مباشر : مصر ابطال افريقيا للمرة السادسة ف التاريخ

ده لينك الماتش فى البى بى سى للى عاوز يتابع

وده لينك مباشر من (فى الجول) باللغة العربية


يارب .. يارب .. يارب


-----------------------------------

نهاية الشوط لاول
مصر 0-0 الكاميرون


الدقيقة 16 : تغيير مبكر للكاميرون خروج اليكساندر سونج ونزول بينيا
الدقيقة 20 : مصر اخطر وبتضيع وان شاء الله هانكسب
الدقيقة 30 : مصر اخطر بس بدأت تقل شوية ولاعبى الكاميرون هاديين
عمرو زكى واقع ع الارض وشكله اتصاب
الدقيقة 37 : ربنا يسامحك يا متعب .. من هنا للصبح !
الدقيقة 38 : ايتو كسر الحضرى اللى واقع ع الارض دلوقتى
نهاية الشوط الاول 0-0
مصر احسن بكتير وماسكة اكتر وفرصها اكتر
بس الكاميرون فرصها القليلة بتعمل خطورة مرعبة

هانى سعيد نجم الماتش
الحضرى تألق فى الاختبارات القليلة اللى جاتله
وائل وشادى وحسنى كويسين اوى
زكى وحسن مجهود وافر
تريكة بيتحرك وبيحاول يلعب بس متحمس زيادة عن اللزوم , لو هدى هايبقى ممتاز
معوض وفتحى مجهود كويس بس شوية تركيز زيادة وممكن يعملوا حاجة
متعب .. ربنا يسامحك !



نهاية المباراة
مصر 1-0 الكاميرون
مصر بطل افريقيا


الكاميرون احسن من الشوط الاول بكتير
مصر بدأت تفوق .. احنا كويسين والله بس مش عارفين نستغل قوتنا
الحمد لله الحمد لله الحمد لله .. متعب خارج يا رجالة
الدقيقة 60 : متعب خارج وزيزو نازل .. ربنا معاك يا زيزو
الدقيقة 61 : حسنى برسه ف العارضة .. قربنا والله .. يارب
الدقيقة 67 : الفاولات : مصر 7 والكاميرون 17
الدقيقة 75 : مش عارفين نستغل الفرص ولا الاستحواذ والكاميرون فايقة .. ربنا يستر .. بدأت اتشائم
اللـــــــــــــــه
الدقيقة 76 : مصر 1-0 الكاميرون
نفس الجون الرابع لمصر فى كوت دى فوار
الله عليك يا زيزو الله عليك يا تريكة
اللـــــــــــــــــــــه
الحمد لله الحمد لله الحمد لله
الدقيقة 83 : عمرو زكى يخرج وينزل محمد شوقى .. برافو يا شحاتة
الدقيقة 85 : الحضرى ما زال بيشيل بلاوى
88 : يارب
الدقيقة 90 : تريكة يخرج وابراهيم سعيد ينزل
اوووووووووووووه مصراوىىىىىىى
فاضل دقيقتين

دقيقة واحدة

نص دقيقة


الله

الحمد لله رب العالمين
الحمد لله الذى بنعمته تتم الصالحات

مصر ابطال افريقيا

مصر ام الدنيا

مصر الى كاس القارات 2009

مصر ظبطت كوت جى فوار يا رجالةةةة

نهاية المباراة
مصر 4-1 ساحل العاج

الدقيقة 12
1-0 لمصر .. احمد فتحى تسديدة بعيدة المدى تخبط ف زوكورا والحارس وتبقى اول جون فى مرمى ساحل العاج فى البطولة !!!!

الدقيقة 14
تمريرة طولية من احمد حسن لسيد معوض لكنها اطول منه


الدقيقة 15
عصام الحضرى يلعب كورة طويلة لعماد متعب فى اخر الملعب لكن ارثر بوكا يقطعها منه

الدقيقة 16
عرضية ارضية خطيرة من سالمون كالو لكن وائل جمعة يشتت بفدائية .. راجل يا وائل

الدقيقة 17
فاولين ورا بعض لكوت دى فوار .. بصراحة ربنا يستر من الحكم
ده الحكم اللى كان حكم ماتش الاسماعيلى وانييمبا فى نهائى دورى ابطال افريقيا 2003 وكان احد العوامل الرئيسية فى خسارة مصر للبطولة

