عندما تكون صاحب قرار

مش هاقولك حب لاخيك ما تحب لنفسك او اى مقولات او حتى شعارات

بس احيانا الواحد بيكون فى موقف هايعمل حاجة معينة او هايتصرف بشكل معين بخصوص حاجة .. مش هايفرق معاه الحاجة دى, لكنها هاتفرق مع غيره جدا

مثلا

سواق ميكروباص او اتوبيس هايعدى على محطة معينة

المحطة واقف عليها واحد بس

والسواق عايز يجرى

تفكير السواق .. ان عربيته مثلا 14 راكب ومعاه فعلا 13 راكب .. ومش هايفرق معاه الراكب ده ف حاجة .. جنيه او ربع جنيه؟

بس بالنسبة للى واقف ع المحطة .. الميكروباص او الاتوبيس ده ممكن يكون اول واحد ييجى فى خلال ساعة مثلا هو واقفها ع المحطة ويكون اخر واحد هاييجى اليوم ده .. والراكب هايكون مستعد يدفع ضعف او ضعفين الاجرة عشان يركب والا مش هايعرف يروح

ده فى نفس الوقت اللى السواق مش فارق معاه .. وقرار صغير منه يفرق مع الراجل ده .. يقف ع المحطة او مايقفش هو ومزاجه .. الراجل يروح بيته او مايروحش

الفرق كبير

مثلا عندى ف الشغل بنشتغل شيفتات .. وممكن نغير مع بعض مواعيد الشيفتات

ممكن حد يكون باعت لحد معين عشان يغير شيفته معاه لانه عنده حاجة مهمة

بالنسبة للتانى .. هو مش فارق معاه .. قراره هايكون على حسب مزاجه .. وفى الغالب ممكن يكسل يغير ميعاد شيفته على اساس هاييجى ساعة بدرى او هاييجى ساعة متاخر

فى نفس الوقت اللى الساعة فرق دى هاتفرق مع اللى باعت عايز يغير ميعاد شيفته جدا .. انه مثلا مش هايعرف ييجى عشان المواصلات او عنده مشوار حياة او موت

فبالنسبة للى عايز يغير ميعاد شغله الموضوع مهم وضرورى .. وفى نفس الوقت نلاقى ان نفس الموضوع هو هو بالظبط بالنسبة للتانى موضوع مش مهم وحسب مزاجه

اللى انا قصدى اقوله

انك مش هاتخسر حاجة - لو كنت انت فى الموقف التانى - والقرار بالنسبة لك مش حيوى ومش فارق معاك .. انك تاخد القرار اللى هايفرق مع صاحب الموقف الاول

اخيرا عايز اضيف حاجة

اننا احيانا فى حاجات بسيطة جدا ممكن نعملها تفرق مع اللى قدامنا .. مع انها مش هاتكلفنا حاجة

جرب وانت نازل من اى مواصلة تقول للسواق - او للى فتحلك الباب - شكرا

مش هاتخسرك حاجة

كيف تتسلل الى الاخر؟

معرفش ايه العنوان الغريب اللى انا كتبته ده
بس الموضوع جه ف بالى وحبيت اكتب فيه
ازاى تتسلل للاخر؟
يعنى ازاى تخش جواه وتخليه يعتبرك (منه وعليه)
او ازاى تبقى شخص محبب للى قدامك او مقرب منه

الكلام النظرى سهل
بس الكلام العملى حاجة تانية
ممكن جدا تبقى عارف كويس وفاهم كل ده وازاى تعمل ده عشان تخلى اللى قدامك يحبك
بس عمليا ماتعرفش تنفذه
او ماتقدرش تنفذه
ماتقدرش من كونه صعب على نفسك مش صعب عليك نظريا
زى ان حد يبقى متخاصم مع حد
كونه يبقى عايز يسلم عليه بس (مش قادر) معناها انه صعب على نفسه انه يعمل كدة .. مش انه تعبان ومش قادر يقوم من مكانه يروح يسلم عليه
ده مثلا يعنى

