زى النهاردة من 8 سنين, 30 يونيو 2003 .. خلصت ثانوية عامة
اول ما خلصت امتحان الرياضيات 2 قعدت اعيط جامد
واللى معايا ف اللجنة فضلوا يقولولى طب راجع معانا يمكن تكون مش حالل غلط
انا ماكنتش بعيط عشان حالل غلط ولا حاجة .. انا كنت اخيرا تخلصت من ضغط نفسى وعصبى سببلى عقد نفسية يمكن تكون مصاحبانى لحد دلوقتى
خلصت الامتحان ورحت الستاد يوميها كان نهائى كاس مصر بين الاهلى والاسماعيلى ورفضوا يدخلونى الستاد عشان كان معايا الة حاسبة
اقولهم يا جدعان انا كان عندى امتحان يقولولى لا .. طب اعمل ايه .. وديها البيت وتعالى
اتغير فيا حاجات كتير اوى ف ال8 سنين اللى فاتوا دول
8 سنين يعنى اقل بحاجة بسيطة من ثلث عمرى كله
وزى النهاردة من سنتين - 30 يونيو 2009 - بابا كان هايتحجز فى المستشفى بس هو مارضيش وقالهم هايبقى يجيبلهم عينة من الكبد والكلى من عيادة خارجية
زى امبارح بالليل من سنة - 29 يونيو 2010 - كنا واقفين ف الشقة بنتفرج عليها عشان نقرر هانعمل ايه فيها وهانحط هنا ايه وهنا ايه
كانت اول زيارة بعد ما قرينا الفاتحة .. اللى كانت زى يوم الحد اللى فات من سنة .. 26 يونيو 2010
ياترى 30 يونيو 2012 هاكون فين؟
ف بيتى مع مراتى؟ هاتكون حامل؟
هاكون ف شغل تانى احسن او اترقيت ف الشغل اللى انا فيه؟
علاقتى هاتكون عاملة ازاى بالناس؟
الناس هاتكون ردت على ام المدونة اللى بيخشوها بس ومابيردوش عليها دى؟
ياترى 30 يونيو 2013 هايكون ازاى؟
هاكون شايل عيل ولا لا؟
مرتبى هايكون وصل كام ساعتها؟
ولا هاكون عاطل؟
ياترى 30 يونيو 2019 - كمان 8 سنين - هايكون عامل ازاى؟
هاكون قاعد بتكلم مع بنتى اللى هاتكون خدت اجازة اخر السنة وقاعدين نرغى انا وهى ف البلكونة وبحاول أثقفها وأعلمها حاجة جديدة؟
هاكون عملت اول مشروع ولا لا؟ ياترى هاينجح؟
ياترى 30 يونيو 2035 هايكون عامل ازاى؟
بنتى الكبيرة ان شاء الله هاتكون خلصت الجامعة؟
هاتكون لسة بتحبنى؟
هاتكون لسة بتحبنى؟
هاكون بقيت رئيس للجمهورية؟
مشاريعى هاتكون كبرت ولا لا؟ بقيت مشغل كام واحد؟
ياترى هاكون عايش؟
كله فى علم الله
____________________________________________
شهر يوليو السنة اللى فاتت كان صعب اوى
من الشهور اللى الواحد مايحبش انها تتكرر تانى
يارب السنة دى يكون مختلف, واعرف اعمل الحاجات اللى انا عايز اعملها فيه
هناك 9 تعليقات:
طب انا هرد ف ام المدونة دى
واقولك اهو
ان شاء الله
كل ما ف خيالك من حاجات حلوة تتحقق يا عمرو واحلى منها كمان
ربنا يسعدك انتا و عروستك
و تكون زوجة الدنيا والجنة يا رب
حلوة فكرة البوست
متفائلة كدا
لو فكرت اكتب واحد عندى على هذا المنوال هتبقى مصيبة وغالبا هتكون توقعاتى لروحى نكد ف نكد ف نكد
الخوف م المجهول بقى بعيد عنك