الدقيقة 18
فاول جامد على دروجبا .. وائل جمعة هايقتله النهاردة

الدقيقة 19
اوت
لكوت دى فوار توصل لعبد القادر كيتا اللى يعمل فاول ضد احمد فتحى .. يلعبه عصام الحضرى طويلة تتشتت وتبقى رمية تماس لمصر

الدقيقة 21
رميات قصيرة بين فتحى واحمد حسن توصل فى الاخر لعمرو زكى اللى يستلمها وضهره للجون ويلف ويشوطها خطيرة لكن تخبط فى ندافع وتخرج

الدقيقة 22
التحام بين سيد معوض وارونا ديندانى يخلص بكورنر لساحل العاج

الدقيقة 23
هجمات خطيرة ومحاولات من ساحل العاج من اليمين والشمال .. كعب من كالو يشتته وائل جمعة نجم المباراة

الدقيقة 24
عماد متعب بينزل لليمين وعمرو زكى للشمال عشان يحضروا كورة .. احمد فتحى يعمل فاول مع بوكا .. توصل ناحية شمال مصر يستخلصها احمد حسن ويديها لابو تريكة اللى يلعبها طويلة لعمرو زكى اللى يعرضها لحسنى اللى يرقص ويعدى ويديها بالكعب لفتحى اللى يشوطها برة الملعب
والله عاملبن ماتش جامد وممكن نعمل اللى عملناه مع الكاميرون .. وممكن برضه ساحل العاج تحط اتنين :D

الدقيقة 26
هانى سعيد واقع بيتعالج بعد ما الكورة خبطت فى وشه على حدود منطقة جزاء مصر
هايخرج على النقالة
كانت تشتيتة من وائل جمعة المفترى :D

الدقيقة 27
هانى سعيد قام وطالب ينزل
فاول من احمد حسن واحمد فتحى من ناحية يمين مصر على ارونا
تتلعب عرضية خطيرة يشتتها هانى سعيد .. تترد تاى باك ورد من ارثر بوكا لكن تتحسب اوفسايد على سالمون كالو

الدقيقة 29
فاول جامد اوى من ابو تريكة على ايبوى .. توصل لارثر بوكا اللى يديها ليحيى تورى اللى يرجعها لبوكا .. يلعبها عرضية خطيرة لدروجبا اللى يوقفها على صدره ويشوطها خطيرة لكن السد العالى عصام الحضرى يشيلها .. جون مؤكد ضائع من كوت دى فوار
يشتتها وائل جمعة تبقى رمية تماس
عصام اتعالج وقام .. اسد

الدقيقة 31
امامية من الحضرى لكن عمرو زكى يعمل فاول ضد حبيب تورى

الدقيقة 32
تسلل على دروجبا .. كانت طويلة من ارثر بوكا جوة منطقة جزاء مصر لدروجبا

الدقيقة 33
طويلة لعمرو زكى اللى يرجعها لورا براسه توصل لابو تريكة اللى يشوطها بشماله جنب العارضة .. نفس جونه فى الصفاقسى بالظبط
حسنى عمل فاول جامد مع دروجبا .. هايموتوه النهاردة :D
احمد حسن يستخلص الكورة من بوكا ويعدى لنص الملعب . باصات بين حسن وفتحى وحسنى وسيد وشادى وعمرو
نقلات كتير جدا للعيبة مصر كلهم
احمد حسن تقريبا هو ارتكاز الباصات المصرية
حوالى 25 تمريرة مصرية تنتهى بعرضية من فتحى لعمرو زكى ناحية الشمال اللى يلعب عرضية خطيرة لعماد متعب لكن تعديه وتبقى ضربة مرمى لساحل العاج
ابو بكر بارى حارس كوت دى فوار نايم ف الارض بيهدى الماتش

الدقيقة 38
هايتم تغيير حارس مرمى كوت دى فوار :D
زى ما حصل فى البطولة اللى فاتت لما جون جاك تيزى خرج ونزل بداله بارى.. دلوقتى بارى خارج وهخابنزل لوبوى

الدقيقة 40
طولية خطيرة لعماد متعب اللى يتطوح بيها لليمين ويهدى لورا .. باصات كتير توصل لفتحى اللى يلعب عرضية طويلة جدا تبقى رمية تمس لساحل الهاج من ناحية الشمال بتاعة مصر

