كلمة فى حق ثورة 2011

رسالة الى كل المصريين
الرسالة دى لكل واحد بيحب مصر
سواء كان ضد مبارك وعايزه يتنحى حالا او ضد مبارك وخلاص مستنيه يخلص فترة توليه الرئاسة او اصلا مؤيد لمبارك
بس لازم تكون بتحب مصر
الرسالة دى بس للى بيحبوا مصر
واقسم بالله الكلام اللى هاقوله حقيقى وطالع فعلا من جوايا
الكلام ده هايكون طويل اوى .. معلش ياريت تقراه للاخر

بس قبل ما تقرا اى حاجة لازم بس الاول تقرا وتفهم وتحاول تصدق
مش لازم تقتنع بكلامى .. بس ثق انه حقيقى ومش طالب منك الا انك تفكر فيه
توافق عليه بقى بعد كدة او ترفضه براحتك .. بس اقراه وحاول تفكر فيه وماتقراش بهدف بس انك تدور على ثغرة ترد عليها

ولازم نتفق ان كلنا بنحب مصر
انت مسلم وانا مسيحى او العكس .. انت اهلاوى وانا زمالكاوى او العكس .. انت بتحب الرز وانا بحب المكرونة او العكس!!!!
انت فيك كل الصفات اللى انا فيا عكسها تماما!
بس احنا الاتنين مشتركين ف ان بطايقنا مكتوب على ضهرها (مصرى) .. واننا احنا الاتنين فخورين بده


عايز اقول
الناس اللى ف التحرير دول مش اعداء
الناس اللى ف التحرير دول لسة واقفين ف التحرير عشانكم
الناس اللى ف التحرير دى بتحب مصر وعايزة الخير لمصر
انت شايف انهم غلط .. ده رايك .. بس هما من جواهم بيحبوا مصر
حتى لو انت شايفهم غلط بس لازم تصدق انهم بيحبوا مصر
عيب تهاجمهم .. وعيب تاخد منهم موقف معادى بالشكل اللى احنا شفناه اليومين اللى فاتوا دول
الناس دول حتى لو انت شايفهم غلط .. بس هما بيعملوا اللى بيعملوه وف دماغهم هدف واحد بس هو مصلحة مصر .. وبيعملوا كل ده عشان حاجة واحدة بس وهى مصر

اوعى تصدق ان البلد حالها واقف وماحدش بقى بيشتغل والناس قاعدة ف بيوتها والعمال اللى باليومية مش لاقيين ياكلوا وكل حاجة زاد سعرها الضعف والدنيا اتخربت .. عشان اللى واقفين ف التحرير دول مش عايزين يروحوا بيوتهم !
اوعى تصدق ان اللى واقفين ف التحرير دول ناس فاضية ومجرد بيتمادوا ف اللى بيعملوه عشان يعملوا منظر او عشان فى (قوى سياسية خفية) بتحركهم!
اوعى تصدق ان اللى واقفين دول اخوان او برادعى او احزاب .. بس
اه هاتلاقى ناس عايزة البرادعى واه هاتلاقى ناس اخوان
بس عددهم اد ايه من اللى هناك
البرادعى لما نزل وخطب ف الناس اغلب الناس اللى هناك رفض خطابه ولم يستسيغه .. الناس عارفين ان مش ده اللى ينفع يتكلم بلسانهم
ولما الاخوان بيحاولوا يكلموا الناس بيلاقوا رفض شديد .. الناس اللى ف التحرير تكاد تكون رافضة الاخوان نفس درجة رفضها للحزب الوطنى تقريبا
وكل اللى هناك من اكتر الحاجات اللى مخوفاه انه يلاقى ف الاخر الاحزاب المتصارعة اتخانقت مع بعض وطلعت على كتافهم عشان تسرق ثورتهم .. وكلهم رافضين الاحزاب دى
اصلا لو فى حزب قدر يجمع الناس دى كان زمانه اغلبية فى مجلس الشعب!