فبنفس المنطق .. بيبقى صعب علينا او بنبقى (مش قادرين) ننفذ الكلام ده
اما لمخزوننا الوراثى من العادات والتقاليد او من طريقة التعامل مع الاخرين اللى ورثناها وتطبعنا بيها غصب عننا
او لعيب بيبقى فينا احنا انه صعب علينا نحس باننا (بننتقص من قدرنا) لما نعمل حاجة نقرب بيها من الاخر


ـــــــــــــــــــــــــــــــــــــــــــــ


انت بتحب ايه من الناس؟

الناس زيك .. لان انت من (الناس)
فالـ(ناس) بيحبوا اللى انت بتحبه منهم .. ومابيحبوش اللى انت مابتحبوش منهم
لو اول ما نزلت الشارع وواحد بصلك بصة وحشة او كلمك بخنقة .. هاتحس نفس الاحساس اللى هو هايحسه لو هو اللى نازل الشارع وانت بصيتله نفس البصة او كلمته بنفس الطريقة
ولو وانت ف الشغل شفت زميلك عمل حاجة كويسة فمن نفسك شكرته او اشدت بيه .. هايحس نفس الاحساس اللى انت هاتحسه لو هو اللى شافك عملت حاجة كويسة ومن نفسه شكرك او اشاد بيك

هى مش (كما تدين تدان) بالظبط
بس اللى ترضاه لنفسك ارضاه لغيرك .. ماترضاهوش لنفسك ماترضاهوش لغيرك
او ممكن اصحح الجملة دى واقول
اللى ترضاه لغيرك ارضاه لنفسك واللى ماترضاهوش لنفسك ماترضاهوش لغيرك
يعنى اللى ترضى انك تعامل الناس بيه .. اوعى ماترضاش ان الناس تعاملك بيه
يعنى لو عاملت الناس بطريقة وحشة .. اوعى تتوقع حاجة غير انهم هايعاملوك وحش
والطريقة اللى ترضى انك تعامل الناس بيها .. لازم ترضى ان الناس تعاملك بيها
ممكن اضيف .. اللى تحب الناس تعاملك بيه .. عاملهم بيه الاول وشوف النتيجة

(عامل الناس كما تحب ان يعاملوك)


ـــــــــــــــــــــــــــــــــــــــــــــ


طيب .. يعنى برضه اعمل ايه ولا ما اعملش ايه
وياترى وجهة نظر الناس فى اللى انا بعمله ده هاتبقى ايه؟ وهل هايتقبلوه ولا لا .. والمفروض اعمله ازاى
الموضوع مش كيميا
زى ما انت هايفرق معاك انك وانت ماشى ف الشارع تلاقى اللى قدامك - و جت عينك ف عينه - ابتسملك
مش هاتخسر حاجة ابدا لو وانت ماشى وعينك جت ف عين حد ابتسمت نص ابتسامة .. حتى لو حسيت انه استغرب
مش هاتخسر حاجة ابدا لو وانت ماشى عديت جنب مجموعة وكانت المسافة بينكوا مش بعيدة انك تقول سلام عليكم
ماتجيش تقول يا عم ماحدش رد عليا وانا كرامتى وقللت من مش عارف ايه ونفسى . مانت اللى عمال تقولهم سلام عليكم سلام عليكم ازاى الحال .. وانت شايفهم عمالين يتناقشوا وشكلهم بيتكلموا ف موضوع مهم
بس مش هاتخسر حاجة لو عديت من جنب ناس قاعدين عادى وقلت سلام عليكم .. حتى لو ماحدش رد عليك
يا اخى لو ردوا عليك هاتاخد حسنة وهاتاخد حسنة تانية انك خليت الراجل يرد عليك السلام واديته حسنة وبالتالى انت خدت حسنة نتيجة ان انت خليته ياخد حسنة
حتى لو ما ردش عليك .. احساسك الداخلى بان كرامتك قلت خليه يتنيل يمشى وييجى بداله احساس ان انت راجل محترم
المفروض كرامتك ماتحسش انك قللت منها لما تنزل من ميكروباص وتروح قافل الباب وتقول للسواق شكرا يا اسطى .. هاتفرق معاه كتير .. وحتى لو ما فرقتش معاه فنظرة الناس اللى راكبين معاك ليك هاتعلى .. ولو حتى مع واحد هايقول الراجل ده محترم
لو قصاد كل 12 واحد راكبين معاك فى الميكروباص قالوا عليك " الواد ده اهبل ولا ايه؟" واحد بس قال "والله راجل محترم" .. تبقى انت الكسبان
لازم تحس انك راجل محترم لو وانت واقف ف الشارع وست معدية رحت متحرك عشان تبعد وتفضيلها المكان تعرف تعدى
لازم تحسسها بالامان .. وان لسة فى رجالة ف البلد وان البلد بخير وان وان وان .. حتى لو اللى انت هاتعمله حاجة هابلة اوى
حتى لو كان كل اللى هاتعمله انك وانت ماشى لقيتها جاية من ناحية تروح واقف مستنيها تعدى او تبعد عنها وتمشى ع الجنب التانى م الطري وماتبصش عليها
حتى لو لقيتها ماخدتش بالها اصلا او ما اهتمتش بالموضوع وماقالتلكش شكرا وميرسىىىى
مش هاتعمل كدة هى .. بس خليك واثق انها هاتحس من جواها بالامتنان من ناحيتك وهاتشكرك وتقول عليك الراجل ده محترم كتر خيرك ربنا يكرمك
انت مستنى منها تبصلك وتضحك وهئ ميرسى يا كابتن؟ .. مش دول اللى توسعلهم الطريق عشان يعرفوا يعدوا براحتهم