الدقيقة 41
احمد حسن يستخلص الكورة بشكل رائع ويلعبها لابو تريكة اللى يديها لمعوص ناحية الشمال يشوطها جامدة تخبط فى ايبوى وتبقى كورنر لمصر يلعبها احمد حسن يشتتها تورى

الدقيقة 42
سيد معوض ينطلق ناحية الشمال وعبد القادر كيتا يزقه من ورا ويعمل معاه فاولبعد خط النص بشوية
منتخب مصر بيهدى الكورة

الدقيقة 44
فاول من شادى محمد ضد ارونا ديندانى تتلعب بسرعة وتبقى هجمة من ايبوى من ناحية الشمال لكن معوض يعمل معاه فاول ناحية الشمال
الحمد لله !!!!!!!!
تتلعب عرضية جوة منطقة جزائ مصر تخبط فى ايد هانى سعيد لكن الحكم ما ياخدش باله
تترد خطيرة لمصر وبعد باصات من ابو تريكة وحسنى . يشوط حسنى ببطن رجله على شمال الحارس ضعيفة يمسكها
6 دقايق وقت بدل ضايع
على فكرة لو شطنا من برة المنطقة كتير هانحط ان شاء الله فى الحارس ده عشان شكله ضعييييييييف

الدقيقة 45
سيد معوض واقع وماسك وشه وبيخرج من الملعب بعد ما عبد القادر كيتا ضربه بكوعه من غير كورة

الدقيقة 45+1
احمد فتحى يقطع الكورة لكن الحكم يحسبها فاول مع انه لاعب ع الكورة
تتلعب خطيرة لكن تتشتت توصل لعمرو زكى اللى ياخد فاول من عبد الله مايتى

الدقيقة 45+2
تحضير من ساحل العاج ..طويلة من يحيى تورى ما يلحقهاش بوكا تبقى رمية تماس مصرية من نص الملعب المصرى ناحية اليمين
احمد حسن يعمل باص تتقطع منه وتبقى هجمة ايفوارية فى نص ملعب مصر
التحام قوى بين عمرو زكى وعبد القادر كيتا جنب خط التماس قدام منطقة جزاء مصر .. الحكم بيخرف

الدقيقة 45+4
عرضية خطيرة يرفعها الحضرى ويشتتها وائل جمعة كورنر
تتلعب صاروخية جوة منطقة الجزاء يشوطهادروجبا براسه .. يشوطها براسه .. لكن الحضرى يشيل الطلقة وحسنى يشتت

الدقيقة 45+5
ضغط جامد جدا من ساحل العاج .. الحمد لله ينتهى بفاول لاحمد فتحى ضد ارثر بوكا

الدقيقة 45+6
كرات خطيرة جدا من عبد القادر كيتا وسالمون كالو ودروجبا ويحيى تورى لكن تنتهى بتشتيت من سيد معوض .. يحسبها الحكم فاول لمصر ينهى بعده الشوط الاول

نهاية الشوط الاول
مصر 1-0 ساحل العاج

بداية الشوط الثانى .. يارب

الدقيقة 47
فاول لدروجبا على وائل جمعة فى نص ملعب مصر
يلعبها يحيى تورى يلمسها دروجبا براسه وتطلع برة .. ضربة مرمى لمصر

الدقيقة 48
عرضية خطيرة من ناحية الشمال لدروجبا اللى يلعبها قوية براسه لكن النجم عصام الخضرى يشيلها زى بتاعة 2006
ويروح مخرجها وائل جمعة كورنر
نجم يا حضرى
دروجبا هايتجنن :D

الدقيقة 50
بننقل بهدوء من ناحية الشمال توصل لعمرو زكى اللى يعضرها لعماد متعب اللى يلمسها غريبة تطلع برة ضربة مرمى ايفوارية
تترد لساحل العاج اللى سيطروا على وسط الملعب خالص .. فينك يا شوقى؟

الدقيقة 51
عرضية خطيرة جدا من ناحية الشمال يخرجلها الحضرى اللى يلمسها من قدام دروجبا ويقعوا الاتنين مكسورين لكن الحضرى يقف على نص ركبة كدة يتابع الكورة اللى اتنقلت للشمال ويحاول ديندانى يمثل فيها عشان ياخد ضربة جزاء لكنها تطلع وتبقى ضربة مرمى
الحضرى قام ودروجبا خرج برة وهاينزل
ساحل العاج خطيرين جدا
الشمال بتاعنا زى الزفت