اغلب الناس اللى هناك ف التحرير فكرها حر
اغلب اللى هناك فكرهم حر
مالهومش اى انتماء الا انهم مصريين
مش تبع حد الا مصر
ومن كل فئات الشعب
شباب ولاد وبنات واطفال وكبار وعجائز ورجالة وستات اغنيا وفقرا .. كل فئات الشعب

انا كنت ف التحرير اول امبارح يوم التلات عشان اشارك ف المسيرة المليونية
فضلت واقف من تقريبا عشرة الا ربع الصبح لحد ستة ونص العشا .. ماوقفتش حتى على رجلى .. كنت عمال بتحرك طول الوقت ف الميدان رايح جاى
انا كنت شايف انى المفروض يكون ليا دور اقوى من انى اهتف زى اى حد .. فقلت اعمل زى كل اللى تطوعوا زيى ف الميدان وخدموا خدمة عامة
لقيت ناس بدات تنضف مكان كان فيه زبالة .. رحت انضف معاهم
وقفنا نشيل زبالة م الارض والناس بدات تتلم حوالينا وتصقف وتهتف هما دول رجالة مصر .. وناس كتير بدات تساعد وتشيل معانا
فى التحرير .. كان فى بنات هاى كلاس لابسين اخر موضة وشكلهم طبقة عالية وبنات ناس محترمين جدا .. وعمالين يدوروا على جوانتيات عشان يوطوا معانا ع الارض يشيلوا الزبالة م الارض
فى التحرير .. كان فى مصريين ماسكين ايد بعض عشان يحاوطوا علينا عشان توسعلنا مكان نتحرك بحريتنا .. مسلمين ومسيحيين مفيش فرق
شيلنا الزبالة ولمينا العصيان والحديد والطوب اللى كان موجود ولمينا وشيلناه بعيد ولمينا الزبالة ف اكياس كبيرة وشيلناها لحد اخر الميدان رميناها ف سلال الزبالة اللى برة خالص وجمعنا ازايز الميا لوحدها ومليناها ميا وبدانا نغسل ايدين بعض ودلقنا ميا ف المكان كله والناس بدات تشمر بنطلوناتها وتجيب مساحات وتمسح الميدان
اللى يعمل كدة .. يبقى عايز خراب مصر؟
اللى يوطى يلم الزبالة من بلده .. ده يبقى عايز يدمر مصر او يولع مصر؟
اللى يرفع المساحة ويمسح ارض بلده .. يقدر يرفع طوبة ويحدفها على اخوه؟
لا طبعا

بعد ما نضفنا المكان لقيت دور تانى .. بقيت الم ازايز الميا الفاضية من الناس واروح املاها وارجع الميدان اوزعها ع اللى عايز يشرب .. اشرب الناس وافضى الازايز وارجع املاها وارجع اوزع ميا ع الناس وهكذا
وفضلت اعمل كدة لحد ستة ونص العشا واقسم بالله من غير ما اشرب بق ميا واحد ولا اكل لقمة
ماكانش ف بالى اصلا .. كان المهم انى احس انى بعمل حاجة للبلد
والجدير بالذاكر بقى .. انى ماكنتش لوحدى
كان فى كتيبة من الشباب بيعملوا كدة معايا ومن غير اتفاق
كنا بنتقابل بالصدفة عند الحنفيات واحنا بنملا الازايز او وقبل الاذان وبعده واحنا ماسكين الازايز وبنوضى الناس او واحنا بنلف ف الميدان وبنقول حد عايز يشرب يا جماعة؟
شباب كتير عمل كدة بشكل تطوعى ومن غير ما يكون هدفهم لا وجبة ولا خمسين جنيه ولا كلام فاضى من ده غير انهم بس عايزين يساعدوا المصريين
لفيت ميدان التحرير على مدار اكتر من 8 ساعات .. وقابلت عشرات الالف من الناس وشفت مئات الالاف من الوشوش وملايين اليفط
الناس دى بتحب مصر بجد
الناس دى هدفها الاول ان مصر تبقى احسن .. اكثر استقرار وامنا واكثر رخاءا
مسيحيات ومنتقبات واقفين حاضنين بعض وماسكين يافطة واحدة مكتوب عليها مسيحيون مسلمون كلنا مصريون ولا لمبارك
مجموعة بنات واقفين عددهم كبير فمجموعة تانية من الشباب مايعرفوهومش وقفوا حواليهم وعملوا كردون وهما مديينهم ضهرهم ومسكوا ف بعض جامد عشان ماحدش من المتظاهرين يخبط ف البنات دى بالغلط
الناس ماكانش فى شبر فاضى تمشى فيه وكانوا بيخبطوا ف بعض واللى يخبط ف التانى يلاقى التانى يبصله بابتسامة
الناس دى طيبين اوى .. وبيحبوا بلدهم اوى
وعيب اوى لما يتقال عليهم مخربين او قابضين فلوس عشان يوقفوا حال البلد
الناس دى عايزة البلد حالها مايقفش

