش حاقوله غير ربنا يوريك ابنك مكان اللي انا شفتهم النهاردة

واحد جه قالي: امال فين المسيحيين اللي معاهم سلاح؟ انا كنت نازل ادافع عن الجيش لقيت الجيش بيضرب الكل والناس بتضرب في بعضها وماحدش فاهم حاجة

وعلى فكرة، الناس اللي بتكرر كلام الجيش دي مش ناس هابلة، لانه لا كدب مساوي ولا صدق منعكش، دي ناس شريرة وبنت كلب وربنا يحرق قلوبهم يا رب

ودى شهادة صديقة أثق فيها تمام الثقة:

أنا هحاول اكتب اهم الحاجات اللي حصلت امبارح علما باني شفت المسيرة من بعد ادان المغرب و مشيت معاها لحد ما بدأ ضرب البلطجية قرب ماسبيرو- بعدها حضرت ضرب الجيش النار على المتظاهرين من المدرعات- بقيت في رمسيس هيلتون لحد الساعة تسعة- خرجت من هيلتون باتجاه ميدان التحرير من ناحية المتحف المصري..

في البداية عرفت عن مسيرة اليوم مصادفة عن طريق الانترنت منذ بضعة ايام و بعدها اتصل بي احد المشاركين فيها و هو شاب مسيحي اسمه عادل اعرفه من الميدان و طلب مني الحضور بالكاميرا مع الصحفيين لتغطية المسيرة اللي كانت هتبدأ من شبرا و هتتوجه لماسبيرو..

عادل كان معايا على التليفون اول باول عشان اتابع معاه لحد ما اوصل و قالي ان الاعداد بكيرة جدا في شبرا لحد ما وصلت المسيرة بالقرب من بولاق ابو العلا قرب محطة الاسعاف و بدأنا تصوير ساعتها..

الامور كانت هادية جدا و كان المشاركين اغلبهم نساء و اطفال و عائلات و ناس عادية و كان في مسلمين كتير مشاركين و ناس بتتفرج في كل حتة يعني يقدروا يثبتوا ان المتظاهرين ما كانوش شايلين سلاح ولا الكلام الفارغ اللي اتقال.. قالوا لنا ان في بلطجية من منطقة السبتية ضربوا عليهم من فوق بالطوب و الزجاج اثناء مرورهم تحت نفق احمد حلمي و عرفت ساعتها ان القلق هيبتدي كالعادة..

بعدها لما وصلت المسيرة عند قرب رمسيس هيلتون بشوية بدأنا نشوف طوب بيتحدف من شوارع جانبية على المسيرة و الناس بداوا يجروا و يهربوا النساء و الاطفال و الشباب بدأوا يردوا الهجوم.. الناس اصرت على السلمية رغم كل شيء و عشان يهربوا من البلطجية توجه الجميع صوب ماسبيرو زي ما كانوا مرتبين من الاول..

فوجئنا بصوت طلقات فشنك عالي جدا من ناحية ماسبيرو و فجأة اصبح في حركة عشوائية و صريخ و الناس بدأت تجري..

انا كنت تحت الكوبري ساعتها مواجهة للنيل و في مصور قدامي و فوجئت بالمدرعات بتاعت الجيش بتضرب نار ناحيتنا و على الناس بصورة عشوائية جدا و المنظر كان كابوسي فكرني بيوم 28 يناير و فضلت المدرعات تلف و ترجع تضرب نار..

بعدها تراجعت لبوابة رمسيس هيلتون و كان في حالة ذعر شديدة و الجرحى عمالين يتوافدوا على البوابة و الناس تنزلهم على الارض و شفت ناس مضروبة برصاص في بطنها و وشها و ناس مغمى عليها كتير و بدات افقد اعصابي من المنظر.. ستات كتير كاناو بيعطيوا و بيوصفوا منظر المدرعات و هي بتدوس على الشباب تموتهم.. بعدها جه شباب من اللي في المواجهة و قالوا نفس الكلام..

كان في حالة هستريا و رعب و صراخ رهيبة بس الغريب ان الناس كانت منقسمة في كلامها و انفعالتها، البعض كان بيلوم على الجيش و بيتكلم بحرقة و بيشتم في المجلس العسكري و بيتهمه بافتعال كل الكلام ده عشان يهخلي الناس يتوهوا في موضوع الفتنة بدل ما ينتقدوه و البعض الاخر كان معتقد ان المشكلة كلها بسبب "السلفيين" اللي اتفقوا مع المجلس العسكري عشان يبيدوا المسيحيين و يتخلصوا منهم سواء بحرق كنايسهم او بقتلهم بالاسلحة الثقيلة زي النهاردة..

فضلت عند البوابة لحد ما المصور رجع و دخلونا الفندق بعد محاولات كتيرة جدا مننا و محايلات و فضلت جوة الفندق لحد الساعة 9 بالليل و كان الجرحى بيدخلوا كتير و كان في حالة من الترقب و كنا بنتابع ماسبيرو من شباك الفندق..