ـــــــــــــــــــــــــــــــــــــــــــــ


الناس بتحب تحس بنفسها
انت بتحب تحس بنفسك .. حسس الناس بنفسهم

انت بتحب الناس تشكرك او تشيد بيك او تقول انك كويس او تحس ان الناس شايفينك واو
زميلك ف الشغل عمل حاجة كويسة .. وفعلا تعب فيها وعملها من مجهوده
ايه اللى هايضيرك لو اشدت بيه وشكرته وقلت للناس ده زميلى وعمل كذا وحسسته انك فخور بيه؟
احساسك بالغيرة ساعتها مش هايعمل غير انه يسود قلبك , ويخليك قاعد متضايق .. وكدة كدة اصلا انت مفيش ف ايدك حاجة تعملها .. هاتغير ليه؟ .. خلاص هو عمل الحاجة فعلا والناس شكرته عليها وعلى مجهوده المستحق .. غيرتك هاتضرك مش هاتنفعك
توقع غيرك يغير منك لما انت تغير من غيرك
ممكن ف مرة تعمل حاجة وتحسها هبلة اوى وتلاقى الناس شكرتك عليها بشكل غير متوقع واشادوا بيك وبمجهودك .. هاتحس ان تعبك ماراحش هدر

اضحك للناس
لو اللى قدامك قال نكتة او قفشة .. مش هاتخسر حاجة لو ضحكت .. او حسسته انه (مش تافه)
احساسك الداخلى بالهبل او انك عبيط انك بتضحك على حاجة انت شايفها ماتضحكش اوى كدة ماهواش صح .. مش هايفيدك ف حاجة
خلى بالك مابقولكش تكون تافه .. مش يقولك مرة واحد ماشى وقع تروح قايل هههههههه .. ده اسمه هبل .. او وصولية لو كان اللى قال النكتة دى مديرك
بس كتير اللى قدامك بيقول حاجة شايفها مضحكة .. وانت شايفها اه مش وحشة عادى بس ماتضحكش عليها
لو ضحكت عادى مش هاتخسر حاجة .. ما بقولش رفس ف الارض وامسك بطنك وكركر .. بس ابتسامة وضحكة صغيرة هايلطفوا الموقف
وهايفتحوا قلب اللى قدامك من ناحيتك

