البوست ده نشرته السنة اللى فاتت .. وحابب اعيد نشره زى ما هو
احيانا بحسد نفسى ونفسنا على اننا عندنا صلاة العيد
وعلى شكلنا ساعتها
بحب اوى شكل الصلاة
لما ادخل او اقرب ع المكان والاقى التجمعات
ورجالة قاعدين وماسكين ايدين عيالهم الصغيرين
وستات وبنات لابسين اسدالات وبيجروا داخلين يصلوا
والفرش اللى ف الشارع اللى بيسد الطريق تماما
ونفضل نقول من قبلها بفترة طويلة تكبيرة العيد
الله اكبر الله اكبر الله اكبر .. لا اله الا الله .. الله اكبر الله اكبر .. ولله الحمد
ساعات بقعد مع نفسى سايبهم يقولوا التكبيرة دى وانا اقول الكبيرة
الله اكبر كبيرا .. والحمد لله كثيرا .. وسبحان الله بكرة واصيلا .. لا اله الا الله وحده .. صدق وعده .. ونصر عبده .. واعز جنده وهزم الاحزاب وحده .. لا اله الا الله .. ولا نعبد الا اياه .. مخلصين له الدين ولو كره الكافرون .. اللهم صل على سيدنا محمد .. وعلى اصحاب سيدنا محمد .. وعلى انصار سيدنا محمد .. وعلى ازواج سيدنا محمد .. وعلى ذرية سيدنا محمد وسلم تسليما كثيرا
وقبلها وبعدها التكبيرة العادية اللى بتتقال
والناس اللى بتعدى بتمر ع الناس عشان يفطروهم .. بالمناسبة ماكانوش موجودين عندى النهاردة
ولما نقوم عشان نصلى والشيخ يبدا يقول التكبيرات
بحبها جداااااااااااااا .. بحب لما يقول الله اكبر والناس كلها تقول وراه بصوت عالى الله اكبر .. ويسكت شوية واسمع صدى الصوت واحس انه بيرج الشارع .. سمعت بالمناسبة ان مش صح انى اقول وراه بصوت عالى او انى ارفع ايدى ف التكبير
ولما اقول وراه الله اكبر واتلخبط كل مرة ف النص وانسى احنا وصلنا للتكبيرة الكام
ولما يقرا سورتى الاعلى والغاشية
ولما بباخد معايا كل مرة الموبايل وافضل اصور ف الناس, واول ما يبدا الصلاة اشغل الريكوردر واسجل الصلاة مع بعض التكبيرات .. بالمناسبة ماخدتش الموبايل معايا السنة دى معرفش ليه
وبعد الصلاة لما اللى جنبى يمد ايده عشان يسلم عليا والاقيه سلم على اللى بعدى فاللى جنبى م الناحية التانية يسلم عليا ونلاقى الصف كله بيسلم على بعضه .. سمعت برضه ان ده مش سنة وانما هى بدعة .. بس عموما السلام بس مش مشكلة على اعتبار "افشوا السلام بينكم"
ولما اقعد اسمع اول جزء م الخطبة بعد الصلاة .. واللى دايما - اى شيخ - يبداها بان كان الافطار بالامس حراما, وصار الصيام اليوم حراما
ولما اقعد اسمع اول جزء م الخطبة بعد الصلاة .. واللى دايما - اى شيخ - يبداها بان كان الافطار بالامس حراما, وصار الصيام اليوم حراما
وبيشدنى جدااااااااااا شكل العيال الصغيرة اللى مع اهاليهم .. تحس انهم "بواقى وقعت منهم"
التخين ومدور وماسك ابنه تخين مدور زيه, تحس كورتين واقفين جنب بعض واحدة كبيرة وواحدة صغيرة .. وابو نظارة وماسك ابنه ابو نضارة زيه, والواد يقعد يعدل ف النضارة ويحرك دماغه حركة عصبية كدة تنبئ بانه مشروع geek صغير
وبعدين لما اروح واول ما ادخل البيت اول حاجة اعملها اجيب اى حاجة اكلها بونبونى او سودانى او كحكاية او اى حاجة
بالمناسبة مابحبش كحك العيد .. ولا البسكويت ولا الغريبة ولا اى حاجة
بحب صلاة العيد
كل سنة وانتوا طيبين
هناك 9 تعليقات:
يا عمرووووووووووو
كل سنة وانتا طيب
يا غالى انتى وريرى على قلبى
عندك تعليق كتبته امبارح
ف بوست محمد منير
بص عليه ضروروووووووووووى
ورد علياااااااااااااااااااااااا
عشان اعرف آجى يا بنى
لأن العنوان غامض ومبهم
وانا مش عارفاه فين .. ؟
هستنى الرد بقى
انا فرحانة قوووووووووى
:)
كل سنة و انت طيب
عيد سعيد عليك
تحياتى
فين بوست الجواز يا عمووووور :D
كل سنة و انت طيب
و هى كمان (:
و ألف مبرووووك
ربنا يسعدكم و يكون معاكم فى حياتكم اللى جاية
(:
طيب تانى تعليق ومش عارفة اكتبه فين غير هنا
بس لازم اقوله
لأنى من اول ما رجعت من الجامع
ومن وانا هناك والله
وانا مغمورة بالمحبة والفرحة
عشانكم وبسببكم يا عمرو انتا وريرى
اولا
انا عاوزة اشكركم جدااااااااااا
لأنى اتعزمت
وخلتونى اشوف الفرحة دى
واكون ف اليوم اللى ميتكررش دا
وبقى ذكرى عندى
هقولها لعيالكم ان شاء الله
انى شفت بابا وماما وهما عرسان
وهما حبايب
وكدهون
:)
ثانيا
عاوزة اشكركم
لأنى شفتكم وانتوا زى القمر
انتوا الاتنين
واول مرة اشوف ريهام
وماشاء الله حلوة وضحكتها تجنن
انا بحكم ع الجمال من الضحكة
واللى ضحكته مش حلوة
مش بشوفه حلو
وريرى ضحكتها تملا مدرج كورة
بالبهجة والفرح ..