في نفس وقت حبستنا جوة الفندق اصحابي في التحرير اتصلوا بيا و قالوا  ان في عدد قوات مهول نزلت الميدان بعد ما عرفوا ان في متظاهرين هناك و ضربوهم بالغاز المسيل للدموع و احد اصدقاءنا اتصاب بخرطوش كمان.. الكلام ده اكده اكتر من حد ثقة..

المهم على لاساعة تسعة بدأ ناس كتير تخرج و يقولوا لنا عادي مفيش مشكلة ممكن تخرموا من شوارع جانبية، اتجمعت انا و عائلة مسيحية مكونة من ام و اتنين شباب ولادها و مجموعة نساء مسيحيات كانوا جايين المظاهرة الصبح و خرجنا من الفندق..

(قالوا لي خليكي وسطنا عشان لما يشوفوكي مسلمة و محجبة وسطنا ما يضربوناش!)

كان احساس مؤلم الصراحة ما فهمتش ليه لان كل فكري كان ان الجيش بيضرب بعشوائية و الموضوع مش طائفي خالص بدليل ان ناس كتير اتصابت و ماتت مسلمين زي ما عرفنا بعد كدة..

عند بوابة عبد المنعم رياض و انت جاي من عند المتحف فوجئت بمجموعة كبيرة جداااااااا من الشرطة العسكرية قوات مكافحة شغب و معاها مدنيين لابسين خوذ و دروع و ماسكين عصيان نفس المنظر اللي حصل في فض اعتصام واحد اغسطس.. نفس الاسلوب الغبي استخدام مجندين بلبس مدني او عناصر مثيرة للشغب.. وكاناو متوجهين ناحية ماسبيرو من التحرير.. جرينا بسرعة ناحية شارع رمسيس عشان ما يعرفوش اننا من المتظاهرين لاني مكنتش فاهمة الصراحة وظيفتهم ايه بالظبط ورايحين يضربوا متظاهرين ولا مين دول.. بس شكلهم مكنش مطمئن..

وصلنا مترو ناصر في الاسعاف وطول الطريق كان في تجمعات بشرية كبيرة جدا فيما يشبه اللجان الشعبية زمان متعرفش ان كانوا بلطجية ولا متظاهرين ولا فضوليين ولا ايه بالظبط بس كان تركيزي خلاص شبه غائب و بعد كدة ركبنا و روحنا بيوتنا..

من شهادتي احب اوضح التالي:

-مسيرة الاقباط كانت سلمية من البداية و كان فيها مسلمين كتير و ناس عادي متضامنة..

-البلطجية هجموا على الناس مرتين مرة في نفق احمد حلمي و مرة قرب رمسيس هيلتون..

- الجيش ضرب فشنك و ضرب حي على الناس و المدرعات هرست الشباب اللي في الصفوف الاولى و دي بشهادة ناس كتير جدا شفت اثار الضرب على اجسامهم..

- الموضوع مكنش بادىء طائفي بالمرة بل على العكس توليع التلفزيون و المجلس العسكري هما اللي بيحاولوا يخلوه يبان كدة..

دي شهادتي قدام ربنا و اللي عاوز يصدق اهلا و سهلا اللي مش عايز يروح يتفرج على القناة الاولى و يريح دماغه و يريحنا معاه..

وانا اصدق الاتنين

خصوصا مع نفى النيل للاخبار خبر وقوع قتلى من جانب الجيش, وبرروا الخبر اللى اعلنوه سابقا بانه توتر مذيع!

سبحان الله نفس السياسة

كان شئ متوقع بصراحة مع بداية اسبوع انتخابات مجلس الشعب



10-10

حظر تجول .. تانى

اضغط هنا

----------------

تم تعديل التدوينة باضافة جزء اخير فى نهايتها 


وتم تعديل التدوينة مرة تانية

----------------

 

التاريخ أثبت ان المصريين مابيتعلموش من أخطاء الماضى

أبدا

----

مش فاهم موضوع حزق التبول ده لزمته ايه؟

يعنى الساعة حداشر ونص وكمان ساعتين ونص هايبقى فى حظر تجول لمدة 5 ساعات

الخمس ساعات دول هما اللى هايظبطوا الدنيا؟

طب وقبل كدة؟ الدنيا هاتكون منورة فاللى عايز يولع مش هايعرف يتحرك فى النور ومستنى الساعة اتنين عشان يتحرك ف الضلمة؟

طب اللى عنده مدرسة بعيدة او ماكانش بيذاكر ف الثانوية والتنسيق خلى جامعته ف حتة تانية او زى عندنا فى الشغل كدة هنا الناس اللى عندهم شغل الساعة خمسة الفجر وستة وسبعة الصبح دول يعملوا ايه؟