3 مليون مصرى
بيهتفوا لمصر .. رافضين للنظام
من غير شتيمة .. من غير تعدى على الاخر
3 مليون مصرى بدون حالة سرقة واحدة .. بدون حالة تحرش واحدة
بدون اى محاولة تخريب .. بدون اى محاولة للشجار
3 مليون واقفين بيساندوا بعض وبيقولوا لبعض احنا بنحب البلد دى

انا كنت طول اليوم مش مع حد اعرفه
بس ماكنتش لوحدى يعنى
كنت بتعامل مع ناس اول مرة اشوفهم ويشوفونى وكأننا نعرف بعض من سنين
شفت امبارح رجالة بجد .. سواء ذكور او اناث .. وشفت بنات بميت راجل

السؤال بقى دلوقتى .. هل اللى ف التحرير دول هما اللى واقفين حال البلد ومقعدين الناس ف بيوتهم ومغليين الاسعار؟
نفكر بالعقل شوية
الغلا بسبب حظر التجول ومفيش مواصلات ومفيش شغل عشان حظر التجول
هل بقى حظر التجول ده بسبب المتظاهرين؟
تعالوا نفتكر حظر التجول ده اتعمل امتى وليه؟
فجاة كل اقسام البوليس اتحرقت وفجاة كل السجون اتفتحت (سجون الرجالة بس مش سجون الستات .. مش غريبة؟) وفجاة كل الشرطة مابقتش موجودة!
وفجاة الحرامية ملوا البلد حرقوا ونهبوا وسرقوا
وكان لازم الجيش يتنزل
وبقينا لما نتصل بالنجدة نلاقى اللى بيرد علينا بتريقة ويقول "ابقوا خلوا الجيش ينفعكوا!" ويقفل السكة ف وشنا
فكان لازم يكون فى حظر تجول عشان الحرامية دى تتمسك
يبقى نلوم مين؟
نلوم مين على حظر التجول ده؟
المتظاهرين اللى ف التحرير ومتجمعين بس ف التحرير وقعدوا 9 ايام و8 ليالى مارفعوش عصاية واحدة ولا مسكوا طوبة؟
ولا الحرامية اللى سرقوا ونهبوا؟
ولا اللى طلع الحرامية دول وخلاهم يملوا البلد ومشى؟
وكانه بيخير الناس بين الحرية والامان؟!