الدقيقة 54
معوض كالعادة يعمل فاول على عبد القادر كيتا .. تتلعب بسرعة .. وكالعادة نقلات كثيرة قصيرة بين لاعبى كوت دى فوار .. خطيرة جدا
تنتهى فى رجل سالمون كالو اللى يحاول يلعبها فى التمانيات ناحية الشمال لكن تطلع برة ضربة مرمى لمصر

الدقيقة 55
عمرو زكى بيشوط من نص الملعب ! كابتن ماجد عاد ليكم من جديد
سهلة ف ايد الحارس
تترد خطيرة لساحل العاج ليحيى تورى
اللى يشوط تخبط فى سالمون كالو وتخرج ضربة مرمى لمصر

الدقيقة 56
تمريرة جميلة من ابو تريكة لعماد متعب على حدود منطقة الجزاء لكن ما يعرفش يوقفها .. تطول منه ويقع ف الارض وتوصل للاعبى كوت دى فوار

الدقيقة 57
ضربة مرمى لمصر من الحضرى لعمرو زكى اللى ياخد فاول من ارثر بوكا
عمرو زكى عامل ماتش كويس .. عمال يتحرك ويجيب فاولات .. لكن يعيبه انه بيوقف الكورة كتير
عماد متعب كالعادة مش لاقيله ميزة بصراحة

الدقيقة 58
انطلاقة من عبد القادر كيتا من اليمين وائل جمعة وشادى محمد يعملوه ساندويتش ياخج فاول من على حدود امنطقة ناحية الشمال .. ربنا يستر

الدقيقة 59
تسديدة قوية جدا من ارثر بوكا يخرجها الحضرى ضربة مرمى .. الله عليك
بس ربنا يستر برضه

الدقيقة 60
ركنية ايفوارية من ناحية اليمين
باكارى كونى ينزل بدل سالمون كالو
تتلعب الركنية يشتتها هانى سعيد رمية تماس لكوت دى فوار
ارونا ديندانى بيحاول يعلق الكورة لكن تخرج ضربة مرمى لمصر

الدقيقة 61
ركنية لمصر بعد تسديدة من حسنى تخبط فى زوكورا

الدقيقة 62
عرضية من سيد معوض توصل لشادى محمد اللى يشوط تخبط فى دروجبتا وتخرج ركنية تانية بس من ناحية اليمين
يلعبها احمد حسن يلمسها زوكورا براسه يعليها شوية توصل لعمرو زكى اللى يقابلها براسه تخبط فى العارضة وتدخل وحارس المرمى بيتفرج عليها

يا لهوىىىىىىىىىىىىىىىى
2-0 لمصر
احمد فتحى فى الجون ده كمان برضه بيقول للعيبة كله يسجد .. زى ما قال ف الجون الاول

الدقيقة 63
جون لساحل العاج !
عبد القادر كيتا
يشوط صاروخ من ناحية اليمين
على شمال الحضرى اللى لا يسأل عن الجون
والله قبل ما يشوطها افتكرت ماتش غينيا والمغرب لما غينيا حطت التانى راحت المغرب حطت الاول بعدها على طول
عموما ربنا يستر

الدقيقة 65
هجمة مرتدة لساحل العاج ياخد منها عبد القادر كيتا فاول ف نص ملعب مصر
ربنا يستر انا مش متطمن

الدقيقة 66
تتلعب الكورة يشتتها الحضرى بالبوكس
ضغط ايفوارى تام
طولية لساحل العاج لكن تسلل على دروجبا

الدقيقة 67
طويلة من الحضرى على الطريقة الاهلوية يلمسها متعب براسه لعمرو زكى اللى يرقص تورى تقريبا ويشوطها على يمين الحارس الضعيييييييييييف .. جون تالت لمصر يا رجااااااااالة

الدقيقة 69
عماد متعب يخرج اخيييييرا وينزل بداله محمد زيدان
عرضية من باكارى كونيه يحاول دروجبا يلعبها باك وورد لكنها تخرج ضربة مرمى

الدقيقة 70
احمد فتحى يستخلص الكورة بشكل جميل جدا ويرجعها لهانى سعيد .. طولية لزيدان لكنه يعرضها بتسرع تتقطع .. توصل تانى لابو تريكة اللى يديها لعمرو زكى اللى يرقص ويشوط جنب القائم الايمن لساحل العاج
كان هايحط هاتريك فى ساحل العاج !!