طب ليه اصلا؟

هل حظر التجوال ده هو اللى هايظبط الامن النهاردة؟

بداية رائعة لاسبوع انتخابات مجلس الشعب

------------

البهيم ابن البهيم اللى ضرب نار ع الجيش موت تلات اربع عساكر مالهومش ذنب وولع ف مدرعتين .. ده استفاد ايه؟

الا لو كان هو ده فعلا وهو كدة استفاد

هى مصر رايحة على فين؟

كل ما نتقدم خطوة لقدام ترجعونا عشرة لورا؟

--------------

دول مش المسيحيين

اللى عمل كدة مش المسيحيين

وانا كمسلم مش شايل اى ذرة غل او غضب من اى مسيحى .. الا لو كان زيه زى المسلم او الكافر اللى تآمر عشان يعمل كدة

----------------


 تعديل:
اضغط هنا: شهادة عيان امام الله على أحداث ماسبيرو

اقتباس:

"البعض الاخر كان معتقد ان المشكلة كلها بسبب "السلفيين" اللي اتفقوا مع المجلس العسكري عشان يبيدوا المسيحيين و يتخلصوا منهم سواء بحرق كنايسهم او بقتلهم بالاسلحة الثقيلة زي النهاردة.."

اهو انا لا احب المبالغة من هنا ولا من هنا
سلفيين ايه بس اللى يبيدوا المسيحيين؟!!!!



اقتباس تانى:

"(قالوا لي خليكي وسطنا عشان لما يشوفوكي مسلمة و محجبة وسطنا ما يضربوناش!)
كان احساس مؤلم الصراحة ما فهمتش ليه لان كل فكري كان ان الجيش بيضرب بعشوائية و الموضوع مش طائفي خالص بدليل ان ناس كتير اتصابت و ماتت مسلمين زي ما عرفنا بعد كدة.."

يا خوفى تقلب حرب اهلية ف الاخر بسبب شوية محرضين متخلفين

بس الغريب هو الاعداد الهائلة للى ماتوا .. خاصة من الجيش
دول ماتوا ازاى؟


---------

والله زى ما كنت متوقع
ف الاخر قناة النيل للاخبار نفت رسميا وقوع اى قتلى فى صفوف الجيش وبررت اللى حصل بتوتر المذيع


يا ولاد ال**** !!!!!!!!!!!


------------

اقرا ايضا: شهادتين وبس

 

تحية لبطل اكتوبر

ولا قائد ضربة جوية .. ولا قائد ضربة منوفية


تحية لأبطال اكتوبر الحقيقيين

الصورة للفريق سعد الدين الشاذلى رحمه الله

تـعـظــيــــم ســـــــلام

عدى 6 شهور

 

عدى 6 شهور على رحيل المخلوع 11 فبراير

وعدى 6 شهور على استفتاء التعديلات الدستورية 19 مارس

وعدى 6 شهور على نهاية مارس كله

وبدأ اكتوبر

ولسة المجلس ماسلمش السلطة (بسرعة وبسلام وسلاسة) لانقاذ الوطن وسرعة تسليم التركة والتخلص من الحكم العسكرى الخ الخ الخ

الاخوة اللى صوتوا بنعم لسرعة تسليم السلطة

الف مبروك الخازوق .. لسة اللى جاى أمتن

بلد دلاديل 2

التدوينة دى انا كنت كاتبها هنا بتاريخ 4 يونيو 2009

من اكتر من سنتين

هنا: http://amrfekry.blogspot.com/2009/06/blog-post.html

جيت دلوقتى احط اللينك بتاعه ع الفيسبوك لقيته بيقولى ان البوست ده ممنوع عشان حد قبل كدة عمله فلاج!

يعنى انا لما حطيته من سنتين حد عمله فلاج وشاله من ع الفيسبوك ودلوقتى ماينفعش احط اللينك تانى

مرضى نفسيين

عموما .. البوست ده هاحط فيه نفس البوست اللى الاخوة الفلول الافاضل عملوله فلتج وشالوه عشان احط لينك مختلف

وشكرنن

______________________________________________________________

انا بصراحة مسكت نفسى ومارضيتش اعلق ع الهبل اللى حصل عشان لو كنت علقت ساعتها كان ممكن اغلط جامد وكانت هاتبقى اخر تدوينة تقروها لعمرو فكرى
فى الحقيقة لحد دلوقتى برضه مش عارف اصيغ الكلام بصورة مهذبة ازاى ! بس انا عايز اتكلم عن الهبل والتخلف العقلى اللى حصل ساعة ما حفيد حسنى مبارك مات


طفل .. ومات .. وخلاص !
نقراله الفاتحة .. وندعوله بالرحمة .. وخلاص !
لسة القلم ما كتبلوش ذنوب .. يمكن ربنا عمل كدة عشان حاجة مانعرفهاش .. بس ده اضح انه خير لعيلة مبارك !!!!