هل حظر التجوال ده بسبب الزحمة؟!
هل ده بسبب ان المرور هايقف عشان الناس واقفة ف التحرير؟!
لا طبعا!
طب وبالنسبة للى ف مدن جديدة والمواصلات بتقف من تلاتة العصر .. دول لو عايزين ينزلوا القاهرة ينزلوا ازاى؟
مفيش مواصلات
وهما بعيد تماما عن التحرير !
يعنى انا دلوقتى ف العبور وعايز انزل العباسية .. ليه مفيش مواصلات تودينى؟ .. عشان فى ناس واقفة ف التحرير؟
بلاش الناس تضحك علينا
حظر التجول ده عشان الحرامية والبلطجي والمساجين .. اللى هما خلاص كانت موجة وخلصت
طب لو حظر التجول ده عشان مظاهرات التحرير
ليه لسة فى جيش ف كل مصر؟
ليه الشرطة مانزلتش خدت اماكنها؟ .. مش خلاص الناس فتحت صفحة جديدة مع الادارة الجديدة اللى رجعت الشعار القديم بتاع الشرطة فى خدمة الشعب؟
ليه لسة اصلا فى حظر تجول؟
سيب الناس تنزل شغلها بالليل عادى وسيب المواصلات تشتغل .. وابقى خليهم هما اللى يشتكوا م الزحمة !


طيب .. اللى بيقول بقى ان الناس دى لسة واقفة ليه ف ميدان التحرير مش الريس خلاص عملهم اللى هما عايزينه؟
ماحصلش .. اللى بيقول كدة حاجة من اتنين .. يا اما طيب لدرج انه فعلا صدق كلام حسنى مبارك و مش فاهم كويس فعلا المطالب دى وبيان حسنى مبارك
او انه ماصدق الريس طلع قال انه خلاص هايمشى وهايعمل ويعمل عشان يخلص ويقول طب الحمد لله عملنا اللى احنا عايزينه يلا نرجع بقى
بس الثورة مش كدة
لازم الناس تقدر ان الـ(ثورة) دى ثورة تاريخية
التاريخ هايذكرها - فى حالة ان رئيس المستقبل ماكانش بتوجه معين - بشكل اقوى من ثورة 1919 ثورة سعد زغلول او ثورة عمر مكرم او احمد عرابى او 1952
لان الثورة دى مالهاش ريس
مفيش حد الناس تلتف حواليه زى سعد زغلول او عمر مكرم او احمد عرابى او محمد فريد او مصطفى كامل او جمال عبد الناصر
الثورة دى طلعت من جوة الشعب .. اخر ما الشعب طهق!

طيب تيجى نشوف الريس قال انه هايعمل ايه ونقارنه باللى الناس طلبته؟

الناس طلبت التالى:
1- تنحى الرئيس فورا
2- الغاء قانون الطوارئ
3- حل مجلسى الشعب والشورى
4- تعديل المواد 76 و77 و88 من الدستور
5- تغيير حكومة رجال الاعمال والفاسدين
6- استقالة جمال مبارك وضمان انه لن يترشح للرئاسة