الدقيقة 71
انفراد من عبد القادر كيتا لكن حسنى عبد ربه يتزحلق ويشتتها لكورنر حلوة جدا
الله عليك يا حسنى
الحرى اكل ضرب !!!!

الدقيقة 72
طولية من ابو تريكة لزيدان لكن تتحسب تسلل
مصر بتلعب ع المرتدات بشكل جميل جدا .. بافتكر اهو ماتش الكاميرون
سيد معوض يقطع الكورة ويشوطها من تقريبا 40 ياردة ! يطلعها الحارس المهزوز ركنية

الدقيقة 73
كورنر يلعبه احمد حسن سئ كالعادة
هجمة ايفوارية يلعبها باكارى كونى عرضية من ناحية الشمال لكن حسنى يشتت
يحاول معوض يعمل مرتدة لكنها تتقطع ويعدى زوكورا ويحاول يعرض لكن تطول وتبقى ضربة مرمى لمصر
فاول من احمد فتحى على ارونا ديندانى من يمين منطقة جزاء مصر
خطيرة والله

الدقيقة 75
دروجبا يلعب الفاول ما تلاقيش حد وتطلع ضربة مرمى لمصر
والله ممكن !

الدقيقة 76
كورة طويلة توصل لباكارى كونى اللى يستقبلها على صدره ويسلمها ليحيى تورى اللى يشوط على يمين العارضة

الدقيقة 77
يخرج سيد معوض وينزل محمود فتح الله
تغيير موفق ان شاء الله من حسن شحاتة .. لا فعلا شحاتة صح المرة دى
سيد بدأ يقل وخصوصا دفاعيا
هايدخل فتح الله بل شادى ويخرج شادى يلعب باك لفت
ارونا كونى ينزل بدل ارونا ديندانى .. كدة 3 تغييرات لساحل العاج

الدقيقة 79
باصات مصرية فى نص ملعب ساحل العاج بين شادى وزيدان وابو تريكة .. تطول من شادى محمد وتبقى رمية تماس لساحل العاج

الدقيقة 80
التحام بين احمد حسن وارونا كونى .. احمد حسن واقع ع الارض وفاول لساحل العاج
الكورة خبطت ف وش احمد حسن وبعدها عمل فاول مع كونى

الدقيقة 81
عرضية من كولو تورى لكن فتح الله يشتت
باكارى كونى يشووط لكن تخبط وتترد مرتدة لمصر
لعيبة مصر بتهدى

الدقيقة 82
فاول لابو تريكة قدام منطقة جزاء كوت دى فوار
هو خطيرة بس حاسسها هاتضيع ..خاصة لو احمد حسن اللى لعبها

الدقيقة 83
فعلا احمد حسن اللى شاطها وفعلا تطلع برة خالص
الكورة توصل للعيبة مصر ورا وتتلعب طويلة لعمرو زكى اللى يشد شورت عبد الله مايتى :lol: ارثر بوكا يخش بعنف على عمرو زكى وتبقى فاول تانى لمصر

الدقيقة 84
عمرو زكى يخرج عشان يتعالج
ركنية لساحل العاج يشتتها هانى سعيد

الدقيقة 85
لمسة يد غريبة على احمد حسن اللى كان بيحاول يوقف الكورة على صدره !
صاروخ من كولو تورى يطلعه الحضرى
الفرقتين فى نص ملعب مصر
عرضية ارضية من ارثر بوكا تطلع ضربة مرمى

الدقيقة 86
يخرج عمرو زكى وينزل ابراهيم سعيد .. عمرو زكى يسجد اول ما يخرج
تغيير برضه كويس من حسن شحاتة
عاوزين نقفل ورا شوية بقى

الدققيقة 87
فاول لاحمد حسن على زوكورا
لا كدة ان شاء الله هانكسب
وبعدين هانخسر من الكاميرون ف النهائى
:D

الدقيقة 89
صاروخ من ارثر بوكا وعصام الحضرى يشيله
لا كدة خلاص .. لو ساحل العاج هاتكسب كانت دى دخلت
الحضرى ناشف اوى :D