اللى زعل زعل .. واللى اتصدم اتصدم .. واللى فرح شمت ... خلاص خلصنا !
انما يعلن الحداد فى مصر بسبب وفاة طفل !!!! ده انا ما اقبلوش !
ايا كان الطفل ده مين


انما افتح التليفزيون الاقى القنوات المحلية مارشات عسكرية وقران !
وافتح الدش الاقى كلهم دلاديل جايبين قران !
ده يبقى اسمه عبط


دريم ودريم 2 وابتهالات واغانى دينية .. المحور وروتانا والحياة وحتى ميلودى وما شابهها !
OTV !!!!
حتى نجيب ساويرس مشغل قران !


كله مشغل قران !
طب فين المارشات العسكرية؟


ومرسى ابن المعلم الزناتى مات يا رجاااااالة !

PATHETIC !

شئ يخلى اللى الموضوع بالنسبة له .. يشمت !
يفتح باب الشماتة والقرف لكل اللى قالوا ده طفل ومالوش علاقه بجده وعمه يعنى
يخليه يقول (احسن) ويطلع لسانه ويقول خلى جده يجرب






انا غير راضى عن الهبل اللى حصل ف القنوات الفضائية والارضية ده !
يعنى ايه يعنى طفل مات؟
ما فى عشرات الالاف من المصريين ماتوا ف العبارة اللى غرقت ومساكن الدويقة اللى وقعت وف اقسام الشرطة م التعذيب وبالمحاصيل المسرطنة والفراخ ام انفلونزا والسمك المسمم والبقر المجنون والقرف المعتوه وغيره من الامراض الرائعة اللى ماشفناهاش ف عهد اى حكومة تانية


اه صحيح


احنا اصلا ما شفناش اى حكومة تانية




صحيح
كلب الريس مات .. راح يعزى فيه رؤساء
الريس نفسه مات .. ماراحلوش ولا كلب

تمخض الجمل فولد فأرا

انتظر المصريون طويلا
ثم انتظروا
واخيرا خرج علينا رئيس الوزراء الثائر د. عصام شرف فى بيانه الى الأمة

البيان الذى تم الاعلان عنه على انه سيحمل قرارات مهمة وقوية
البيان الذى تأخر لأكثر من ساعة ونصف لاسباب غير معلومة
وجاء البيان
وبدا ب(اعتقد ان انتوا تتفقوا معايا ان احنا بنمر بلحظة تاريخية) .. وانتظرت شخصيا خطاب تاريخى يليق باللحظة التاريخية
ثم (اصدرت القرارات التالية) .. وترقبت القرارات التاريخية
وجاءت ال(قرارات) .. بلا قرارات!

1- اجراء تعديل وزارى خلال اسبوع
2- اجراء حركة محافظين تتفق وتطلعات الشعب قبل نهاية الشهر الجارى
3- تكليف السيد وزير الداخلية بالاسراع فى اعلان حركة وزارة الداخلية
4- اناشد المجلس الاعلى للقضاء بتطبيق مبدا العلانية على جميع محاكمات رموز النظام السابق على ان تكون المحاكمات منجزة ليطمان الشعب وترتاح اسر الشهداء
5- اصلاح هياكل المؤسسات الصحفية فى اسرع وقت

لماذا أعلن الدكتور عصام شرف تشكيل الوزارة الجديدة حين تولى رئاسة الوزارة فى خلال يومين (والتى يرفض رئيسها وجود 8 اعضاء منها!)
وعلينا الان انتظار اسبوعا كاملا للاعلان عن الوزارة الجديدة؟
لماذا وضع موعدا محددا لاجراء الحركة وهو 15 يوليو, وهو نفس الموعد الذى كان معلنا من قَبل من قِبَل وزير الداخلية
طب ليه هاتنهى خدمة قيادات الشرطة اللى اشتركوا فى قتل الثوار من غير ما تحقق معاهم؟؟؟ ليه ما اكتفيتش بإيقافهم عن العمل؟
هياكل المؤسسات الصحفية فى اسرع وقت .. اللى هو امتى؟ .. واشمعنى الهياكل الصحفية, فين الاجهزة الادارية والقيادات فى التعليم العالى وغيرها من المؤسسات الحكومية؟

وخرجنا من البيان ب(قررت ان اتولى بنفسى رئاسة مجلس ادارة صندوق رعاية ضحايا ثورة 25 يناير)

وانتهى البيان فى دقيقتين, انتهى قبل أن يبدأ


فين القرارات؟
فين اخبار الشعب بأن قرار انهاء خدمة قيادات الداخلية هو مؤكد وانه يستم فتح تحقيق عاجل معهم جميعا؟
فين علاج مصابى الثورة على نفقة الدولة وفى مستشفيات الدولة؟ والمستشفيات العسكرية مش بس المدنية .. زى ما المحاكمات بتكون محاكمات عسكرية
فين القرارات؟