الريس قال هايعمل ايه؟
1- هايترك الرئاسة بنهاية ولايته الحالية
.. يعنى مش هايتنحى فورا
واللى بيقول هايبقى فى فراغ سياسى واسرائيل هاتهجم
امال هو عين نائب ليه؟
حسنى مبارك لو مشى النهاردة .. هايبقى فى رئيس انتقالى للبلد وهو عمر سليمان .. هايمارس هو مهام رئيس الجمهورية لحين اجراء انتخابات رئاسية جديدة
وبالتالى البلد مش هاتبقى من غير ريس وهانلاقى اسرائيل او امريكا داخلين البلد
ده اذا كانت اسرائيل اصلا عايزة تحتك بينا عسكريا دلوقتى او اذا كانت امريكا اصلا قادرة على خوض حرب جديدة بعد حرب العراق اللى الشعب الامريكى كله هاجم بوش بسببها!
اصلا سواء حسنى مبارك سواء عمر سليمان سواء البرادعى سواء ايمن نور سواء محمد ابوتريكة ماسك البلد .. البلد عندها جيش قوى وشعب قوى يقدروا يحموا البلد كويس اوى .. ومش الكام كتيبة اللى نزلوا الشوارع دول هما اللى هايهزوا استقرار الجيش على الحدود , مع الوضع فى الاعتبار كمية ظباط الاحتياط واللى واخدين اعفاء مؤقت وبدأ يتم استدعائهم فعلا
وغير كل الكلام ده .. اسرائيل اول lن اهتم باللى فى مصر وطلعت - من خلال نتنياهو - قالت انها عايزة يكون فى استقرار فى مصر عشان عايزة تحافظ على حالة السلام اللى بين الدولتين
2- تجاهل تماما نقطة قانون الطوارئ
.. واللى يسمج لرئيس الجمهورية بتكليف اى شخص بعمل اى شئ فى اى وقت
3- طلب مجلس الشعب بالامتثال لاحكام القضاء بخصوص الطعون المقدمة فى عضويات المجلس
.. لما يكونوا 444 دايرة وفى 400 طعن مقدم .. هل ده مايكونش مبرر كافى لحل مجلس الشعب مباشرة؟
4- طلب من مجلس الشعب النظر فى المادتين 76 و77 والخاصتين بشروط الترشح لرئاسة الجمهورية وعدد فترات الرئاسة
.. ولم يذكر ابدا المادة 88 والخاصة بالاشراف القضائى على الانتخابات .. يعنى برضه هاتبقى انتخابات زى ماحنا عارفين
ثم هل مجلس الشعب ده هو اللى هايعدل المادتين 76 و77 ؟ .. زى ما عملوها ف 2007 للريس وابنه؟
الناس بتقول ماينفعش الريس يمشى ويسيب فراغ دستورى والدستور بيقول ان الريس اللى يغير الدستور او يحل مجلس الشعب لازم يكون ريس منتخب
ودلوقتى قالوا لازم 70 يوم مهلة للانتخابات وحصل مط اكتر لفترة الرئاسة الاخيرة دى
الناس دى كانت فين ف 2007 لما التعديلات دى حصلت واتطبخت ف يومين عشان الريس وابنه؟
حسنى مبارك دلوقتى يقدر ببساطة يعمل استفتاء للشعب على تغيير المادتين دول ويحل مجلس الشعب وبعدين ينقل سلطته الكاملة لنائبه عمر سليمان وهو يتابع انتخابات مجلس الشعب ويهيأ الجو لانتخابات رئاسية جديدة فى سبتمبر الجاى بالمواد 76 و77 المعدلتين
بس هو ماطل وبيكسب اكبر وقت ممكن .. عشان الحزب الوطنى يقدر يلم نفسه والشرطة تجمع نفسها تانى
واللى قال ان ميدان التحرير موجود مش هايطير ونقدر ننزل تانى
فده عمره ماهايحصل تانى
الثورة دى حصلت قدام عين الحكومة .. وكانوا بيقولوا دى زوبعة فى فنجان ودول شوية عيال سيبهم يلعبوا .. وفوجئوا باللى شافوه
ولو حصل والناس دى اتفقت تانى على حاجة زى دى .. هاتلاقى الف عربية امن مركزى واقفة ف ميدان التحرير مستنياهم بالرصاص
ايه اللى يمنعهم يعملوا كدة تانى بعد ماعملوه اولانى فعلا .. وبعد ما سابوا البلطجية امبارح ينزلوا بالجمال والاحصنة على اللى فى ميدان التحرير يضربوا الناس بالطوب وقنابل المولوتوف؟ .. وقناصة فوق هيلتون رمسيس يقتلوا ف المتظاهرين السلميين!
هاتكلم عن اللى حصل ده لما اخلص تعليق على خطاب الريس
5- تم تغيير الحكومة بالفعل .. ورجعت تانى!
.. ايه اللى عمله؟ .. شال حبيب العادلى .. وده كان مطلب جماهيرى اكتر من تغيير رئيس الوزارة نفسه .. وشال فاروق حسنى
لكن بطرس غالى عرضوا عليه يرجع ورفض! .. بطرس غالى اللى فرض ضريبة على اللى عنده اوضة متر ف متر
ورجع سامح فهمى وزير البترول .. ومش مجاله اننا نتكلم عن نهب بترول مصر وتصدير غاز مصر بنص السعر لاسرائيل .. رجع ابو الغيط وزير الخارجية وانس الفقى وزيرالاعلام وطارق كامل وزير الاتصالات اللى قطع النت عن مصر على اساس ان كدة اللى مخططين للثورة مش هايعرفوا يتكلموا مع بعض! .. ف الاول الناس كانت محتاجة نت عشان تعرف هاتنزل امتى وفين .. دلوقتى اى حد بقى ينزل مع اى حد وف اى حتة .. رجع عائشة عبد الهادى وزيرة القوى العاملة او وزيرة البطالة!  وسيد مشعل وزير الانتاج حربى وهانى هلال وزير التعليم العالى واللى بقى التعليم العالى ف عهده قطاع خاص وادفع الاف عشان اخد ليسانس او بكالريوس اعلقه ع الحيطة بعد كدة او ارميه ف اى دوسيه واروح اشتغل ف اى حتة مالهاش علاقة باللى دريته .. رجع مفيد شهاب وزير الشئون القانونية ومجلس شعب الغير مزور طبعا! .. وحسن يونس وزير الكهرباء والطاقة اللى كان بيقطع الكهربا طول اليوم عن الناس ف رمضان عشان ينور الشوارع الصبح! .. رجع ماجد غطاس وزير البيئة النظيفة والصحية وعلى مصيلحى وزير التضامن اللامؤاخذة اجتماعى ومشيرة خطاب وزيرة تفكك الاسرة والسكان .. وما اعلنش عن وزير التعليم ووزير السياحة الجدد!
مهزلة
هل ده تغيير؟
6- صمت تام وتعتيم على موقف جمال مبارك
.. حسنى مبارك قال ف تصريحه انه ماكانش ينتوى الترشح لفترة رئاسية جديدة .. طب ما احنا عارفين .. وعارفين ان الكل كان بيجهز جمال عشان يبقى بشار الاسد التانى
ليه ما قالش زى على عبد الله صالح الرئيس اليمنى انه لن يترشح للانتخابات القادمة ولا هو ولا ولده؟

