مش هاقولك حب لاخيك ما تحب لنفسك او اى مقولات او حتى شعارات
بس احيانا الواحد بيكون فى موقف هايعمل حاجة معينة او هايتصرف بشكل معين بخصوص حاجة .. مش هايفرق معاه الحاجة دى, لكنها هاتفرق مع غيره جدا
مثلا
سواق ميكروباص او اتوبيس هايعدى على محطة معينة
المحطة واقف عليها واحد بس
والسواق عايز يجرى
تفكير السواق .. ان عربيته مثلا 14 راكب ومعاه فعلا 13 راكب .. ومش هايفرق معاه الراكب ده ف حاجة .. جنيه او ربع جنيه؟
بس بالنسبة للى واقف ع المحطة .. الميكروباص او الاتوبيس ده ممكن يكون اول واحد ييجى فى خلال ساعة مثلا هو واقفها ع المحطة ويكون اخر واحد هاييجى اليوم ده .. والراكب هايكون مستعد يدفع ضعف او ضعفين الاجرة عشان يركب والا مش هايعرف يروح
ده فى نفس الوقت اللى السواق مش فارق معاه .. وقرار صغير منه يفرق مع الراجل ده .. يقف ع المحطة او مايقفش هو ومزاجه .. الراجل يروح بيته او مايروحش
الفرق كبير
مثلا عندى ف الشغل بنشتغل شيفتات .. وممكن نغير مع بعض مواعيد الشيفتات
ممكن حد يكون باعت لحد معين عشان يغير شيفته معاه لانه عنده حاجة مهمة
بالنسبة للتانى .. هو مش فارق معاه .. قراره هايكون على حسب مزاجه .. وفى الغالب ممكن يكسل يغير ميعاد شيفته على اساس هاييجى ساعة بدرى او هاييجى ساعة متاخر
فى نفس الوقت اللى الساعة فرق دى هاتفرق مع اللى باعت عايز يغير ميعاد شيفته جدا .. انه مثلا مش هايعرف ييجى عشان المواصلات او عنده مشوار حياة او موت
فبالنسبة للى عايز يغير ميعاد شغله الموضوع مهم وضرورى .. وفى نفس الوقت نلاقى ان نفس الموضوع هو هو بالظبط بالنسبة للتانى موضوع مش مهم وحسب مزاجه
اللى انا قصدى اقوله
انك مش هاتخسر حاجة - لو كنت انت فى الموقف التانى - والقرار بالنسبة لك مش حيوى ومش فارق معاك .. انك تاخد القرار اللى هايفرق مع صاحب الموقف الاول
اخيرا عايز اضيف حاجة
اننا احيانا فى حاجات بسيطة جدا ممكن نعملها تفرق مع اللى قدامنا .. مع انها مش هاتكلفنا حاجة
جرب وانت نازل من اى مواصلة تقول للسواق - او للى فتحلك الباب - شكرا
مش هاتخسرك حاجة
هناك 8 تعليقات:
حلو البوست ده
عاجبني اوي
واقعى جدا وبسيط
ويخلى الواحد فعلا ياخد باله من قراراته اللى ممكن تفرق مع حد تانى وتأثر عليه بالإيجاب أو السلب
يارب يجعلنا من اصحاب القرارات اللى بتأثر على غيرنا بالإيجاب
تحياتى ليك يا عمرو
وسلامي لريهام
اختك خيخة
اول مرة من زمان اوى تكونى انتى الضيفة وانا اللى اقولك شكرا على تواصلك معايا :D
كلام فعلا حقيقي ...لكن معظم الناس مبيحطوش في دماغهم الكلام ده ...والامثله الي حطتها قليله جدا ومش مصيريه زي امثله كتير اوي ممكن تقول انها مصيريه...
يعني موظف في الحكومه مثلا مواطن ممكن يكون جي من اخر الدنيا عشان يخلص ورق ..وتلاقي الموظف يقوله بمنتهي البساطه فوت علينا بعدين رغم انه بايده يخلص الحوار في 5 دقائق ..بس نوع من الكسل وعدم المبالاه
زي ميكون برضوا حد عامل حادثه .وداخل مستشفي خاصه يقوله تتدفع الاول ..رغم ان ممكن كل دقيقه علي الي عمل الحادثه ممكن تخليه يعيش او يموت
والامثله كتير اوي
معاك حق
بس انا بتكلم على مواقف بسيطة اى حد زيى وزيك ممكن يتحط فيها, مش بس حد ف موقف مسئولية زى موظف حكومة اوموظفة استقبال
روى الشيخان عن أنس بن مالك رضي الله عنه، عن النبي صلى الله عليه وسلم قال: "لا يؤمن أحدكم حتى يحب لأخيه ما يحب لنفسه".
دي مش شعارات ده حديث، ملحوظة ف السريع يعني
الغير معرف
considered
بس مين سيادتك؟
وقت ما كنت عاملة الحادثة بتاعتي...اقرب مستشفي وقتها كانت عين شمس
دخلت من اقرب باب قصادي ...لاني كنت حاسة ان عيني بتضيع مني ...لقيت الراجل بمنتهي البرود بيقولنا لفوا من الباب التاني
وبابا لأول مرة ف حياته يشوف بنته بتزعق ف حد اكبر منها ...وكنت بزعق بغباء ...ولو كنت وقتها ف وعيي ...كنت هضربه
يعني ايه نلف من الباب التاني
واحدة عاملة حادثة قصادك ....وبكل هدوء لا لا لا مفيش دخول من هنا لفوا من الباب التاني
ع الرغم من اننا كنا داخلين علي رجلينا ...بغض النظر اني عندت ودخلت من نفس الباب :D
بس بجد يا عمرو طرحك للموضوع هاااااااايل ومهم جداااااااااااا بجد :)
الله يكرمك بترفعى من روحى المعنوية ^_^
إرسال تعليق