هل كان هذا البيان القصير ليعلن فيه رئيس الحكومة توليه بنفسه مجلس ادارة صندوق رعاية ضحايا الثورة؟
أم ليصبح كبيان مبارك الثانى؟


الخبر على فكرى نيوز 

حقيقة

احنا فعلا غلطنا لما سمعنا كلام حزب الكنبة ومشينا وسيبنا الميدان

انا ليه نازل بكرة؟

عشان مفيش خريطة طريق واضحة

عشان مبارك بقاله 5 شهور متنحى وما اتحاكمش

عشان المخلوع نايم ف مستشفى شرم الشيخ بينال رعاية خاصة وجايله طقم رعاية من المانيا ولا كأنه مذنب

عشان سوزان مبارك تعالج سنانها على نفقة الدولة, ومصابى الثورة يتلقحوا ف المستشفيات بال4 شهور لحد ما ماتوا

عشان جمال وعلاء ماحدش يعرف هما ف الحجز ولا لا

عشان حبيب العادلى لحد دلوقتى ماشفتوش بلبس الحجز ومعرفش محبوس ولا لا

عشان القناصة اللى معروفين بالاسم اللى كانوا فوق هيلتون رمسيس يصطادوا الناس لحد دلوقتى ماحدش حاسبهم

عشان امين الشرطة اللى قتل الناس والعسكرى اللى رقص بالسيف والظابط اللى شاور اشارات بذيئة للناس

عشان الحرامية اللى محكمة الجنايات طلعتهم براءة

عشان القضاة خدوا اجازة شهرين ولا كأننا فى حالة حرجة

عشان مبارك والعادلى ايدهم لسة ملوثة بدم الشهداء

عشان الشرطة مش فى خدمة الشعب

عشان كل ده

انا نازل بكرة التحرير ان شاء الله

29-06-2011 ربنا يستر

تباين آراء القوى السياسية بشأن أحداث التحرير.. "6 إبريل" تتهم أعضاء الحزب الوطنى المنحل بالوقوف وراءها.. والوفد: موقف أسر الشهداء رد فعل طبيعى لتأخر محاكمة قتلة المتظاهرين

الصحة: 1114 مصابا فى أحداث ميدان التحرير حتى الآن

 تأجيل القمة في أعقاب اشتباكات التحرير

الداخلية تتراجع عن تأجيل اللقاء .. والقمة في موعدها

زاهر: الممتنع عن خوض القمة في موعدها يعد منسحبا

"الأوامر العليا" تُجبر الزمالك على خوض القمة

فيكى ايه تانى يا مصر النهاردة؟

ثورة غضب أبناء مبارك

النهاردة

 24 يونيو

يوم الغضببب

غضب أبناء مبارك

كل اللى زعلانين على باباهم هاينزلوا مصطفى محمود

وكله بنفس واحد هايغنى لابوه ويقول:

وبحبك يا ريس

ولعلمك يا ريس

انا بزعل اوى لما

حد يقولك يا ريس

وكله هايزعق زى الغووووول

وينعر ويقوووووول

تعالالى يا بابا

وانا مالى هى

ودينى على طابا

وانا مالى هى

او شرم يا بابا

وانا مالى هى

يا حبيب الغلابة

وانا مالى هى

قلة ادب!

يوم التدوين ضد التحرش الجنسى

الاغتصاب او التحرش الجنسى

حاجة اللى بيعملها ممكن ينساها بعد ساعات

انما اللى بيتعرض له - مش هاينساها طول عمره

عشان اشباع شهوة غبية .. المعتدى - زى الحيوان - بيعرض المعتدى عليه لأذى نفسى مش طبيعى طول عمره

وفى المقابل هايستفاد ايه؟

انا دايما بدعى ربنا يحفظ بناتنا ويصون اعراضنا

----

انت ماشى ف شارع صغير .. وفى بنت جاية من الناحية التانية رايحة الاتجاه اللى انت جاى منه

مش هاتخسر حاجة ابدا لو عديت عشان تمشى الناحية التانية .. او لو معدى فى مكان ضيق .. مش هاتخسر حاجة لو وقفت وخليتهاه ى تعدى الاول

هاتحسسها بالامان وان البلد لسة فيها خير

ليه (بنت) بقى معناها (فريسة)؟

--

موضوع قديم ليا: من هنا

وموضوع تانى: من هنا

--

ربنا يحفظ بناتنا ويصون اعراضنا

عن استفتاء 19 مارس

بعد الاستفتاء العالمى اللى حصل يوم 19 مارس واللى ماحدش يعرف بعد نتيجته اللى جت 77%-22% ايه اللى نتج ولا ايه اللى هايتغير

شفت بعينى حاجات كتير حصلت وعرفت من ناس اثق فيهم تماما حاجات كتير حصلت

ولما جيت افتح بقى لقيت اللى بيهاجمنى من قبل ما اكتب اى حاجة

هجوم شديد وشتايم مش مجرد نقد .. وانى حقود واننا عرفنا حجمنا واننا مش عارف ايه

هابقى اتكلم بعدين عن ثقافة الاختلاف اللى بجد ناقصانا .. بس اللى عايز اتكلم فيه دلوقتى .. هو ايه اللى حصل فعلا يومها

تزوير؟ .. مش هاقول حصل تزوير

لكن اللى حصل ماكانش استفتاء محكم 100% وماينفعش يتكرر بأى حال من الاحوال فى انتخابات مجلس الشعب او الانتخابات الرئاسية

الحبر الفوسفورى

انا مثلا والدتى ماحطتش صباعها فى الحبر الفوسفورى!