حسنى مبارك فى خطابه قال نقطتين استفزونى تماما
اولا .. قال ان الشباب بدا تظاهرته السلمية بشكل رائع .. وبعدين بدا يخرب ويدمر ويحرق
مصر كلها عارفة ان اللى خرب ودمر وحرق وقتل المصريين هما الشرطة!
مش مجال سرد ادلة لكن يكفى ان 40 واحد اتمسكوا داخلين يسرقوا المتحف الوطنى طلع معاهم اثباتات شخصية ظباط وامناء شرطة!
ثانيا .. قال ان التخريب ده كان بسبب قوى سياسية تحكمت فى الشباب!
الشباب ده بكرر وبقول وهافضل اقول بيتحرك من نفسه .. من مصريته ووطنيته
من حبه لبلده ورغبته ف التغيير ورفضه للكبت والظلم
ثم حسنى مبارك قال فى خطابه انه قال انه مستعد للحوار لكن القوى السياسية المعارضة رفضت
مين ده اللى رفض الحوار؟ ده كل الاحزاب المعارضة عملت ائتلاف وقالت احنا عايزين كذا كذا كذا وهما الى بدأوا الحوار !

اما بالنسبة بقى للى بيقول نصبر 6 شهور ونشوف
لما يكون فى واحد مسجل خطر وتحصل سرقة او مشكلة فى منطقته
مش الشرطة بتجيبه وتحقق معاه لانه محطوط فى الليستة بتاعة دول الناس اللى بيسرقوا او يقتلوا او كذا او كذا؟
ليه؟ .. لان الشرطة عندها فكرة عن المسجل خطر ده فكرة مسبقة ان هو بيعمل كذا وكذا
نفس الموضوع حاصل دلوقتى !!
اللى بيقول ان الناس بتخون الريس وبتفترض انه بيضحك عليهم
لا احنا مش بنفترض .. الناس عندها خبرة سابقة ان حسنى مبارك بيدى وعود زائفة ومابتتحققش !!!!
فبالتالى الطبيعى بقى ان الناس ماتصدقوش الا لما تشوف التنفيذ قدام عينيها !
اللى قال ف 81 انه مش هايترشح لاكتر من فترتين رئاسيتين .. وان ابنه بيشتغل برة عشان ماحدش يقول انه بيعمل بيزنيس ف مصر .. وان مراته مش هاتظهر ف التليفزيون .. وانه بقى رئيس مش بمزاجه .. مين يصدقه النهاردة
بخصوص النقطة دى ادعوكم لقرائة النوت دى
لماذا لا يجب ألا نصدق أي كلمة قالها مبارك