الدقيقة 90
احمد حسن يواصل تضييع مجهود زمايله
زيدان بيفكرنى بدى نيلسون لما كان بينزل فى البرازيل عشان يضيع وقت بمهارته

الدقيقة 90+1
ضربة مرمى لمصرى طويلة من الحضرى لزيدان اللى يرقص ويلعبها عرضية ولا اروع لابو تريكة اللى يصروخها فى الجون
اربععععععععععععععععععععععة واحد


الدقيقة 90+3
انفراد من زيدان اللى يحاول يشوط ف القريبة لكنها تطلع برة
كانت هاتبقى الخامس !!!!


الدقيقة 90+4
كورنر يلعبه دروجبا براسه تطلع برة ضربة مرمى
شحاتة اخيرا بيضحك بغباء :lol:


اللهههههههههههههههههههههههههههههههه
اللهههههههههههههههههههههههههههههههه


مصر كسبت يا رجالةةةةةةةةةةةةةةةةةةةةةةةةةةةةةةةةةةةةة

اربعة واحد

مش ممكنننن


بعد الماتش دروجبا راح يسلم ع الحضرى وبيقوله : انت تاااانى؟ :lol:

مصر 4-2 الكاميرون .. نهاية المباراة .. مبروك لمصر

ملخص الشوط الاول :

الدقيقة 14 .. ضربة جزاء لمنتخب مصر

الدقيقة 15 .. النتيجة 1-0 لمنتخب مصر
احرز الهدف حسنى عبد ربه من ضربة جزاء

الدقيقة 16 انذار لهانى سعيد

الدقيقة 17 الهدف الثانى لمنتخب مصر احرزه محمد زيدان من هجمة مرتدة سريعة انفرد على اثرها بالحارس الكاميرونى

الدقيقة 20 .. عمرو زكى يصاب فى فكه اثر ضرب مدافع الكاميرون اندريا بيكى له

الدقيقة 24 .. كرة طويلة يخرج الحضرى لالتقاطها بسهولة

الدقيقة 26 .. كرة طولية من زيدان يلتقطها كامينى حارس الكاميرون بصعوبة .. مصر 2-0 الكاميرون

الدقيقة 29 .. يتضح بشدة لعب منتخب مصر على المرتدات واستخدام مهارات وسرعة يدان وفتحى واستخدام القوة الجسمانية لشوقى وحسنى بمعاونة عمرو زكى .. يعنى م الاخر كدة بنقفل كويس ونقطع الكورة ونعمل هجمة مرتدة سريعة . غلابا بيقودها زيدان .. متعب وايتو برة الماتش لحد دلوقتى

الدقيقة 30 .. كرات طويلة يرسلها شوقى وحسنى لفتحى من ناحية اليمين ومعوض من ناحية الشمال فى تلت الكاميرون الدفاعى .. زيدان بيجرى فى كل انحاء الملعب

الدقيقة 32 .. منتخب مصر بدأ يضغط على الكاميرون اللى بدأت تنكمش !
منتخب مصر ماسك كورة دلوقتى وبيقسموا بطول وعرض الملعب

الدقيقة 33 .. تسلل على عمرو زكى .. والحكم يرفض احتساب ركلة حرة للمنتخب المصرى اثر عرقلة سيد معوض على حدود منطقة جزاء الكاميرون

الدقيقة 35 .. فاول لمنتخب مصر ضد صمويل ايتو فى نص ملعب مصر

الدقيقة 36 .. فاول على صمويل ادريسا بعد اصطدامه بهانى سعيد فى منطقة جزاء مصر

الدقيقة 38 .. تغيير للكاميرون بخروج جون ماكون ونزول بينيى

الدقيقة 40 .. زيدان واقع وبيتعالج بعد ما لاعب الكاميرون رقم 19 ضربه .. روجيه ميلا فى المدرجات

الدقيقة 42 .. عرضية خطيرة للكاميرون من ناحية اليمين تعدى ما تلاقيش حد .. تترد بمرتدة مصرية ناخد منها فاول على خط نص الملعب

الدقيقة 43 .. الماتش بدأ يفلت شوية بشوية من الحكم مامادو دو سو .. عرضية تانى من فاول من ناحية اليمين للكاميرن على هانى سعيد لعبها جيريمى لكن تعدى الناس كلها