مش بقول انى اعرف ناس حصل معاها كذا .. لا ده والدتى انا نفسى حصل معاها ده .. وهى بنفسها شافت قدام عينيها كذا حد ماحطش صباعه فى الحبر الفوسفورى زيها .. ورجع وقف ف الطابور عشان يصوت تانى!!

 وانا داخل اصوت .. سالت الستات الغلابة اللى كانوا قاعدين مشرفات احط انهى صباع فى الحبر .. قالتلى اى حاجة المهم خلصنا بسرعة

وحطيت صباعى ومشيت .. من غير ما اوريها اذا كان عندى اى صباع تانى فيه حبر او لا!

يعنى انا كنت اقدر اروح اى لجنة تانية واخش اصوت تانى واحط اى صباع غيره .. وابقى اكرر ده 10 مرات .. او اكتر لو عرفت ف مرة ما احطش صباعى ف الحبر .. زى والدتى!

اشراف قضائى؟

قالك الاشراف القضائى على الاستفتاء كان بنسبة 100% ولا يشوبه شائبة

احنا اللجنة اللى صوتنا فيها كان فيها شاب صغير مستحمى ونضيف ولابس بدلة وواقف تحس ان لا حول له ولا قوة .. واقف شوية وف الشباك شوية وع الصندوق ده شوية .. وطبعا مش مركز لا مع الناس ولا مع كل الصناديق
وماتعرفش بقى ده مساعد وكيل نيابة ولا تحت التمرين ولا ايه بالظبط

اشراف أمنى؟

دى صورة الاشراف الامنى على اللجنة اللى انا صوتت فيها واللى كان فيها عشرات الالاف .. فى عين شمس قدام نقطة شرطة الزهراء بالظبط .. اللى الناس دى نفسها ولعت فيها قبل الاستفتاء ده بشهر ونص

ظابط وامين .. وشكرا

وقالك ممنوع التصوير .. امال الصور اللى انا مصورها جوة اللجنة دى صورتها ازاى؟

 

تيجى بقى تتكلم مع الاسلاميين او المتأسلمين وتقول الاستفتاء كان .. يقاطعك ويقولك اوعى تتكلم عن الاستفتاء وانتوا حاقدين والاستفتاء ده عرفكوا حجمكم الحقيقى وانتوا وانتوا

وهجوم شديد وكأنك بقيت كافر

وكأن الاستفتاء ده كان استفتاء على الاسلام .. ومن قال نعم فقد قال نعم لله وللدين, ومن قال لا فقد قال لاااااا لله وللدييييييين

بركاتك يابو يعقوب يا مهزراتى

اقرا ايضا: غزوة الزناديق

غزوة الزناديق

 

قالت الصناديق للدين نعم
للدين؟

هو احنا كنا مانعرفش احنا بصوت على ايه ولا ايه؟
امال اللى قال لا ده .. قال لا للدين؟

تكبيرة العيد
المسلمين انتصروا 

انصفنا الله لانهم كانوا مخوفينا كان كل برامجهم كان مولد
هما دلوقتى طالعين ف نغمة ايه خلاص الدين هايدخل ف كل حاجة؟
واحنا بنقولهم نعم مش انتوا بتقولوا الصناديق تقول؟ الشعب بيقول نعم للدين



واللى يقول خلاص البلد مانقدرش نعيش فيها انت حر الف سلامة عندهم تاشيرات كندا وامريكا
ومين اللى يحدد؟ انت؟ مين انت؟


الشعب قال عايز دين خلاص عايز دين اديله دين واحنا بتوع الدين
هو الشعب نزل صوت عايز دين ولا مش عايز دين؟


كل اللى قالوا لا احنا مش زعلانين منهم بس عرفوا مقامهم وعرفوا قدرهم وعرفوا قدر الدين
مقامهم وقدرهم؟ .. وقدر الدين؟ اللى هما مش تبعه يعنى؟