بالنسبة للى حصل امبارح
ف خطاب حسنى مبارك كان بيقول "علينا ان نختار بين الاستقرار والفوضى"
وادى الفوضى وواضح مين اللى عملها ومين اللى عايزها ومين اللى خلى المصريين يضربوا بعض
هاتكلم فى نقطتين اتنين بس
1- انت بتحب مبارك وبتهتفله وهاتموت روحك علشانه .. براحتك .. هذا حقك .. سواء كنت فعلا بتحبه من قلبك او قابض وخارج تتظاهر باوامر
لكن مش من حقك تروح تحتك باللى فى التحرير وتتخانق معاهم
عايز تقف ف ميدان مصطفى محمود او رمسيس وتملا الدنيا صريخ وبنحبك ونعم لمبارك وماتسيبناش .. ده حقك
بس مش من حقك تروح التحرير للى انت عارف انهم ضدك عشان تتخانق؟
مين اللى يدان فى احداث امبارح؟ .. اللى واقف فى مكانه بقاله 9 ايام و8 ليالى مارفعش عصاية ولا طوبة؟ .. ولا اللى راحله يضربه بالنار وبالطول عشان يمشيه بالعافية؟
2- الناس دى ازاى دخلت التحرير بالحصنة والجمال؟
انا عشان ادخل التحرير اتفتشت وطلعت بطاقتى كتير جدا عشان يتاكدوا انى ماعايش اسلحة وانى مدنى مش من الشرطة
دول ازاى مشيوا 18 كيلو من نزلة السمان للتحرير باصحنتهم وجمالهم من غير ما ظابط جيش واحد يوقفهم ومن غير ما الجيش يوقفهم على اطراف التحرير ويقولهم انتوا رايحين فين؟!
ثم مين مصرى يقدر يعمل كدة؟ .. الا اذا كان مستبيع او واخد اوامر وواصل؟


الى كل الناس اللى بتقول اوقفوا حمامات الدم وكفاية خراب وماتولعوش مصر
مين اللى يتقاله الكلام ده؟
اللى واقف ف التحرير ف حاله تماما ومابيعملش اى مشاكل الا انه يهتف ويقول مصر ولا لمبارك؟ لو كانت دى جريمة
ولا اللى رايحله على جمل وحصان وبيضربه بالطوب ويستناه يصلى الفجر عشان يصفيه بالرصاص؟
مين اللى يتلام ويتقاله كفاية؟

من الاسئلة المهمة اللى بتتقال .. مش عايزين حسنى امال مين اللى يمسك؟
بالنسبة لبديل حسنى مبارك
فالحزب الوطنى قدر طول السنين اللى فاتت ينه يقضى على كل الكوادر ويحجم اى حد عنده كاريزما ويسيطر عليه عشان مايطلعش
عمرو خالد - وانا مش برشحه يبقى ريس ولا حاجة انا بس واخده مثال لحد عنده كاريزما - اول ما اتلف حواليه الشباب نفوه برة مصر
وحاجة زى دى مستحيل تحصل غير بعلم - او اوامر شخصية - من الريس
بس مصر لس فيها ناس محترمة زى عمرو موسى او كمال الجنزورى او حتى احمد رشدى اشرف وزير داخلية فى تاريخ مصر


غير اللى مانعرفهومش ولا نسمع عنهم حاجة بسبب الاعلام المصرى اللى بدأ بعض العاملين فيه التبرأ منه وترك التليفزيون المصرى بسبب رفض الاشتراك فى مؤامرات تدليس وكذب
التليفزيون اللى كان يبقى ميدان التحرير فيه 3 مليون وهو جايبلى صورة النيل والشجر وناقص يجيب اتنين حبيبة واقفين بيشتروا من بتاع حمص شام!