الدقيقة 45 .. منتخب مصر ضاغط فى نص ملعب الكاميرون .. فاول لمنتخب مصر على جويل ابيلييى يسدده عمرو زكى فى المدرجات .. اداء رائع من شوقى وحسنى

الوقت بدل الضائع للشوط الاول : ادريسا ينطلق بالكورة من ناحية الشمال ويزق احمد فتحى على خط النص فالحكم يحسب فاول لمنتخب مصر .. الحضرى يلعبها طويلة يسقطها فى منطقة جزاء الكاميرون يردها ريجوبير سونج توصل لزيدان اللى يصلحها لنفسه ويشوطها من برة منطقة الجزاء تحتضن الشباااااك الدهف التالت لمنتخب مصر


نهاية الشوط الاول .. مصر 3-0 الكاميرون

*******************************


بداية الشوط الثانى

بين الشوطين : خروج مبيا ونزول اليكساندر سونج

الدقيقة 47 .. مصر بتهاجم !

الدقيقة 48 .. فاول على معوض وانذار .. من الناحية الشمال لمنتخب مصر قريبة من منطقة الجزاء .. تتلعب عالية يحطها بيكى برة الملعب

الدقيقة 50 .. تحضير بطئ لمصر تتقطع من حسنى عبد ربه لكن اشلى امانا عمل فاول على معوض .. فاول لمصر على خط الوسط

الدقيقة 51 .. كرات طويلة من الكاميرون تتقطع كلها من الدفاع المصرى .. تحضير من شوقى تتقطع وتطلع رمية تماس

الدقيقة 52 .. منتخب مصر اضعف بكتير فى الشوط التانى .. فعلا .. عرضية من ناحية اليمين للكاميرون يلعبها ايتو بدماغه فى الجون الفاضى من الحضرى اللى طلع ع الكورة مسك الهوا وايتو حط جون الكاميرون الاول .. مصر 3-1 الكاميرون

الدقيقة 53 .. تحضير من مصر تنتهى بكرة طولية لمتعب لكن تتحسب تسلل

الدقيقة 54 .. هجمات كاميرونية خطيرة للغاية من الناحية اليمين ورا سيد معوض اسوا لاعب فى المباراة تقريبا .. عرضيات كتير بس كلها بعيدة

الدقيقة 57 .. محمد زيدان بدا يستعرض .. سيد معوض ما بيرجعش ورا نهائيا عكس عمرو زكى اللى يبرجع عند منطقة جزاء مصر يستلم كورة ويبدأ تحضير بنفسه .. لا تزال الكاميرون بتلعب عرضيات من ناحية اليمين وحسن شحاتة مش شايف !

الدقيقة 59 .. عمرو زكى دلوقتى هو اللى بيتحرك فى كل مكان عكل زيدان اللى بدأ يثبت ويقل تحركاته ... وسط الكاميرون بدأ يفوق على محمد شوقى وحسنى عبد ربه .. تغيير اليكساندر سونج كان موفق بشدة

الدقيقة 60 .. تغيير غريب للغاية !!!! خروج عمرو زكى انشط لاعبى مصر فى الشوط التانى ونزول محمد ابو تريكة صانع الالعاب فى الوقت اللى مصر كسبانة فيه تلاتة ومحتاجة تدافع !

الدقيقة 62 .. ركنية كاميرونية من ناحية اليمين يحطها اليكساندر سونج برة .. منتخب الكاميرون مسيطر بشدة وبينقلوا كورة من غير ما نضغط عليهم !

الدقيقة 63 .. جيريمى ممرمط معوض !

الدقيقة 65 .. وسط ملعب مصر ضعيف بشدة ومحتاج تدعيم ! .. سيد معوض يعمل فاول جامد وكان الحكم هايديله انذار بس ما رضيش يطرده . تسديدة قوية من صمويل ايتو برة المرمى .. رقص محمود فتح الله ولعبها قريبة جدا