واحنا اتحطينا ف ميزان وبفضل الله ميزاننا اللى على
فاجانى ان بعض الاخوة كانوا متحمسين للا .. فليه؟ احنا هانرضى بدستور مرقع بدستور ملزق بدستور .. يابنى القضية مش قضية دستور .. هى القضية ان انقسم الناس الى فسطاطسن .. فسطاط دين اللى فيه كل اهل الدين .. كل المشايخ اللى كانوا بيقولوا نفسنا اهل الدعوة يتجمعوا كلهم اتجمعوا كلهم .. كل اهل الدين بلا استثناء كانوا بيقولوا ايه؟ نعم .. كلهم بلا استثناء
كله كان بيقول نعم فى جهة .. وقصادهم من الناحية التانية ناس تانية فيبقى شكلك وحش لما تبقى ف الناحية اللى مش فيها المشايخ صح ولا لا؟ .. حتى لو كنت مقتنع ان الدستور ده ف ستين داهية .. فكانت كدة .. عشان كدة كان الخوف .. كنت خايف صراحة
لا يا راجل!
يا جدعان ده مش استفتاء ع الدستور .. ده مجرد شكليات
انما الناس دلوقتى بقوا بيصوتوا ع الدستور ع الدين .. فبتوع الدين ف حتة .. وانت شكلك هايبقى وحش لما تبقى مش مع بتوع الدين
شكلك هايبقى وحش قدام مين؟

انك احيانا لما الشيخ يقول اه تقول اه .. حتى لو على خلاف هواك .. مابقولكش تابعنى ف الغلط .. ولكن كل على ثقة فى مسائل الدين اننى لن اختار لك الا ما يرضى الدين


احنا مش سياسيين ولا عايزين منها حاجة
امال الموضوع ده كله ليه علاقة بايه؟؟؟؟؟؟؟؟؟؟؟


صلى ع الرسول صلى .. زيد النبى صلاة .. ماتخافوش خلاص ..البلد بلدنا

وحياة طنط؟

11-II-11

بمناسبة مرور 4 شهور على رحيل المخلوع

دعوة لزيارة المدونة المهجورة دى


http://theegyptianrevolution2011.blogspot.com/






وشكرا
 

عن حضانة طنطا

الفيديو ده لمدرس بيضرب عيال فى حضانة ف طنطا

البعض قال انه هو اصلا صاحب الحضانة دى

والحضانة دى اتقال انها جوة مركز رياضى تقريبا تابع للشباب والرياضة .. يعنى هيئة حكومية

طب الراجل ده يتحاسب ازاى؟

السخيف بقى .. ان اتقال انه كان بيضرب العيال بناءا على رغبة اولياء امورهم!

يعنى اولياء امور العيال عايزين عيالهم يتضربوا!

ف امريكا لما الاب او الام يأذوا عيالهم ماهياش سايبة .. ومش لمجرد انه خلفه يبقى خلاص يعمل فيه اللى هو عايزه

ده الابن او الابنة ممكن يرفعوا قضية على اهاليهم ويبهدلوهم .. اى والله يبهدلوهم

وممكن اصلا بغير رغبة الاباء ولا البناء .. الحكومة تتصرف من نفسها وتاخد العيل من ابوه او من امه وابوه او امه يقفوا ف المحاكم يعيطوا - زى ما بنشوف ف الافلام - ويقولوا والله هاعامله حلو ومعلش وسماح النوبة اخر مرة

سماح النوبة اخر مرة؟ .. امال احنا عندنا مفيش كدة ليه؟

او بلاش كدة .. احنا عندنا اي اللى يضمن حق عيال زى دول اهاليهم حرضوا مدرس وصاحب حضانة انه يبهدل عيالهم كدة؟

العيال دى لما تكبر هاتبقى ايه؟ وهاتبقى عاملة ازاى؟

شخصيتهم هاتبقى عاملة ازاى؟ .. وفكرتهم عن البلد هاتبقى ايه؟

هايفيدوا مصر بايه؟

هايطلعوا حاقدين وناقمين على المدرس ده وعلى اهلهم وعلى الحضانة والنظام التعليمى ونظام البلد كلها

وهايفضلوا فاكرين الموقف ده طول حياتهم

م المواقف اللى انا عمرى ف حياتى ما انساها

مرة كنت انا ووالدتى واختى ف الشارع بنشترى حاجات وواحنا ف محل بيبيع اجهزة الكترونية وشرايط كاسيت .. الراجل ادانا بوسترين

اختى خدت بوستر لهرقليز .. وانا خدت بوستر لمايكل جاكسون

رجعنا البيت وعدينا على بابا ف العيادة اللى ف الدور الاول

لقلناله النهاردة جبنا كذا وعملنا كذا .. بص ع البوسترين

راح واخد منى البوستر بتاع مايكل جاكسون .. ومن غير اى انفعالات او تغير فى ملامحه ومن غير ما يقول اى كلمة .. راح مقطع البوستر

بصيتله فى ذهول وقلتله عملت كدة ليه؟

قاللى ما معناه ان مايكل جاكسون مش هايخش البيت وانه شخص مش محترم والمفروض مانشيلش صوره وان ده غلط وان ... الخ.