عاجبنى انك باصص للنص المليان واحسبه ايمان بربنا وكرمه اكتر من أى شىء تانى ودا اللى احنا غالبا بننساه ف وسط الاحاداث المرة المريرة اللى بنمر بيها كتيييير
ربنا يسعد كل ايامك يا رب
اختك
فاتيماااااا
حلو البوست ده .. فكرته لذيذة
ان شاء الله اللى جاى هيكون أحلى
عارف ليه ؟
عشان انت تستاهل ده ياعمرو
_____________
نفسى اعرف بتفتكر ازاى كل التواريخ دى ؟ :ahbal:
______________
انا - تقريبا - اكتر المدونات اللى بتعجبنى مش بعلق فيها
معرفش ليه - بس يمكن من كتر الاستقنياص من البوستات الحلوة مش بلاقى رد يعبر عن اللى جوايا او بحس ان مهما اكتب مش هيوصف الاحساس برده
ده حقيقى والله
_______________
اكيد يعنى هكون لسه احلى ست <_<
_____________
ربنا بيدى دايما كل واحد على قد نيته
خليك دايما فاكر الجملة دى
مهما تنجح او تفشل ربنا برده هيديك فى الاخر على قد نيتك
وانا عمرى ما شوفت حد زيك فى طيبتك
صحيح مفيش حد فينا خالى من العيوب بس الطيبة او حتة ان الانسان يتمنى لغيره الخير اكتر من نفسه دى اللى صعبة
وعلى قدها ربنا بيدى الانسان
مش لازم حاجات مادية بس كفاية الاحساس بالرضا والراحة
_____________
ابقى اسمع العسيلى فى ملك مدينة ..
_____________
انا كمان فاكرة شهر 7 اللى فات
قد ما بيبقى فى اوقات صعبة كتير بتعدى علينا .. قد ما بتبين الانسان اللى ادامنا من مواقفه
انا متفاجأتش بيك انت بس فى الفترة دى واللى حصل فى شهر 6 واللى قولته برده
انا اتفاجأت بنفسى انا
انا حاسة انى كتبت بوست مش تعليق huh
ليه كدة بس يا فاتيما؟
الدنيا فيها حاجات حلوة بس احنا ندور عليها, ونؤمن بيها, ويكون عندنا اصلا الرغبة ف اننا نشوفها
ربنا يكرمك
اتفاجئتى بنفسك ازاى يا ريهام؟
انا مش من النوع اللى بيستحمل المواقف اللى زى دى
بمعنى لما بمربموقف صعب او وحش - بهرب على طول
وانت سيد العارفين يعنى - لاما بتخلى عن الموقف او ببيع اللى ادامى
مبحبش انى اتحط فى موقف يوجعنى - اى حاجة تخصنى وبايدى انى انهيها .. بنههيها عادة
ساعتها بقى مكنش الاوبشن ده موجود اصلا فى بالى - مفتكرتهوش غير لما انت اللى قولتلى اللى مخليانى استحمل او اكمل يعنى تمسكك بيا
ساعتها بدات استوعب نفسى .... حتى فى البيت متخيلوش ده منى يعنى لحد انهاردة
اختصارا للقول - زى ما الناس المثقفة بتقول - اتفاجأت فعلا بمدى تمسكى بيك
الله
:)
مدونة جميييييييلة جداااا
وعجبني التفاؤل .. ولو اني اترعبت بردو لما فكرت يا ترى انا كمان 8 سنين هكون عاملة ازاي فين مع مين :(
ان شاء الله 8 سنين تكون مع بنتك في البلكونة بتدردشو مع بعض :) وخطيبتك هتكون لسة احلى ست في الدينا :) ربنا يكرمكو انتو الاتنين ويوفقكو في حياتكو يارب :)
:)
حج مقبول وسعي مقبول عقبالنا يا رب:)
إرسال تعليق