بالنسبة اللى بيقول ان حسنى مبارك اللى حواليه خدعوه وانه مش هو اللى كان بيحكم كل حاجة
فانا ماشفتش اى محاكمة للمسئول عن التعذيب فى اقسام الشرطة او اللى دخل ادوية مسرطنة مصر او اللى رمى مياه صرف صحى فى النيل او اللى اتسبب فى غرق العبارة او اللى باع الغاز الطبيعى لاسرائيل وسرق 25 مليار دولار سنويا دخل قناة السويس او اللى غلى اللحمة خلى الكيلو ب120 جنيه ومرتبات بعض موظفين الحكومة 60 جنيه
وماشفتش حد خد اللى فى العشوائيات وف الدويقة وامثالها سكنهم ف شقق ولو 25 متر بس تحت سقف وبين 4 حيطان ومقفول عليهم باب
البلاوى كتير اوى وماحدش اتحاسب
مش محتاج افكر الناس بعمر بن الخطاب وكلامه عن البهيمة اللى لو عثرت فى العراق هايتحاسب هو عنها
مش الالف المؤلفة اللى ماتت بالسرطان والعبارة والدويقة والتعذيب والتحرش والاغتصاب والتلوث وكل الكلام اللى احنا عارفينه ده



نقاط اخيرة للتذكير

ليه الربط بين مظاهرات الاحتجاج على الرئيس والتخريب والمشاكل؟
مظاهرات معارضى حسنى مبارك كانت واضحة من اول يوم وهى مظاهرات سلمية!
الشرطة ضربت فيهم اول مرة وخلت بلطجية ومساجين يخربوا والشرطة هربت
ودلوقتى مجموعة من المأجورين نازلين بأحصنة وجمال يضربوا فى المتظاهرين السلميين فى التحرير بالطوب وبال...مولوتوف!
يبقى التظاهر السلمى هو اللى بيعمل خراب للبلد؟

البلد حالها واقف بسبب حظر التجوال واللى مالوش اى علاقة بالتظاهر السلمى !!!!
حظر التجوال بسبب البلطجية والهاربين من السجون اللى بيضربوا فى المتظاهرين اصلا!!!!


المئات اللى ماتوا والالف اللى جرحى ف المستشفيات .. مين يجيب حقهم؟
اللى اتعمل امبارح ده يخلى الواحد يسخن اكتر ويصمم اكتر يطلع يوم الجمعة
لو هما فاكرين ان اللى عملوه ده هايخوف الناس ويخلوهم يروحوا يبقوا غلطانين
اللى حصل ده هايخلى الناس تصمم اكتر واللى ماكانش نازل هاينزل
ف فيلم اغنية على الممر محمود مرسى كان كل فترة بيرفض اكتر انه يتراجع عشان مايبقاش اهدر دم اللى فضلوا مستنيين معاه وماتوا وكل ما يموت واحد ويعدى وقت اكتر كان بيتمسك اكتر برفضه للرجوع


سؤال مهم
هل حسنى مبارك هايقدر يعمل فى 6 شهور اللى ماعملوش ف 30 سنة؟

سؤال واحد اخير
هل لو كان حسنى مبارك طلع لمؤيديه وقالهم اخرجوا من التحرير وروحوا تظاهروا ف اى مكان تانى وماتضربوش .. كان المؤيدين دول هايقولوله لا احنا هانضرب وانت ماتعرفش؟ .. ولا كانوا هايمشوا ويبقى الراجل وقف الخراب اللى بيحصل فى مصر وقتل المصريين لبعضهم؟
لو كان عايز

يارب عدى الايام دى على خير
ويارب مصر تبقى ف امان



عمرو فكرى