السؤال دلوقتى .. هل انا كدة اقتنعت بانى مايكل جاكسون غلط؟

هل اقتنعت بأنى المفروض ما اشيلش صور مايكل جاكسون او ما اتفرجش عليه او اهتم بيه؟

بالعكس

بقيت انزل لجارى اتفرج معاه على شرايط فيديو مايكل جاكسون لا لشئ الا لمجرد العند

وعدت حوالى 15 سنة ودلوقتى بتفرج على مايكل جاكسون وبحب اغانى لمايكل جاسكون وبسمع Smooth Criminal و Billie Jean و You Are Not Alone و They Don't Care About Us و The Way You Make Me Feel

وفضلت طول العمر فاكر الموقف ده

هل هو كدة علمنى ان ماسكل جاكسون غلط؟

هل هو كدة ربانى؟

هل العيال دى كدة عرفت انها المفروض تعلم الواجب عشان لو ماعملتش الواجب هايخشوا النار ولو عملوا الواجب هايبقوا وزراء؟

اخيرا

فيديو الراجل ده والعيال دول .. فكرنى بالفيديو اللى جاى ده

نفس الفكرة

انا معايا سلطة وقوة .. انا اتحكم فيك زى ما احب

نفس السلطة .. نفس التحكم .. نفس الاهانة .. نفس الضحك والاستهزاء م اللى بيصور

زى الفيديو ده والفيديو ده والفيديو ده والفيديو ده والفيديو ده والفيديو ده والفيديو ده

وكفاية عشان مايبقاش بوست عن التعذيب فى الاقسام المصرية

الراجل ده نتاج فترة حكم الطوارئ

نتاج للضغط العصبى والجرى ورا لقمة العيش , نتاج الفقر والضرايب والظلم والذل والتحكم والتعنت والاهانة

والعيال دى لو ما لحقناهاش هايبقوا كدة هما كمان
هايبقوا الراجل اللى معاه سلطة وبيستغلها لاشباع رغبته فى التحكم

ومش هانخلص

كلنا خالد سعيد

كلنا خالد سعيد

-------------------

• عزاء
  صاحب مدونة كيت كات .. في الحقيقة أنا معرفش اسمه بس هو والدته اتوفت من كام يوم .. و والده من قبلها بحاجة بسيطة
  
  ياريت نعزيه
  
  و ربنا يرحمهم رحمة واسعة و يتقبلهم في الصالحين
  http://el-kitkat.blogspot.com/2011/06/blog-post.html
  BY: Reham Saeed
   

5 June 2011

غناها عزيز الشافعى ورامى جمال

وكتبها ولحنها عزيز الشافعى .. من توزيع وسام عبد المنعم

مقطع (يا بلادى يا بلادى .. انا بحبك يا بلادى) للموسيقار التاريخى بليغ حمدى

"كان لحنه الموسيقار بليغ حمدى من 40 سنة عقب مذبحة مدرسة بحر البقر"

Song by Aziz Shafei and Ramy Gamal

Written and composed by Aziz Shafei .. and arranged by Wesam Abdel-Moniem

"Oh My Country, Oh My Country .. I love you, My Country" part by historical musician Baligh Hamdy

"He made it 40 years ago after Bahr el-Baqar incident"

انا بحبك يا بلادى

Oh My Country, Oh My Country .. I love you, My Country

Tell my mother not to grieve .. and for my sake not to cry
Tell my mother that I'm sorry .. I'll die again and again, for Our Country to live
Promise me to kiss her hands for me .. and give greetings to My Country

Oh My Country, Oh My Country .. I love you, My Country

In my body there's fire, bullets, and iron .. your flag is in my hand, and my name is Martyr
I bid farewell to life and I see you .. Oh, Egypt, beautiful in a new dress
Until my last breath .. I'll die loving to my country

Oh My Country, Oh My Country .. I love you, My Country

Angels flying around me .. our separation moment, my love, it was different
I'll go with them and leave you .. and I hope to see your face, Egypt, again
They - Angels - told me: "let's go to Paradise" .. I told them: "Paradise is My Country!"

Oh My Country, Oh My Country .. I love you, My Country





يا بلادى يا بلادى .. انا بحبك يا بلادى

قولوا لامى ماتزعليش .. وحياتى عندك ماتعيطيش
قولولها معلش يا امى .. اموت اموت وبلدنا تعيش
امانة تبوسولى ايديها .. وتسلمولى على بلادى

ف جسمى نار ورصاص وحديد .. علمك ف ايدى واسمى شهيد
بودع الدنيا وشايفك .. يا مصر حلوة ولابسة جديد
لاخر نفس فيا بنادى .. بموت وانا بحب بلادى

طايرين ملايكة حواليا طير .. لحظة فراقك يا حبيبتى غير
هامشى معاهم وهاسيبك .. واشوف يا مصر وشك بخير
قالولى يلا ع الجنة .. قلتلهم الجنة بلادى

------------------------------------------

بطل النكسة