ماما عملت حادثة

النهاردة وانا ف التمرين لقيت ماما ف النادى هى وسميرة جارتنا الالمانية قاعدين ف البرجولة مع الكابتن ومدام حنان
مفاجاة يعنى .. ماما كانت عاوزة تغير جو عشان كانت قاعدة ف البيت وعرفت انها كانت بتعيط عليا .. على اساس اللى كان هايجرالى من يومين يعنى
سميرة خدتها ونزلوا النادى
خلصنا تمرين وراحوا الملاهى وفضلت قاعد انا وماما ومدان حنان ف البرجولة لحد ما يخلصوا
قمنا رحنالهم لحد ما خلصوا وخرجنا م النادى على طول عشان بابا كان رنلنا وواقف قدام النادى من فترة
جسر السويس بقى .. عدينا اول شارع ووقفنا ف الحارة اللى ف النص ومستنيين نعدى التانى .. انا والكابتن كنا واقفين على اليمين وبعدينا اختى ثم ماما وسميرة .. عديت انا والكابتن على شمالى ثم اختى .. ماما طوووووووووووووووول عمرها بتخاف م العربيات موت
اترددت اطلع ولا ارجع ولا اعمل ايه .. المهم انها اتاخرت شوية فعدت بعدينا راحت عربية خبطتها
سميرة كانت على شمالها وعدت بسرعة بس ماما كانت ابطا شوية فالعربية خبطتها واتقلبت على وشها ف الشارع
الكلام ده كان الساعة اتناشر ونص
ركبنا العربية ووديناها مستشفى هليوبوليس وفضلت معاها جوة المستشفى انا وبابا والكابتن (اختى وسميرة ومدام حنان وعيالها احمد وكريم ومعاهم بيجاد كانوا مستنيينا قدام الباب فى الاستقبال عشان ماكانش ينفع يخش اكتر من اتنين فانا دخلت انا و الكابتن وبعدينا بابا دخل على اساس انه دكتور يعنى فمسموحله يخش اى حتة)

الراجل اللى خبطها بقى اول ما عدى راح واقف على طول ونزل جرى يقول انا اسف يا جماعة ومستعد للى تطلبوه واى حاجة عاوزينها انا تحت امركوا .. وقالنا نروح ناخدها عنده ف العربية بس بنبص لقينا الكاوتش بتاع فرقع !
غالبا فرقة قبل ما يخبطها بمتر ولا حاجة !!!!
المهم بعد ما رحنا المستشفى جه وفضل واقف ومستنى يتطمن عليها وكان مستعد لاى حاجة فعلا لحد ما قلناله لا خلاص امشى انت وايدنا الحادثة ضد مجهول عشان الراجل ما يتبهدلش فيها
الراجل كان واقف وغرقااااااان ميا من العرق وكان خلاص هايعيط وهو عمال يقولنا انا متاسف جدا وربنا يكتر من امثالكوا وباكرر اعتذارى .. وفضل شوية يدعى كدة لحد ما مشى
لما بعتنا جبنا الحاجة العليقة والدوا وعملنا اشاعتين وكدة بابا قال خلاص مش هانعمل للراجل حاجة ابقوا خلوه بس يدفع حق الحاجات دى فماما قالت لا حرام بلاش

المهم فضلنا جوة لحد الساعة اتنين وخرجنالهم لقيت استاذ اسماعيل طنطاوى (اتكلمت عنه قبل كدة) جالنا المستشفى عشان كان بيكلم مدام حنان يسالها ماراحتش الشغل فين فقالتله اننا ف المستشفى فجالنا من مدينة نصر
وكان برضه عمر رشاد جالنا عشان كلم بيجاد قاله انا ف البيت انت فين فقاله انه ف المستشفى
خرجنا استنينا برة المستشفى شوية لحد ما امير جوز سميرة جه هو واستاذ فراج جارنا برضه (اللى بيدى اختى درس عربى) هو ومراته ف عربية استاذ فراج وكانت مراته كلمت اختها جاتلنا من عين شمس هى وجوزها ف عربيتهم
روحنا العبور دخلنا الشقة على تلاتة وربع تقريبا

ماما بقى عرقت ايدها اليمين ولزقنالها دماغها وربطناها ودهنالها رجلها الشمال
كان كتفها اليمين واجعها واتجرحت ف دماغها من ورة من ناحية اليمين ورجلها الشمال اتلوت لما اتخبطت فورمت شوية .. وتقريبا صباع شمالها الكبير اتجزع
هى كويسة والحمد لله بس كتفها ودماغها واجعينها شوية
سميرة بقى قعدت تعيط ف المستشفى وتقول ان هى السبب وكان المفروض تشدها اسرع شوية وهى الغلطانة وكدة

واحنا راكبين بقى العربية ومروحين قلت لماما ان هى كانت بتقول ان اول امبارح عيد ميلادى الحقيقى وانها بتقول انى اتولدت من يوين .. اهو النهاردة بقى هى كمان اتولدت من جديد .. بس مش هانغيرها يوم عيد ميلادها .. لان النهاردة - 4/8 - كان فعلا عيد ميلادها