الدقيقة 67 .. لاعبى مصر مرتبكين بشدة ومش عارفين يهاجموا .. كل الكور مقطوعة

الدقيقة 68 .. محمد زيدان بيلعب لوحده مش بيباصى .. وعماد متعب بيلعب فى ماتش تانى .. تايه جدا وبيضيع حاجات غريبة
فاول لمنتخب مصر من ناحية اليمين يلعبه فتحى طويلة ينط عليها شوقى لكن عالية عليه
يستمر حسن شحاتة فى التغييرات الغريبة ! خروج محمد زيدان ونزول احمد المحمدى
زيدان مهما كان افضل من عماد متعب بكتير وبيجرى فى كل الملعب وعامل مجهود عكس متعب اللى نايم بشدة من اول الماتش ومازال اسوا لاعب فى المباراة .. وينزل احمد المحمدى ليه؟ ممكن يلاعبه باك رايت ويضم احمد فتحى لنص الملعب

الدقيقة 70 .. سيد معوض ينطلق ويراوغ ويعدى ويلعب عرضية ماتلاقيش حد

الدقيقة 71 .. محمد ابو تريكة عمل كذا ترقيصة خد بيهم فاول جنب خط الوسط

الدقيقة 73 .. تسديدة زاحفة ارضية من ادريسا يمسكها الحضرى بثبات
ريجوبير سونج رقص عماد متعب ! .. فاول لاحمد فتحى على ادريسا
الدقيقة 75 .. كرة طولية من جيريمى من ناحية اليمين للكاميرون يستلمها ايتو لكن تطول منه وتطلع ضربة مرمى لمنتخب مصر

الدقيقة 76 .. عرضية من احمد المحمدى ما يعرفش عماد متعب يوصلها اللى بيلعب لوحده قدام بعد خروج عمرو زكى ومحمد زيدان !

الدقيقة 77 .. طولية من سيد معوض لمحمد شوقى قرب منطقة جزاء الكاميرون ياخد شوقى رمية تماس من سونج .. ومازال عماد متعب بيلعب فى ماتش تانى .. اتقطعت منه الكورة بشكل غريب ووقع ع الارض جوة منطقة الجزاء .. مافيهاش حاجة طبعا

الدقيقة 79 .. جيريمى فاتح شارع ناحية اليمين ورا سيد معوض وبيلعب طولية لايتو وماحدش فكر يقطعها فى النص .. يحتفظ بيها ايتو لحد ما هانى سعيد يستخلصها ويشتتها

الدقيقة 80 .. الكورة حايرة بين لاعبى الفريقين فى نص ملعب مصر .. تنتهى الكورة بعرضية من ناحية اليمين يعملها اليكساندر سونج توصل لادريسا اللى يلعبها بيمينه برة

الدقيقة 81 .. فاول تانى ياخده ابو تريكة على دايرة وسط الملعب . يلعبها احمد فتحى لمحمود فتح الله ورا لابو تريكة .. تحضير فى وسط الملعب من لاعبى مصر .. توصل لحسنى عبد ربه اللى يشوط قذيفة على شمال الحارس .. الهدف الرابع لمنتخب مصر .. مصر 4-1 الكاميرون

الدقيقة 84 .. فاول للكاميرون من برة منطقة الجزاء على يمين منتخب مصر يلعبها صمويل ايتو برة ال3 خشبات

الدقيقة 85 .. انطلاقة من سيد معوض ناحية الشمال تنتهى بوقوعه على الارض ورمية تماس للكاميرون

الدقيقة 86 .. اخطر كرات الكاميرون فى الشوط التانى .. اخطر من فرصة الجون نفسه .. عرضية ارضية من ناحية اليمين للكاميرون يتخبط الحضرى فى محمود فتح الله ويقعوا الاتنين ع الارض وتعدى الكورة خطيرة جدا بس ماتلاقيش حد يتابعها

الدقيقة 89 .. روجيه ميلا فى المدرجات .. قلع النضارة ومكتئب اوى والدموع ف عينيه :lol:

الدقيقة 90 .. بيكى ياخد فاول من عماد متعب
التغيير التالت لمنتخب مصر .. خروج سيد معوض - اخييييييرا - ونزول شادى محمد .. اخيرا تغيير صح من حسن شحاتة

الوقت بدل الضائع : 3 دقائق

الوقت بدل الضائع : ضربة جزاء للكاميرون وانذار لمحمود فتح الله

الهدف الثانى للكاميرون من ضربة جزاء يسددها صمويل ايتو على يمين عصام الحضرى اللى طار عليها لكنها دخلت من بين ايديه !

نهاية المباراة .. مبروك لمصر الفوز الساحق على الكاميرون 4-2