واصلا أصلا أى عروسة
اللون الأبيض والطرحة
بيخلوها منورة وفيها حاجة مختلفة
وزى القمر ..
وريرى كانت قمرين تلاتة اربعة
وانتا كنت قمور قوى
ووشك باسم ومنور انتا كمان
ربنا يحرسكم يا رب من كل شر
ويحفظكم من كل عين
ثالثا
عاوزة اشكركم عشان منظركم
وانتوا بينكتب كتابكم
كان حلو قوى
والكلام اللى قاله المأذون
رغم انى بسمعه كتير
بس وهوه بيقوله
وانتوا الاتنين قاعدين جنبه
خلى ليه معنى تانى مختلف
وانتوا قاعدين كدا
وانا بسترجع كل كلمة انتا وريرى
كتبتوها عن بعض
وعن قصة حبكم
ومشاعركم الصافية
ورغبتكم انكم تتلموا ف بيت واحد
وتعيشوا سوا باقى العمر
كل دا افتكرته ..
وحسيت فرحة كبيرة قووووووى
ان ربنا كرمكم وجمع ما بينكم
ولم القلبين الحلوين الطيبين دول
اللى بيدقوا جواكم ..
حسيت بجد وانا بشوفكم
وبتفرج عليكم من بعيد
ازاى بجد الجواز دا نعمة
وازاى لما ناس بتنفصل عن بعض
ليه عرش الرحمن بيهتز ..
عشان البهجة والفرحة والخير والسكن
وكل شىء طيب ف العلاقة دى
ميستاهلش غيلا انه يتحافظ عليه
بأقصى درجة ممكنة
لما لقيتكم والمأذون بينصحكم
وانتوا بتضحكوا
وانا بضحك معاكو من بعيد
كنت عاوزة اقوله يا عم ايه
انتا متعرفش حاجة
دا كل واحد فيهم هيشيل التانى
ف نن عيونه ويحافظ عليه
اكتر ما هيحافظ على روحه
خلصنا بقى
عاوزين نجوزهم
:)
ربنا يسعدكم يا عيال
ويحلى كل أيامكم
وتغرقوا ف العسل
وميخلصش أبدا
الف مليون مبرووووووك
ومعلش معرفتش اتكلم ولا اقول حاجة
ولا لحقت احكى لريهام ولا أعبرلها
عن فرحتى
بس مكنش فيه وقت
وسلاعات الموقف بيكون أكبر من أى كلام
والفرحة كمان .. بتفوق الوصف
ربنا يخليكم لبعض
وتفرحوا العمر كله
ويرزقكم الذرية الصالحة
ويبعد عنكم كل شر
اللهم آمين
الف مليون مبروووك
وعقبال لما أباركلكم
على اول بيبى بقى
:)
http://3.bp.blogspot.com/_otLy0-
P3VGg/TTza90Pq_WI/AAAAAAAADig/kHKQ4Ieyx-s/s1600/grass+heart+weheartit.jpg
-----------------------------
http://30.media.tumblr.com/tumblr_lz1keyrOyc1qkgblgo1_500.jpg
-----------------------------
http://www.youtube.com/watch?v=Su_goTHvUgY
----------------------------
Thank you for your wonderful topics :)
ازيكم يا عمرو انتا وريرى
طمنونا عليكم يا عيال
الغطسة طولت
يا رب دايما كويسين وبخير
وغرقانين ف العسل
بس طمنونا عليكم بقى
:)
وحشتونى
الف مبروك ليكو وربنا يديم عليكو الفرحه ويرزقكو بالذريه الصالحه
.....
بارك الله لكماوباركك عليكما وجمع بينكما في خير
إرسال تعليق