الناس بتحب اللى يحسسها ان كلامهم ذو قيمة
اسمع اللى قدامك كويس .. وماتحسسوش ان كلامه دخل من هنا وخرج من هنا او انه بيتقال ف الهوا
يعنى بص للى قدامك وهو بيكلمك وماتبصش بعيد .. انت لما بتكلم حد ويكون مش باصصلك بتحس انه مش مهتم بكلمك وبتفكر ف دماغك تقول هو باصص على ايه .. وممكن تبص ف الاتجاه اللى هو باصصله عشان تشوفه هو مهتم بايه اكتر من كلامك دلوقتى (باعتبار ان كلامك اهم من اى حاجة)
مع انه ممكن جدا اصلا يكون بيسمعك ومركز معاك ومش باصص على حاجة محددة
نفس الفكرة
بص للى قدامك وهو بيكلمك .. وحسسه بالاهتمام .. وانك مهتم بكلامه
ويا سلام لو علقت على كلامه .. هايحس انك فعلا مركز ومهتم بالكلام ده
حتى لو كان تعليقك بالرفض
نقى اسلوب رفضك لرأى اللى قدامك .. ونقى اسلوب توصيلك للمعلومة
ماتقولوش ايه الهبل اللى انت بتقوله ده يا عم لاااا انت غلط خالص او احنا هانعمل حاجة تانية خالص
هايتقفل منك وش
تقدر تقوله اه جميل فعلا بس انا شايف اننا ممكن نعمل حاجة تانى .. هاتلاقيه بادلك التركيز وقالك ايه .. لو قلتلك رايه .. ممكن جدا تلاقيه ف الاخر وافق على كلامك ونسى كلامه خالص
لما توصل معلومة للى قدامك حاول تحسسه انك بتوصلهاله لمصلحته .. او انك مهتم بيه ومش عايز توصله الكلام اللى انت عايزه وخلاص
حاول تفهمه انك معاه وانك مأيده بس فى تعديلات او حاجات مطلوب تتعمل عشان الوضع يبقى مثالى

اكتر حاجة الناس بتعملها هى انها تتكلم
لو حسست اللى قدامك انك مهتم باللى هو بيعمله .. خواجز كتير هاتقع بينك وبينه


ـــــــــــــــــــــــــــــــــــــــــــــ


افتكر كلام اللى قدامك

احساس اللى قدامك لما يلاقيك افتكرت كلمة عابرة قالها وسط الكلام او حاجة كان قالها عادى وهو مش ف باله ويلاقيك افتكرت ده او نفذت حاجة كان بيقول عليها او عايزها او كدة .. مش هايقل عن الاحساس بالعجز

الناس بتحب الناس تفتكرهم
انت بتحب ف عيد ميلادك الناس كلها تفتكرك وتقولك كل سنة وانت طيب ويهتموا بيك
ليه؟ .. لانك بتحب الناس (تفتكرك) .. تحسسك بالاهمية , وتحسسك بانك ف بالهم

احساس الاخر هايكون لا يوصف لما تفتكر كلامه اللى قاله من فترة او طلب كان طلبه او حاجة كان عايزها

خطيبتك قالتلك ف وسط الكلام انها حلمت انها ماشية ف جنينة وماسكة وردة بنفسجى ولابسة فستان بمبى وقابلتك واتكلمتوا ومش عارف ايه
لو تانى يوم لقيتك (مش هاقول جايبلها فستان بمبى لا) لقتك جايبلها وردة بنفسجى
هاتطير م الفرحة
عشان انت اهتميت
عشان اهتميت بكلامها .. حاجة عابرة قالتها ف وسط الكلام حتى لو هى ماكانتش مهتمة اوى او ماكانش قصدها توصلك انها عايزة ده .. كانت مجرد بتقولك معلومة
وانت اهتميت .. خدت المعلومة وخزنتها
مش شرط عشان خطيبتك او عشان ده حد بيحبك او انت بتحبه
اى حد كدة
لو انت (اهتميت) بكلامه او بيه .. هاتفرق جدا
اهتم باللى قدامك هايهتم بيك

ـــــــــــــــــــــــــــــــــــــــــــــ

كنت عايز ازود كلام كتير بس قلت كدة كفاية

اصلا عارف انى مش هالاقى حد مهتم بالكلام ده

اصلا معرفش ايه اللى انا كتبته ده