المدونين بيشجعوا مصر .. واحنا معاهم

شفتوا اعلانات كوكاكولا بتاعة كاس الامم؟ بشعة :lol:

قالوا العصبيين بيشجعوا مصر .. واحنا معاهم
المستجدين بيشجعوا مصر .. واحنا معاهم
الخ الخ

وانا باقول المدونين بيشجعوا مصر .. واحنا معاهم
طبعا مش متفاءل نهائيا
بس لازم اشجع مصر

حسن شحاتة اخطأ وبشدة ومن البداية
اختباراته غريبة للغاية

نشوف الاول ال30 لاعب اللى كان شحاتة مختارهم للقايمة المبدأية

عصام الحضرى - محمد عبد المنصف - محمد صبحى - وائل خليفة
احمد فتحى - احمد المحمدى - احمد سمير - السيد معوض - اسامة محمد - طارق السيد
شادى محمد - وائل جمعة - شريف عبد الفضيل - ابراهيم سعيد - هانى سعيد - معتصم سالم - محمود فتح الله
حسنى عبد ربه - محمد شوقى - وليد سليمان - حسام غالى - عمر جمال - حسن مصطفى - محمد ابو تريكة - احمد حسن - احمد شعبان
عمرو زكى - عماد متعب - محمد زيدان - محمد فضل

الحراس : عصام ماشى .. عبد المنصف ماشى .. انما ازاى تختار محمد صبحى ووائل خليفة؟ محمد صبحى اصلا مابيلعبش باستمرار مع الاسماعيلى !
اكيد امبر عبد الحميد مهما كان مش بيلعب بس برضه احسن .. واكيييييييد شريف اكرامى احسن واحسن !
الباكات : على اى اساس تم ضم طارق السيد؟ مش انت كنت مش مقتنع بمستواه من شهر واحد بس؟ ايه اللى غير فكرتك عنه؟ مع انه ماعملش فى الشهر ده الماتشات الجبارة يعنى اللى تخليك ترجع تضمه للقايمة تانى !
المدافعين : شريف عبد الفضيل بيعمل ايه؟ وفين عماد النحاس وعبد الظاهر السقا اللى عندهم خبرة كبيرة احنا مش محتاجين غيرها !
لاعبى الوسط : على اى اساس تم ضم احمد شعبان؟ عشان حط جون ف الزمالك يعنى؟ طب وليد سليمان؟ ماهو لو بالشكل ده وبتحسبها بالاداء يبقى اكيد حسام عبد العال وممدوح عبد الحى بتوع الجيش افضل اتنين فى الدورى حاليا .. زى برضه ما اختارتش ولا مدافع من الجيش اللى هو اقوى خط دفاع فى مصر !
المهاجمين : فين ميدو !!!!
ميدو لو برجل واحدة احسن من كل دول !
يكفى اسم ميدو بس عشان يخصصله الفريق المنافس مدافع خاص بيه لوحده عشان يمسكه وينزل معاه ويفضى مساحة اللى جايين من تحت وخصوصا زيدان وابو تريكة !
وميدو اصابته بدأت تخف واحتمال يرجع لمستواه لو مصر صعدت للدور التانى ! .. ولا هى تصفية حسابات؟؟؟؟
وفين احمد بلال؟ .. مش هاقول اسامة حسنى هجاف كاس العالم العسكرى الاخيرة بالمناصفة مع عبد الحميد بسيونى


طب نشوف قايمة ال23 لاعب النهائيين
عصام الحضرى - محمد عبد المنصف - محمد صبحى
احمد فتحى - احمد المحمدى - السيد معوض - طارق السيد
شادى محمد - وائل جمعة - ابراهيم سعيد - هانى سعيد - محمود فتح الله
حسنى عبد ربه - محمد شوقى - عمر جمال - حسن مصطفى - محمد ابو تريكة - احمد حسن - احمد شعبان
عمرو زكى - عماد متعب - محمد زيدان - محمد فضل

الحراس : استبعد وائل خليفة مع ان مستواه حاليا احسن من محمد صبحى بمراحل
الباكات : استبعد احمد سمير .. ماشى .. واستبعد اسامة محمد وساب طارق السيد !!!! لا يا شيخ !
طارق ايه بس اللى انت ضامه؟ تعمل بيه ايه؟ اسامة محمد مستواه احسن منه بكتير وجسمه قوى منه بكتير وهايساعد بكتير قصاد لعيبة الكاميرون بالذات والسنغال او انجولا فيما بعد
المدافعين : استبعد معتصم سالم للاصابة وشريف عبد الفضيل .. ماشى
لاعبى الوسط : استبعد وليد سليمان .. بس اسمع الدواعى بقى .. استبعد اسامة محمد ووليد سليمان الاتنين ليه؟ عشان خبرتهم قليلة
طب وانت اكتشفت النهاردة بس ان خبرتهم قليلة؟ ماكنتش تعرف قبل كدة يعنى؟ مانت اكيد عارف م الاول ان خبراتهم قليلة طب ضميتهم ليه على حساب اتنين ممكن يكون عندهم خبرة وتضمهم ومش هاقول اساميهم ! .. واستبعد حسام غالى بالاجبار عشان حسام غالى مضى عقد مع ديربى كاونتى وفيه شرط انه مايلعبش مع مصر فى كاس الامم ! طب لما انت عارف م الاول ان فى امكانية حدوث حاجة زى كدة .. ليه ضامه م الاول اصلا على حساب واحد زى محمد حمص مثلا .. او حتى اللى ماعندهومش خبرة هانى العجيزى ومحمود سمير .. او المتألق مؤخرا جمال حمزة .. او حتى اصحاب الخبرة عبد الحليم على واحمد بلال
المهاجمين : ماكانش فى مجال انه يستبعد حد طبعا


المهم انهم ف الاخر 23 لاعب شايلين اسم مصر ورايحين كوماسى وياعالم هايعملوا ايه انا عن نفسى مش متفاءل نهائيا .. ولو اتعادلنا مع الكاميرون يبقى كويس .. وان كنت اتوقع اننا نتغلب بفرق جون مثلا واتمنى نقدر نصعد تانى مجموعة مع الكاميرون ونلاعب اول المجموعة الرابعة اللى اتمنى بجد يكون انجولا ومايكونش لا السنغال ولا تووووووونس